1 Chilaꞌ kꞌut chupa ri tinamit Iconio, ri Pablo y ri Bernabé junam xebꞌok chupa ri sinagoga ke raj judiꞌabꞌ. Ruma kꞌu ri Utzilaj Tzij xkitzijoj, lik e kꞌi ri e aj judiꞌabꞌ y ri na e ta aj judiꞌabꞌ xkikoj rubꞌiꞌ ri Cristo. 2 Noꞌj ri e aj judiꞌabꞌ ri na kakikoj ta ri Utzilaj Tzij, xkitik oyowal pa kanimaꞌ ri na e ta aj judiꞌabꞌ yey xekituk waꞌ wa winaq chaꞌ keyaktaj chikij ri kikojom rubꞌiꞌ ri Cristo. 3 Na rukꞌ ta kꞌu riꞌ, lik naj xekꞌojiꞌ ri Pablo y ri Bernabé chiriꞌ y na kakixiꞌij ta kꞌana kibꞌ kechꞌaꞌt chikiwach konoje. Ekꞌu ri Qanimajawal xujikibꞌaꞌ uwach ri kichꞌaꞌtem chwi ri unimal rutzil ukꞌuꞌx, ma xuya chike kakiꞌan nimaq taq kꞌutubꞌal re ruchuqꞌabꞌ ri Dios. 4 Ekꞌu ri winaq re ri tinamit kijachom kipa; jujun chike ekiternabꞌem raj judiꞌabꞌ y jujun chik ekiternabꞌem ri e taqoꞌn re ri Jesús.

5 Ekꞌu ri e aj judiꞌabꞌ junam kukꞌ ri na e ta aj judiꞌabꞌ xkiꞌan tzij chikiwach kukꞌ ri e aj wach chaꞌ keyaktaj chikij ri Pablo y ri Bernabé re kakiꞌan kꞌax chike y kekiꞌan paꞌbꞌaj. 6 Echiriꞌ ri Pablo y ri Bernabé xketaꞌmaj waꞌ, xebꞌel bꞌi chiriꞌ y xebꞌek pa ri luwar re Licaonia pa taq ri tinamit Listra y ri tinamit Derbe y pa taq ri luwar chunaqaj wa kebꞌ tinamit. 7 Y chiriꞌ kꞌu riꞌ kakitzijoj ri Utzilaj Tzij.

8 Chupa wa tinamit Listra kꞌo jun achi sikirinaq ukabꞌichal ri raqan y na bꞌininaq ta kꞌenoq ma ralaxibꞌem sik. Waꞌ waꞌchi tzꞌulik, 9 e riꞌ kutataꞌ ri kubꞌiꞌij ri Pablo.

Ekꞌuchiriꞌ ri Pablo xuchꞌikibꞌaꞌ ruwach puwiꞌ y xrilo kꞌo kubꞌulibꞌal ukꞌuꞌx chaꞌ kakunutajik, 10 lik ko xubꞌiꞌij che:

—¡Chatyaktajoq y chat-takꞌala jusukꞌ chwi rawaqan! —xchaꞌ.

Ekꞌu rachi xchꞌoplin chikaj y xbꞌinik.

11 Ekꞌu ri winaq echiriꞌ xkilo saꞌ ri xuꞌan ri Pablo, xkijeq kesikꞌin pa kichꞌaꞌtem rike, waꞌ e ri chꞌaꞌtem re Licaonia. Jewaꞌ kakibꞌiꞌij: «¡Waꞌ e tiox kiꞌanom lo achijabꞌ che kibꞌ y xeqaj lo wara qukꞌ!» kechaꞌ.

12 Che ri Bernabé xkibꞌiꞌij e tiox Júpiter, yey che ri Pablo xkibꞌiꞌij e tiox Mercurio* “Mercurio”: Chikiwach raj Roma, Mercurio e ri tiox karesaj kichiꞌ ri nikꞌaj chik tiox. ma e rire ri más kachꞌawik. 13 Ekꞌu raj chakunel re ri tiox Júpiter, ri kꞌo rocho pa okibꞌal lo re ri tinamit, xebꞌukꞌam lo toroꞌibꞌ y kotzꞌiꞌj yijbꞌam re wiqonik chwach taq ri okibꞌal re ri templo. Yey junam kukꞌ rukꞌiyal winaq xkaj kekikamisaj rawaj re kiqasaꞌn chikiwach ri Bernabé y ri Pablo.

14 Echiriꞌ xkita waꞌ ri kebꞌ taqoꞌn Bernabé y Pablo, xkirichꞌij ri kiqꞌuꞌ y xkimin kibꞌ chikixoꞌl rukꞌiyal winaq; kesikꞌinik jewaꞌ kakibꞌiꞌij:

15 «¡Achijabꞌ!, ¿suꞌchak kaꞌan alaq waꞌ? Ma riꞌoj xa oj achijabꞌ junam qawach ukꞌ alaq. Wa Utzilaj Tzij kaqatzijoj che alaq e chaꞌ kaya kan alaq ri na il ta uwach y katzukuj alaq ri Dios kꞌaslik, ri xꞌanaw re ruwa kaj, ruwachulew, ri mar y ronoje ri kꞌo che taq waꞌ. 16 Tobꞌ rojertan ri Dios xuya luwar chike taq ri tinamit kebꞌin chupa taq ri bꞌe kakaj rike, 17 na rukꞌ ta kꞌu riꞌ, ri Dios na roqꞌotam ta kꞌana uqꞌalajisaxik china Rire ruma taq ri utz kuꞌano. Ma kuya lo ri jabꞌ y kuya lo ruqꞌijol echiriꞌ lik kꞌo molonik. E Rire ri kaꞌanaw re lik kꞌo kaqatijo y kꞌo kiꞌkotemal chupa ri qanimaꞌ» kechaꞌ.

18 Ri Bernabé y ri Pablo, tobꞌ ketajin che ubꞌiꞌxikil waꞌ, lik kꞌayew xekiqꞌatej rukꞌiyal winaq chaꞌ na kekikamisaj ta rawaj re qasaꞌn chikiwach rike.

19 Chupa kꞌu laꞌ laꞌ joqꞌotaj xekꞌun lo jujun aj judiꞌabꞌ e aj pa ri tinamit Antioquía y ri tinamit Iconio. Rike xkikoj pa kijolom rukꞌiyal winaq kakiꞌan ri Pablo paꞌbꞌaj. Y ekꞌu xkiꞌano. Tekꞌuchiriꞌ, xkichararej bꞌi ri Pablo tzaꞌm tinamit. E chikiwach rike, kaminaq chik. 20 Pero echiriꞌ ri kikojom rubꞌiꞌ ri Cristo xkisut rij ri Pablo, rire xyaktajik y xok tanchi chupa ri tinamit. Chukaꞌm qꞌij xel bꞌi rukꞌ ri Bernabé y junam xebꞌek pa ri tinamit Derbe.

21 Xkitzijoj kꞌu ri Utzilaj Tzij chupa wa tinamit y ukꞌiyal tikawex xkikoj rubꞌiꞌ ri Cristo. Tekꞌuchiriꞌ, xetzelej tanchi lo chupa ri tinamit Listra, ri tinamit Iconio y ri tinamit Antioquía. 22 Xkinimarisaj kꞌu kan kikꞌuꞌx ri hermanos y lik xekipixabꞌaj chaꞌ katikiꞌ chi utz ri kubꞌulibꞌal kikꞌuꞌx rukꞌ ri Jesús, jewaꞌ kakibꞌiꞌij chike: «Lik chirajawaxik rukꞌ ukꞌiyal kꞌaxkꞌobꞌik kojok chupa rutaqanik ri Dios» kechaꞌ.

23 Yey xekikoj kan e aj wach chujujunal taq iglesia. Xkiꞌan kꞌu orar y ayunar kukꞌ. Tekꞌuchiriꞌ, xkitzꞌonoj che ri Qanimajawal kebꞌuchajij janipa ri lik kubꞌul kikꞌuꞌx rukꞌ Rire.

24 Xebꞌikꞌow kꞌu pa taq ri luwar re Pisidia y xebꞌopon pa ri luwar re Panfilia. 25 Xkitzijoj kꞌu ri Utzilaj Tzij chupa ri tinamit Perge. Tekꞌuchiriꞌ, xkimaj bꞌi pa ri tinamit Atalia.

26 Chiriꞌ kꞌu riꞌ xkimaj bꞌi pa barco y xetzelej Antioquía.† Kꞌo kebꞌ Antioquía. Wa jun e Antioquía re Siria, pa xkijeq wubꞌi ri kibꞌenam ri Pablo y ri Bernabé. Waꞌ e ri tinamit pa xtzꞌonox wubꞌi rutoꞌbꞌal ri Dios pakiwi ri Pablo y ri Bernabé chaꞌ kakiꞌan ri chak yaꞌom pakiqꞌabꞌ,* Hch. 13:1-3 yey waꞌ wa chak kikꞌisom chi rike.

27 Echiriꞌ xebꞌoponik, xekimol kichiꞌ konoje ri kikojom rubꞌiꞌ ri Cristo y xkitzijoj kꞌu chike ronoje ri xuꞌan ri Dios kukꞌ y suꞌanik xuya chike ri na e ta aj judiꞌabꞌ kebꞌuꞌan xa jun kukꞌ ri kikubꞌam kikꞌuꞌx rukꞌ ri Qanimajawal Jesucristo. 28 Xekanaj kꞌu kan chiriꞌ ukꞌiyal qꞌij kukꞌ ri kikojom rubꞌiꞌ ri Cristo.