2 JON
Jon so mamey meyki ko hok non
Meyamey uwr hokwe: Aposel Jon.
Yier hiy ma lwayr meyamey hokwe: Nonkway lwak pey, yier Efesus mon lwak se po meyamey pak e.
Enekwei hiy ma meyamey hokwe: Hiykwe enekwei Yia 85-96 so ompok sok meyamey, Jisas hiy ma lokrue so meyki.
Ok mamey mon ma lwak mokwe senkin: Mamey haraw-ney okukwe Jon hiykwe kristen-sa prueyn ke mey-a-mey kow. Sawk Baibel nonkway-uwr kraiar homkwe senkin nan, kristen-sa sokukwe sios kamon ke me-memeir kow. Jon hiykwe sios sohok ko sa-u-ar kokwe nak-mey pa, payhokuaw, hiykwe Rom mo yor sios me ma mon piap-ay seme hok. Jon hiykwe kristen hom homkiaw-ayay uron-pi ko-ar lwak e hiy-me kraipakrai, seyr hiykwe hmekwe okrei hiymon-sorasor-uwr me nak-ira e hiy-me-kupaku.
Mamey ohok ko uron ipey-ar hokwe senkin: Kristen homkwe senkin nonkway e, okrei hiymon-sorasor-uwr kraiar homkwe papo lousne-sa-ousne. Hromkwe seme nonkway e, uwr senkin hom sios mon lousne ankin, kristen hromkwe liy lorok kraipakrai mon sous-a-sous huon. Sawk kristen homkwe homkiaw-ayay uron-pi ko-ar lwak yor nonaw kwa lorok.
1
1 Mamey okukwe ha sios-makwey-uwr hiy mey. Hakwe mamey okukwe sa, God hiy ma lahan iaup o, hoko ney-om o, hme mey kow ha.* Nonkway-uwr har homkwe senkin nan ohruw-a, sa-ok ma me sokukwe sa-arar korey. Sokukwe sios se me-memeir. Hoko ney-ok ma me somokwe sios-uwrsa me me. Hakwe hme kokwe ok-ar-ok ke hokuaw uron-pi ko-ar nuw-wak. Hakwaw korey, sawk uwrsa lowpwarowp okar-ok ke ma nonkway hom seyn, hme uron-pi ko-ar lwak, 2 payhokuaw, okar-ok hokwe hromo mon lwayr, seyr hreme nion senkin-aw non-wayr ey.
3 Aio God o, Aio so Ney, Jisas Krais o, hohkwe hremekwe maym o, uron lowk yor o, liwak marowhway yor o, seme ka kow. Weynpaweyn somokwe okar-ok non o, uron-pi ko-ar yor non o, hreme nion ka lwak.
Okar-ok o, uron-pi ko-ar o
4 Hakwe kar sehe ley, payhokuaw, hakwe senkin nonkway, hno ney har homkwe ok-ar-ok ko meyki pyay, Aio hiy hreme ma me-kupaku senkin. * 3 Jn 1:3 5 Sa ihey-ar akwa, hakwe hne senkin mesopok, hromkwe wayh-wayh me uron-pi ko-ar lwak e. Hakwe hnekwe me-kupaku-ok iwon ke mey kow pey. Me-kupaku-ok sokukwe hrom peyr-ar ma lonok pie hok non. * 1 Jn 2:7 6 Uron-pi ko-ar ha ma me sokukwe senkin, hromkwe God so me-kupaku-ok me lonuayk me pyay e. Homkiaw peyr-ar po lonuayk pie, hyo me-kupaku-ok kokwe senkin, homkwe uron-pi ko-ar lwak yor nonaw lanio e.
7 Okrei-uwr kraiar homkwe kipay lowpwarowp mon po ley neyney. Unsaney somokwe ok-ar-ok, Jisas Krais hiy iwar mo owhi non ma nake hokwe, me-kumay sakon kawk pey. Unsaney senkin somokwe okrei-uwr, seyr okrei-krais. * 1 Jn 4:1-3 8 Homkwe iray-iray non kwa lwak, sa mey, hom ma meio lonok me mon swakreik ha lak. Sawk God hiykwe hmekwe, pie ka ma-sahre kow prusow. 9 Unsaney, Krais so hiymon sorasor me ma lokriy hain, sawk yirour-irour non ma nakey homkwe, God se nion non-wak pey. Unsaney Krais so hiymon sorasor mon-aw ma lwak somokwe, Aio o, Ney o, hehe nion non-wak. 10 Unsaney prueyn hno owh mon ma le hiykwe, hiymon sorasor-ok sokwe nake pa lwak ankin, hunkwe unsaney sohokwe hno a mon peie me-huonok yawriy o, seyr kar peie me ey huon o. 11 Hunkwe uwr senkin sehe kar nonaw me-huonok yawriy ankin, hunkwe hyo yor piap-araw me lon-mon wayh-wayh.
Ok pariawey hom non
12 Hakwe hmekwe ok kraiar mey kow e mon, sawk hakwe mamey non mey e mon pey. Hakwe hmekwe hakiaw le ira e mon, seyr ine sawk-sawk non-ohruw e mon, hromo kar ley yor ke nak-mon prusow lowpway ey hokwe.
13 Hno ine, God hiy ma lahan iaup ko ney homkwe, hne me-ihey-ok me-ha.
*1:1: Nonkway-uwr har homkwe senkin nan ohruw-a, sa-ok ma me sokukwe sa-arar korey. Sokukwe sios se me-memeir. Hoko ney-ok ma me somokwe sios-uwrsa me me.