1 Ekꞌuchiriꞌ, jujun chike ri fariseos y raj kꞌutunel re ri tzijpixabꞌ e petinaq Jerusalem, xeqibꞌ rukꞌ ri Jesús y xkitzꞌonoj che:

2 —¿Suꞌchak ri tijoꞌn la kakipalajij ri kikꞌutuꞌn kan ri qatiꞌ-qamam? Ma rike na kakichꞌaj ta ri kiqꞌabꞌ nabꞌe na echiriꞌ kewaꞌik —xechaꞌ.

3 Ekꞌu ri Jesús xutzꞌonoj chike:

—¿Suꞌchak ralaq kapalajij alaq Rutzij Upixabꞌ ri Dios ruma e kaꞌan alaq taq ri kikꞌutuꞌn kan ri mam alaq? 4 Ma ri Dios jewaꞌ xtaqan che:

5 »Noꞌj ralaq kabꞌiꞌij alaq: “Utz we junoq kubꞌiꞌij chike ruchu-uqaw: Na utz taj kantoꞌ alaq, ma ri toꞌbꞌal kajawax che alaq, nubꞌiꞌtisim chik re nuqasaꞌn chwach ri Dios.” 6 Yey chiwach ralaq, china ri kabꞌiꞌn re waꞌ, na chirajawaxik ta chi che kebꞌutoꞌ ruchu-uqaw. Jekꞌulaꞌ ꞌanom alaq che Rutzij Upixabꞌ ri Dios pachaꞌ na jinta uchak, ma e taqem alaq ri xa noꞌjibꞌal alaq.

7 »¡Xa kebꞌ palaj alaq! Lik kꞌu qatzij ri ubꞌiꞌim lo ri Dios pawiꞌ alaq ruma ri qꞌalajisanel Isaías, echiriꞌ xubꞌiꞌij:

10 Ekꞌuchiriꞌ, xebꞌusikꞌij rukꞌiyal winaq y xubꞌiꞌij chike:

—Lik tape alaq y lik maja alaq usukꞌ waꞌ: 11 Ri kok bꞌi puchiꞌ ri tikawex na e ta ri kachꞌulan re; noꞌj ri chꞌaꞌtem kel lo puchiꞌ, e waꞌ ri kachꞌulan re —xchaꞌ.

12 E taq kꞌu rutijoꞌn xeqibꞌ rukꞌ y xkibꞌiꞌij che:

—Qajawal, ¿xetaꞌmaj la lik xpe koyowal ri fariseos echiriꞌ xkita ri xbꞌiꞌij la? —xechaꞌ.

13 Ri Jesús xukꞌul uwach:

—Waꞌ waꞌchijabꞌ na jinta runaꞌoj ri Dios kukꞌ, pachaꞌ e tikoꞌn na e ta tikom ruma ri Nuqaw kꞌo chilaꞌ chikaj; ruma kꞌu riꞌ, kamichꞌ bꞌi kꞌa pa ratzꞌayaq. 14 Mixok il chike, ma rike pachaꞌ e potzꞌ e kꞌamal kiwach kach e potzꞌ. Yey we juna potzꞌ kukꞌam uwach juna chik potzꞌ, kikabꞌichal kꞌu riꞌ kebꞌeꞌtzaq bꞌi pa siwan —xchaꞌ.

15 Ekꞌuchiriꞌ, ri Pedro xubꞌiꞌij che ri Jesús:

—Qꞌalajisaj la chiqe saꞌ keꞌelawi wa jun kꞌambꞌal naꞌoj —xchaꞌ.

16 Xubꞌiꞌij kꞌu ri Jesús chike:

—¿Ix nebꞌa kukꞌil ri na jinta kinaꞌoj puwi waꞌ? 17 ¿Na kimaj ta nebꞌa usukꞌ? Ma e janipa ri kok bꞌi puchiꞌ ri tikawex keꞌek pa rupa y tekꞌuchiriꞌ, kuꞌpamaj bꞌi. 18 Noꞌj ri chꞌaꞌtem kel lo puchiꞌ, pa ranimaꞌ kawinaqir wuloq y ekꞌu waꞌ ri kachꞌulan re ri tikawex. 19 Ma pa ranimaꞌ ri tikawex kel wi lo taq waꞌ: ritzel naꞌoj, ri kamisanik, ri makunik chirij ri kꞌulanikil, ri karetzꞌabꞌej uwa uqꞌij rukꞌ jun chik na ukꞌulel taj, ri eleqꞌ, ri raqꞌubꞌal y ri itzel chꞌaꞌtem chirij junoq. 20 E taq waꞌ ri kachꞌulan ke ri tikawex. Noꞌj ri kawaꞌ junoq yey na kuchꞌaj ta ruqꞌabꞌ nabꞌe, waꞌ na kuchꞌulaj ta rubꞌinik junoq —xchaꞌ.

21 Ri Jesús xel bꞌi chiriꞌ y xopon pa taq ri luwar re Tiro y re Sidón. 22 Kꞌo kꞌu jun ixoq aj Canaán jeqel chiriꞌ, rire kasikꞌinik xkꞌun chwach ri Jesús, jewaꞌ kubꞌiꞌij:

—¡Wajawal, lal ri Ralkꞌoꞌal kan ri rey David, chinjuchꞌ kaꞌn ko cheꞌla! Ma kꞌo jun walit lik kꞌax ukꞌulumam ruma kꞌo puqꞌabꞌ jun itzel uxlabꞌixel —xchaꞌ.

23 Noꞌj ri Jesús na xukꞌul ta kꞌana uwach. Ekꞌu rutijoꞌn xeqibꞌ rukꞌ y lik xebꞌelaj che ri Jesús:

—Chꞌaꞌbꞌej kan la liꞌxoq ma lik kasikꞌinik teran lo chiqij —xechaꞌ.

24 Ekꞌuchiriꞌ, xubꞌiꞌij ri Jesús:

—Riꞌin intaqom lo xew kuma rutinamit ri Dios e aj Israel, ri pachaꞌ e bꞌexex e sachinaq —xchaꞌ.

25 Noꞌj rixoq xqibꞌ rukꞌ ri Jesús, xuxuk ribꞌ chwach y xubꞌiꞌij che:

—¡Wajawal, chintoꞌo ko la! —xchaꞌ.

26 Ri Jesús xubꞌiꞌij che:

—Na usukꞌ taj we kꞌo junoq kumaj ri kiwa ri ralkꞌoꞌal y kukꞌaq chikiwa ri tzꞌiꞌ —xchaꞌ.

27 Xubꞌiꞌij kꞌu rixoq:

—Qatzij, Wajawal, pero ri tzꞌiꞌ kakitij ne rukꞌaj ri wa katzaq chuxeꞌ rumexa ri kajaw —xchaꞌ.

28 Ekꞌuchiriꞌ, xubꞌiꞌij ri Jesús che:

—¡Ixoq, lik nim ri kubꞌulibꞌal kꞌuꞌx la! E chuꞌana ukꞌ la saꞌ ri kaꞌaj la —xchaꞌ. Chupa kꞌu riꞌ la joqꞌotaj ri ralit xkunutajik.

29 Ri Jesús xel bꞌi chiriꞌ y xikꞌow chuchiꞌ ri mar re Galilea; tekꞌuchiriꞌ, xaqꞌan chwa ri juyubꞌ y xtzꞌuyiꞌik. 30 Ukꞌiyal kꞌu winaq xebꞌopon chilaꞌ pa kꞌo wi Rire. Yey xekikꞌam lo ri e sik, ri e potzꞌ, ri e meꞌt, ri e tꞌum kaqan kiqꞌabꞌ y ukꞌiyal yewaꞌibꞌ chik. Xekiya kꞌu chwach ri Jesús, y Rire xebꞌukunaj konoje. 31 Ekꞌu ri winaq lik xkam kanimaꞌ che echiriꞌ xkilo xechꞌaw ri e meꞌt, ri e tꞌum kaqan kiqꞌabꞌ kekunutajik, ri e sik kebꞌinik, ri e potzꞌ ketzuꞌnik. Y xkijeq kꞌu kakiyak uqꞌij ri Dios re Israel.

32 Ekꞌuchiriꞌ, ri Jesús xebꞌusikꞌij rutijoꞌn y xubꞌiꞌij chike:

—Lik kajuchꞌ kaꞌn nukꞌuꞌx chike wa tikawex, ma e urox qꞌij waꞌ e kꞌo wukꞌ yey na jinta chi kiwa. Na kuaj taj kebꞌenutaq bꞌi chikocho e laꞌ na jinta kꞌo kitijom, ma kꞌaxtaj kebꞌeꞌqꞌochqꞌobꞌ pa bꞌe —xchaꞌ.

33 Xkibꞌiꞌij kꞌu rutijoꞌn che:

—¿Pa keꞌqariqa wi wa re kebꞌeqatzuq wa ukꞌiyal tikawex? Ma chupa wa luwar na jinta ne kꞌo e jeqelik —xechaꞌ.

34 Ri Jesús xutzꞌonoj chike:

—¿Janipa chi pam kꞌo iwukꞌ? —xchaꞌ.

Rike xkibꞌiꞌij:

—Wuqubꞌ pam kꞌo qukꞌ y jujun raltaq ko kar —xechaꞌ.

35 Ekꞌuchiriꞌ, ri Jesús xtaqan che ketzꞌuyiꞌ ri tikawex chuꞌlew. 36 Xukꞌam kꞌu ri wuqubꞌ pam puqꞌabꞌ rukꞌ taq ri kar, y xtioxin chwach ri Dios puwi waꞌ. Tekꞌuchiriꞌ xuwechꞌ upa y xuya bꞌi chike rutijoꞌn yey rike xkijach chike ri winaq. 37 Konoje xewaꞌik y lik xenoj chi utz. Tekꞌuchiriꞌ, rukꞌ taq ruqax ri waꞌim xkimolo, xkinojisaj wuqubꞌ chakach. 38 Ri xewaꞌik e kajibꞌ mil chi achijabꞌ yey na xebꞌajilax tane rixoqibꞌ y rakꞌalabꞌ.

39 Ekꞌuchiriꞌ, ri Jesús xebꞌuchꞌaꞌbꞌej kan ri winaq; xok bꞌi pa jun barco y xeꞌek pa taq ri luwar re Magdala.