1 Hermanos, e ukaꞌm carta waꞌ kantzꞌibꞌaj pana che alaq. Yey chupa ukabꞌichal carta lik e kankꞌosoj uwach ri saqil naꞌoj alaq rukꞌ pixabꞌanik, chaꞌ ri naꞌoj alaq kakꞌojiꞌ chi jusukꞌ. 2 Kꞌuna kꞌu chikꞌuꞌx alaq ri xkibꞌiꞌij lo rojertan ri qꞌalajisanelabꞌ re ri Dios, yey ri kubꞌiꞌij ri taqanik re ri Qanimajawal y Qakolobꞌenel, ri xkꞌut che alaq kuma taq rutaqoꞌn ri Dios. 3 Lik chirajawaxik nabꞌe na ketaꞌmaj alaq waꞌ: Chupa taq rukꞌisbꞌal qꞌij keyaktaj lo winaq e chꞌaminel, ri kakitaqej ri kirayibꞌal na chom ta uwach. 4 Kakibꞌiꞌij kꞌu che alaq: «¿Saꞌ xuꞌan riꞌ ri bꞌiꞌtisinik ꞌanom kan puwi rutzelejik lo ri Cristo? Ma ya ne xekam ri qachu-qaqaw, ri nabꞌe xekojow rubꞌiꞌ ri Cristo; y ronoje junam uꞌanom chwi lo rujeqebꞌal ruwachulew, na jinta kꞌo jalkꞌatajinaq che» kechaꞌ. 5 Jekꞌuwaꞌ kakibꞌiꞌij ma na kakaj taj kakimaj usukꞌ e rojertan e ri Dios rukꞌ Ruchꞌaꞌtem xuꞌan ruwa kaj y xuꞌan ruwachulew, yey waꞌ xuwinaqirisaj lo pa ri yaꞌ y xutikibꞌaꞌ chuxoꞌlibꞌal waꞌ.* Gn. 1:6-9 6 Yey ruma kꞌu ri yaꞌ re ri nimalaj jabꞌ xutaq lo ri Dios, xsach kiwach taq ri winaq re ojertan y xjalkꞌatix uwach ruwachulew. 7 Ekꞌu ruwa kaj y ruwachulew e kꞌo woꞌora, e chajital chi ruma ri tzij ubꞌiꞌim ri Dios kꞌa echiriꞌ keyaꞌ pa aqꞌ chupa ruqꞌijol ri qꞌatbꞌal tzij, echiriꞌ kasachisax kiwach ri tikawex lik e aj makibꞌ.

8 Pero ralaq hermanos, masach chikꞌuꞌx alaq waꞌ: Chwach ri Qaqaw e ri jun qꞌij e junam rukꞌ pachaꞌ chi juna mil junabꞌ; yey e ri jun mil junabꞌ e junam rukꞌ pachaꞌ chi juna qꞌij. 9 Ri Qanimajawal na kamayin ta che uꞌanik janipa rubꞌiꞌtisim loq, jelaꞌ pachaꞌ ri kakibꞌiꞌij jujun. Ma Rire lik kꞌo unimal ukꞌuꞌx qukꞌ, y na karaj ta kꞌu kasach uwach junoq. Ri karaj Rire e konoje ri tikawex kakitzelej kitzij chwach.

10 Ekꞌu ruqꞌijol rukꞌunibꞌal ri Qanimajawal kakꞌun loq pachaꞌ ri okibꞌal re juna eleqꞌom pa juna ja chaqꞌabꞌ, ma ri eleqꞌom na kubꞌiꞌij ta apanoq jampalaꞌ koponik. Chupa kꞌu waꞌ wa qꞌij kasach uwach ruwa kaj rukꞌ jun nimalaj chꞌawibꞌal kajininik y ronoje taq ri kꞌo chwach kasach kiwach ruma ri aqꞌ. Yey ruwachulew y ronoje taq ri e kꞌo chwach keporotajik. 11 We ronoje kꞌu riꞌ waꞌ jelaꞌ rusachik uwach kaꞌanik, ¿suꞌchak kꞌu riꞌ na kabꞌin ta alaq jusukꞌ rukꞌ jun saqil bꞌinik silabꞌik chwach ri Dios? 12 Rukꞌ kꞌu ronoje kꞌuꞌx alaq, lik chok alaq il che royꞌexik rukꞌunibꞌal ruqꞌijol ri Dios. Ma chupa waꞌ wa qꞌij ruwa kaj kumaj aqꞌ y kasach uwach, y ronoje taq kꞌu riꞌ ri kꞌo che ruwa kaj kakꞌatik y kajaqꞌur ruma rukꞌatibꞌal ri aqꞌ. 13 Noꞌj riꞌoj qoyeꞌem jun kꞌakꞌ uwa kaj y jun kꞌakꞌ uwachulew jelaꞌ pachaꞌ rubꞌiꞌtisim ri Dios. Yey chiriꞌ, konoje xew e kakiꞌan ri lik jusukꞌ.

14 E uwariꞌche ralaq hermanos, ruma oyeꞌem alaq taq waꞌ, e chuꞌana ubꞌis kꞌuꞌx alaq ri kariqitaj alaq ruma ri Dios chi utzil chomal rukꞌ jun bꞌinik alaq lik jusukꞌ, chaꞌ na jinta mak alaq y na jinta junoq katzꞌaqaw mak chiꞌij alaq. 15 Lik maja kꞌu alaq usukꞌ waꞌ: Runimal ukꞌuꞌx ri Qanimajawal qukꞌ e re kojkolobꞌetajik jelaꞌ pachaꞌ rutzꞌibꞌam ri qa hermano Pablo che alaq, yey ri xutzꞌibꞌaj rire e chirij ri naꞌoj yaꞌtal che ruma ri Dios. 16 Ri Pablo lik xchꞌaꞌt chwi taq waꞌ. Chupa taq rucartas kꞌo ri lik kꞌayew umajik usukꞌ. Yey e taq kꞌu ri na jinta kimajom puwi waꞌ y na jinta ukowil ri kubꞌulibꞌal kikꞌuꞌx, na jusukꞌ ta chi ubꞌiꞌxikil kakiꞌan puwi taq rutzꞌibꞌam ri Pablo yey jenelaꞌ kakiꞌan rukꞌ ri nikꞌaj chik Utzij Upixabꞌ ri Dios; y rukꞌ waꞌ e kakitzukuj ri qꞌatbꞌal tzij re ri Dios pakiwiꞌ.

17 E uwariꞌche ralaq hermanos, ruma etaꞌam chi alaq chi utz saꞌ ri katajin loq, lik chajij kꞌu ibꞌ alaq chaꞌ na kajekꞌetaj tubꞌi alaq ruma ri sokosoꞌnik ke ri lik na kebꞌin ta jusukꞌ y chaꞌ na kaya ta kan alaq ri Utzilaj Tzij kojom chi alaq. 18 Ri ꞌana alaq e kꞌiya alaq chupa ri unimal rutzil ukꞌuꞌx ri Dios y che ri retaꞌmaxik uwach chi utz ri Qanimajawal y Qakolobꞌenel Jesucristo. Che kꞌu Rire taqal wi ri yakbꞌal qꞌij na jinta utaqexik woꞌora y chiqawach apanoq. Amén.