1 Kꞌate tanchi kꞌu riꞌ, ri Jesús xtzelej Jerusalem echiriꞌ raj judiꞌabꞌ kꞌo jun kinimaqꞌij.

2 Chupa kꞌu laꞌ la tinamit, chunaqaj ri Okibꞌal ke Bꞌexex, kꞌo jun nimalaj atinibꞌal, “Betesda” rubꞌiꞌ pa ri chꞌaꞌtem hebreo. Waꞌ woꞌobꞌ uchiꞌ ja kꞌo che. 3 Chiriꞌ e kꞌo ukꞌiyal yewaꞌibꞌ e kotzꞌerinaq; e kꞌo potzꞌ, jetzꞌ y sik. Konoje rike koyeꞌem echiriꞌ kasilabꞌ ri yaꞌ, 4 ma xa chirij ora kaqaj lo jun ángel y kurujuraꞌ upa ri yaꞌ. Ekꞌu riꞌ ri nabꞌe kukꞌaq bꞌi ribꞌ chupa, riꞌ kel loq kunutajinaq chik tobꞌ saꞌ ri yabꞌil kꞌo che.

5 Kꞌo kꞌu jun achi e treinta y ocho junabꞌ riꞌ yewaꞌ. 6 Echiriꞌ ri Jesús xrilo kotzꞌol chiriꞌ y xretaꞌmaj ukꞌiyal junabꞌ jelaꞌ uꞌanom, xutzꞌonoj kꞌu riꞌ che:

—¿Kawaj katkunutajik? —xchaꞌ.

7 Rachi jewaꞌ xukꞌul uwach:

—Wajawal, na jinta junoq kakꞌamaw bꞌi we chupa ri atinibꞌal echiriꞌ karujurut upa ri yaꞌ. Lik nutijom chi nuqꞌij che kankꞌaq bꞌi wibꞌ chupa; pero echiriꞌ kuaj kanꞌano, kꞌate kanwilo jun chik kanabꞌej chinuwach —xchaꞌ.

8 Ri Jesús xubꞌiꞌij che:

—Chatyaktajoq, chakꞌama bꞌi rachꞌat y chatbꞌinoq —xchaꞌ.

9 Chupa kꞌu laꞌ la joqꞌotaj rachi xkunutajik, xukꞌam bꞌi ruchꞌat y xujeqo kabꞌinik. Yey waꞌ xuꞌan pa jun qꞌij re uxlanibꞌal.

10 Ruma kꞌu riꞌ, ri e aj judiꞌabꞌ xkibꞌiꞌij che rachi xkunutajik:

—Waqꞌij e qꞌij re uxlanibꞌal, y na ubꞌe ta chawe kawukꞌaꞌaj rachꞌat —xechaꞌ.

11 Rachi xukꞌul kꞌu uwach chike:

—Ri jun xinukunaj e xbꞌiꞌn re chwe: “Chakꞌama bꞌi rachꞌat y chatbꞌinoq” —xchaꞌ.

12 Xkitzꞌonoj kꞌu che:

—¿China ri xbꞌiꞌn chawe: “Chakꞌama bꞌi rachꞌat y chatbꞌinoq”? —xechaꞌ.

13 Ekꞌu rachi na retaꞌam taj china ri xkunaw re, ma ri Jesús xel bꞌi chikixoꞌl ri tikawex e kꞌo chiriꞌ.

14 Tekꞌuchiriꞌ, ri Jesús xuꞌriqa rachi pa ri Rocho Dios y xubꞌiꞌij che:

—Chawilapeꞌ: Woꞌora at kunutajinaq chik; matmakun chi kꞌu riꞌ, ma kꞌaxtaj kape juna kꞌaxkꞌobꞌik más nim pawiꞌ —xchaꞌ.

15 Xeꞌek rachi y xuꞌtzijoj chike raj judiꞌabꞌ e ri Jesús xkunaw re. 16 Ruma waꞌ, raj judiꞌabꞌ xkijeq uternabꞌexik ri Jesús y kakitzukuj suꞌanik kakikamisaj, ma rire kuꞌan kunanik pa ri qꞌij re uxlanibꞌal.

17 Ekꞌu ri Jesús xubꞌiꞌij chike:

—Ri Nuqaw na roqꞌotam taj kachakunik y jekꞌulaꞌ riꞌ kanꞌan riꞌin —xchaꞌ.

18 Ruma waꞌ raj judiꞌabꞌ más xkiya kibꞌ che ukamisaxik ri Jesús, ma e chikiwach rike kupalajij ri taqanik puwi ri qꞌij re uxlanibꞌal. Y na xew ta waꞌ, ma kujunimaj ne ribꞌ rukꞌ ri Dios echiriꞌ kubꞌiꞌij ri Dios e Uqaw.

19 Ekꞌu ri Jesús xubꞌiꞌij chike:

«Paqatzij wi kambꞌiꞌij che alaq: Rukꞌajol ri Dios na jinta kꞌo kuꞌan xa pa re Rire; ma xew kuꞌan pachaꞌ ri karilo kuꞌan Ruqaw. Janipa taq ri kuꞌan Ruqaw, jekꞌulaꞌ kuꞌan Rukꞌajol.

20 »Ma ri Dios lik kꞌax kunaꞌ Rukꞌajol y kukꞌut kꞌu che ronoje ri kuꞌano. Yey kꞌo ne ri más nimaq taq chak kukꞌut chwach. Y we xuꞌan kꞌu waꞌ, lik kakam ne animaꞌ ralaq che. 21 Ma jelaꞌ pachaꞌ ri Dios kebꞌukꞌastajisaj ri ekaminaq y kuya kikꞌaslemal, jekꞌulaꞌ Rukꞌajol kuya kꞌaslemal china che ri karaj kuya wi. 22 Yey ri Dios na kuqꞌat tane tzij puwi junoq, ma puqꞌabꞌ Rukꞌajol uyaꞌom wi kuqꞌat tzij pakiwi ri tikawex, 23 chaꞌ jelaꞌ konoje ri tikawex kakiyak uqꞌij Rukꞌajol, jelaꞌ pachaꞌ kakiꞌan che uyakik uqꞌij ri Dios. Yey china ri na kuyak ta uqꞌij Rukꞌajol ri Dios, na kuyak ta kꞌu uqꞌij riꞌ ri Jun xtaqaw lo re, waꞌ e ri Dios.

24 »Paqatzij wi kambꞌiꞌij che alaq: China ri lik kuta chi utz ri kambꞌiꞌij riꞌin y kakubꞌiꞌ ukꞌuꞌx rukꞌ ri xtaqaw lo we, riꞌ kꞌo ukꞌaslemal na jinta utaqexik y na kukꞌul ta ri kꞌaxkꞌolil re ri qꞌatbꞌal tzij. Jekꞌulaꞌ, na jinta chi puqꞌabꞌ ri kamik, ma asu xqꞌax chupa ri kꞌaslemal. 25 Paqatzij wi kambꞌiꞌij che alaq: Kopon kꞌu ri ora y e chi uqꞌijol waꞌ echiriꞌ ri na jinta kikꞌaslem chwach ri Dios, kakita ruqul Rukꞌajol ri Dios. Yey china taq kꞌu riꞌ ri kakikoj utzij, kꞌo kikꞌaslemal na jinta utaqexik. 26 Ma puqꞌabꞌ ri Qaqaw Dios kꞌo wi kuya kꞌaslemal; jekꞌulaꞌ uyaꞌom puqꞌabꞌ Rukꞌajol kuya kꞌaslemal. 27 Yey ri Dios uyaꞌom ne puqꞌabꞌ Rukꞌajol kuqꞌat tzij pakiwi ri tikawex, ma Rukꞌajol e Alaxel Chikixoꞌl Tikawex.

28 »Makam animaꞌ alaq che waꞌ, ma kopon ri ora echiriꞌ konoje ri ekaminaq kakita ruqul Rire. 29 Janipa ri xkiꞌan ri utz, riꞌ keyaktaj lo che jun kꞌastajibꞌal re kꞌaslemal. Noꞌj janipa kꞌu ri xkiꞌan ri na utz taj, riꞌ keyaktaj lo che ri qꞌatbꞌal tzij kaꞌan pakiwiꞌ.

30 »Na jinta kꞌo kanꞌan xa pa we riꞌin. Ri qꞌatbꞌal tzij kanꞌano e ri kinutaq ri Nuqaw che uꞌanik. Yey lik jusukꞌ ri qꞌatbꞌal tzij kanꞌano. Na e ta kanꞌan riꞌ ri kuaj riꞌin; ma e kanꞌan janipa ri karaj ri Nuqaw, ri xtaqaw lo we. 31 We ta e laꞌ xa chiwibꞌil wibꞌ riꞌin kanqꞌalajisaj saꞌ ri nuwach, riꞌ na jinta uchak ri kambꞌiꞌij. 32 Kꞌo kꞌu Jun kaqꞌalajisan nuwach, waꞌ e ri Nuqaw, y wetaꞌam kꞌut ronoje ri kuqꞌalajisaj Rire panuwi riꞌin, lik qatzij.

33 »Ralaq xtaq ne bꞌi alaq utzꞌonoxik che ri Juan panuwi riꞌin; y ri kꞌulubꞌal uwach xuꞌan lo rire, lik qatzij. 34 Pero riꞌin na kajawax ta chwe kꞌo junoq kuqꞌalajisaj saꞌ ri nuwach. Xew kꞌu kankuxtaj che alaq ri xubꞌiꞌij ri Juan panuwi riꞌin chaꞌ kakoj alaq y jelaꞌ kakolobꞌetaj alaq. 35 Ma ri Juan e pachaꞌ juna aqꞌ karepowik y kawon chi utz. Pero ralaq xa joqꞌotaj xkiꞌkot alaq che ri Qꞌijsaq xutzijoj.

36 »Kꞌo kꞌu jun kꞌutubꞌal más kꞌo uwach chwa ri xuqꞌalajisaj ri Juan panuwi riꞌin. Ma ronoje rubꞌiꞌim lo ri Nuqaw chwe re koꞌlnuꞌanaꞌ, e ri kintajin che uꞌanik. Yey ruma taq ri kanꞌano, kaqꞌalajinik, e ri Nuqaw ri xtaqaw lo weꞌin. 37 Yey ri kaqꞌalajisan re saꞌ ri nuwach riꞌin e ri Nuqaw, ri taqayom lo weꞌin. Pero lik qꞌalaj na tom ta kꞌana alaq ruqul ri Dios y na ilom ta alaq uwach, yey 38 Ruchꞌaꞌtem Rire na okinaq ta pa animaꞌ alaq; ma na kubꞌul ta kꞌuꞌx alaq rukꞌ ri jun utaqom lo ri Dios.

39 »Lik kꞌu katijoj ibꞌ alaq che Ruchꞌaꞌtem ri Dios tzꞌibꞌital kanoq; ma ralaq kachꞌobꞌ alaq e chupa waꞌ kariqitaj wi ri kꞌaslemal na jinta utaqexik. ¡Yey ekꞌu riꞌ Ruchꞌaꞌtem ri Dios ri kaqꞌalajisan nuwach riꞌin! 40 Na rukꞌ ta kꞌu riꞌ, na kaꞌaj ta alaq kape alaq wukꞌ chaꞌ jelaꞌ kakꞌul alaq waꞌ wa kꞌaslemal.

41 »Riꞌin na e ta kantzukuj ri yakbꞌal nuqꞌij kakiꞌan ri winaq. 42 Yey lik ne wetaꞌam ri kꞌuꞌx alaq, ma ralaq na kꞌax ta kanaꞌ alaq ri Dios pa saqil wi. 43 Riꞌin in petinaq pa rubꞌiꞌ ri Nuqaw yey ralaq na kakoj ta alaq nutzij. Noꞌj we ta e laꞌ kakꞌun chi lo jun chik y xa pa re katzijonik, riꞌ e kakoj alaq re.

44 »¿Suꞌanik kakubꞌiꞌ kꞌuꞌx alaq wukꞌ riꞌin, we xew katzukuj yakbꞌal qꞌij alaq chiwach ralaq yey na katzukuj ta alaq ri saqil yakbꞌal qꞌij, ri xew kape rukꞌ ri Dios? 45 E chiwach ralaq kankoj mak alaq chwach ri Nuqaw; na e ta riꞌ. Ma ri kakojow mak chiꞌij alaq, e ri jun lik kubꞌam kꞌuꞌx alaq rukꞌ; waꞌ e ri Moisés. 46 Ma we ta e laꞌ lik kakoj alaq ri ubꞌiꞌim lo ri Moisés, riꞌ kakoj alaq ri kantzijoj riꞌin. Ma rire panuwi riꞌin xtzꞌibꞌan wi. 47 Noꞌj we na kakoj ta alaq rutzꞌibꞌam kan ri Moisés, ¿saꞌ kꞌu uꞌanik riꞌ kakoj alaq ri kambꞌiꞌij riꞌin che alaq?» xcha ri Jesús.