1 »In ri in saqil raqan uva y ri Nuqaw e ri aj chakunel chupa taq ri uva. 2 We kꞌo kꞌu juna uqꞌabꞌ ri uva na kuya ta uwach, Rire kuqꞌat bꞌi. Noꞌj kꞌu ri kuya uwach, xa e kujal uwiꞌ re kuꞌan chom che chaꞌ jelaꞌ kuya más uwach. 3 Jekꞌulaꞌ riꞌix ꞌanom chi chom chiwe ruma ri kꞌutunik nuꞌanom chiwach.

4 »Miwesaj iwibꞌ chwij, jekꞌulaꞌ xa jun qaꞌanom, riꞌix wukꞌ riꞌin y riꞌin iwukꞌ riꞌix. Ma e pachaꞌ juna uqꞌabꞌ cheꞌ na kawachin ta xa utukel we kesax che ri raqan; jekꞌulaꞌ riꞌ riꞌix, na utz taj kixwachinik we kiwesaj iwibꞌ chwij.

5 »In ri in raqan ri tikoꞌn yey riꞌix ix ruqꞌabꞌ. China kꞌu ri uꞌanom xa jun wukꞌ riꞌin yey riꞌin in xa jun rukꞌ rire, riꞌ lik kawachinik. Ma we iwesam iwibꞌ chwij, na jinta kichꞌij uꞌanik. 6 China kꞌu ri karesaj ribꞌ chwij, jelaꞌ kaꞌan che pachaꞌ ruqꞌabꞌ cheꞌ na jinta uchak, kachetik y kakꞌaq bꞌi. Kachaqij kꞌut, tekꞌuchiriꞌ kamolik y kaporox pa aqꞌ.

7 »Yey we e laꞌ xa jun iꞌanom riꞌix wukꞌ y na kikꞌow ta chikꞌuꞌx taq ri nukꞌutum chiwach, chitzꞌonoj kꞌu riꞌ saꞌ taq ri kiwaj y kayaꞌtaj na chiwe. 8 Ri Nuqaw lik kayakiꞌ uqꞌij echiriꞌ riꞌix kiya ukꞌiyal ijiqꞌobꞌalil y rukꞌ waꞌ kaqꞌalajinik pa saqil wi ix nutijoꞌn.

9 »Jekꞌulaꞌ pachaꞌ ri Nuqaw lik kꞌax kinunaꞌ riꞌin, jekꞌuriꞌlaꞌ riꞌin kꞌax kixinnaꞌ riꞌix. Lik kꞌut miwesaj iwibꞌ chupa ri rutzil nukꞌuꞌx chiwe. 10 We e kiꞌan janipa ri kixintaq che, kixkꞌojiꞌ kꞌu riꞌ chupa wa rutzil nukꞌuꞌx, jelaꞌ pachaꞌ riꞌin nuꞌanom janipa ri inutaqom ri Nuqaw che uꞌanik yey in kꞌo chupa ri rutzil ukꞌuꞌx Rire.

11 »Ximbꞌiꞌij waꞌ chiwe chaꞌ ri nukiꞌkotemal kakꞌojiꞌ iwukꞌ y kanoj kꞌu riꞌ ri iwanimaꞌ che kiꞌkotemal.

12 »Ekꞌu nutaqanik waꞌ kanya chiwe: Lik kꞌax chinaꞌa iwibꞌ chiwach jelaꞌ pachaꞌ riꞌin lik kꞌax kixinnaꞌo. 13 Na jinta juna kꞌutubꞌal re ri rutzil kꞌuꞌxaj más nim chwa waꞌ: E junoq kuya rukꞌaslem che utoꞌik jun chik tobꞌ ne kakam ruma.

14 »Riꞌix ix wamigos we e laꞌ e kiꞌan janipa ri kixintaq che uꞌanik. 15 Na kambꞌiꞌij ta chi ne “waj chak” chiwe, ma e juna aj chak na retaꞌam taj saꞌ ri kuꞌan ri rajaw. Kambꞌiꞌij kꞌu chiwe “ix wamigos”, ma nuyaꞌom chi retaꞌmaxik chiwe ronoje ri ubꞌiꞌim lo ri Nuqaw chwe. 16 Na ix ta xixchaꞌw we riꞌin, in ri xinchaꞌw iwe. Yey nuyaꞌom piqꞌabꞌ kiꞌana ri nuchak y jelaꞌ kiya ukꞌiyal ijiqꞌobꞌalil y waꞌ na jinta ukꞌisik. Yey janipa kꞌu ri kitzꞌonoj che ri Nuqaw pa ri nubꞌiꞌ, Rire kuya na chiwe. 17 Ekꞌu kixintaq che uꞌanik waꞌ: Kꞌax chinaꞌa iwibꞌ chiwach.

18 »We tzel kixkil ri winaq che ruwachulew, chiwetaꞌmaj e riꞌin ri nabꞌe tzel kinkilo. 19 We ta e laꞌ junam ribꞌinik riꞌix kukꞌ ri tikawex re ruwachulew, riꞌ lik kꞌax kixnaꞌik. Noꞌj in xinchaꞌw iwe riꞌix chikixoꞌl ri winaq; e uwariꞌche tzel kixilik. 20 Kꞌuna chikꞌuꞌx ri nubꞌiꞌim chiwe: Na jinta juna aj chak más kꞌo uwach chwa ri rajaw. We riꞌin internabꞌem rukꞌ kꞌaxkꞌobꞌik, jelaꞌ riꞌ kaꞌan chiwe riꞌix, kixternabꞌex rukꞌ kꞌaxkꞌobꞌik. Yey we e kꞌo ri kitaqem ri nutzij riꞌin, jekꞌulaꞌ riꞌ, e kꞌo ri kakitaqej ri kikꞌut riꞌix. 21 Pero ri kixkiternabꞌej rukꞌ kꞌax ruma ikojom ri nubꞌiꞌ, e kakiꞌan waꞌ ruma na ketaꞌam ta uwach ri xintaqaw loq.

22 »We tamaji xinkꞌun riꞌin y tamaji xinkꞌut rutzij ri Nuqaw chikiwach, na jinta kꞌu kimak riꞌ ruma na xkikꞌul ta wa tzij. Noꞌj riꞌin xinkꞌunik y xinkꞌut rutzij ri Nuqaw chikiwach; ruma kꞌu waꞌ, na jinta junoq chike utz kubꞌiꞌij na jinta umak. 23 Ma e ri tzel kebꞌilow we riꞌin, riꞌ e tzel kakil ri Nuqaw. 24 Na jinta kꞌu kimak we tamaji nuꞌanom ukꞌiyal milagros chikiwach yey waꞌ na jinta chi ne junoq ꞌanayom re. Noꞌj rike kilom ronoje taq waꞌ; y na rukꞌ ta kꞌu riꞌ, tzel kinkil riꞌin y tzel kakil ri Nuqaw.

25 »Ekꞌu xuꞌan taq waꞌ chaꞌ lik e kuꞌana janipa ri tzꞌibꞌital kan pa ri Tzij Pixabꞌ kꞌo pakiqꞌabꞌ rike:

26 »Yey echiriꞌ kinopon rukꞌ ri Nuqaw, kantaq lo Jun Toꞌbꞌel iwe re kunimarisaj ikꞌuꞌx. Rire kape rukꞌ ri Nuqaw y e Qꞌalajisanel re ri Qꞌijsaq. Ekꞌuchiriꞌ kakꞌunik, kaqꞌalajisan chiwach riꞌix panuwi riꞌin. 27 Yey riꞌix kixqꞌalajisan na panuwi riꞌin, ma ix kꞌojiꞌnaq wukꞌ chwi ri jeqebꞌal lo ri nuchak.