1 Echiriꞌ xel bꞌi ri Jesús pa ri Rocho Dios, jun chike rutijoꞌn jewaꞌ xubꞌiꞌij che:

—Qajawal, ¡chilape la wa chomilaj taq abꞌaj y wa nimaq taq ja re ri Rocho Dios!* “Ri nimaq taq ja re ri Rocho Dios”: Ri sitio pa kꞌo wi ri Rocho Dios sutum rij rukꞌ tapia re nimaꞌq taq abꞌaj yey kꞌo corredor che ruqꞌabꞌ ri tapia y chunikꞌajal ri sitio kꞌo jun chomilaj ja kebꞌ upa. —xchaꞌ.

2 Ri Jesús xukꞌul uwach:

—¿Kawil waꞌ wa nimaq taq ja? Wara na kakanaj ta kan juna abꞌaj chwi juna chik, ma ronoje kawulixik —xchaꞌ.

3 Ri Jesús xtzꞌuyiꞌ chwa ri juyubꞌ Olivos, ri kꞌo chwach pana ri Rocho Dios. Ekꞌu ri Pedro, ri Jacobo, ri Juan y ri Andrés, xa kitukel xkitzꞌonoj che:

4 —Bꞌiꞌij ko la chiqe, ¿jampa nawi kuꞌana taq riꞌ waꞌ? ¿Yey saꞌ ri kꞌutubꞌal kilitajik echiriꞌ kuꞌanaꞌ? —xechaꞌ.

5 Ekꞌu ri Jesús xujeq ubꞌiꞌxikil chike:

«Lik chichajij iwibꞌ chaꞌ na jinta junoq kasokow iweꞌix. 6 Ma lik e kꞌi ri tikawex kekꞌunik y xa kakichiqꞌimaj uwach ri nubꞌiꞌ, jewaꞌ kakibꞌiꞌij: “In ri Cristo, Ruchaꞌoꞌn lo ri Dios”* Mt. 24:2-3 kechaꞌ. Y lik e kꞌi ri kesokotaj kuma rike.

7 »Ekꞌuchiriꞌ kito kꞌo chꞌaꞌoj jewaꞌ y kꞌo chꞌaꞌoj jelaꞌ, mixiꞌij iwibꞌ che; ma lik chirajawaxik wi kuꞌana taq waꞌ. Noꞌj na e ta waꞌ ri kꞌisbꞌal re ruwachulew. 8 Ma e kꞌo tinamit keyaktaj chikij jujun chik tinamit y e kꞌo taqanelabꞌ keyaktaj chikij jujun chik taqanelabꞌ. Kuꞌan taq kabꞌraqan che ukꞌiyal luwar, kape taq numik y ri winaq kakijeqo lik ketukukik. Ronoje waꞌ xa e jeqebꞌal re ri kꞌaxkꞌobꞌik kakꞌunik.

9 »Lik chichajij kꞌu iwibꞌ, ma kixkꞌam bꞌi pa taq qꞌatbꞌal tzij y kajichꞌ ne ipa chupa taq ri sinagogas. Y ruma kꞌu ikojom ri nubꞌiꞌ, kixkꞌam bꞌi chikiwach ri taqanelabꞌ y chikiwach ri reyes, chaꞌ jelaꞌ kiqꞌalajisaj ri Utzilaj Tzij chikiwach. 10 Lik kꞌut chirajawaxik nabꞌe na katzijox ri Utzilaj Tzij chike konoje rukꞌiyal kiwach taq ri tikawex e kꞌo che ruwachulew. 11 Yey echiriꞌ kixkꞌam bꞌi re kixeꞌyoꞌq pa taq qꞌatbꞌal tzij, mubꞌisoj ikꞌuꞌx y michꞌobꞌ nenareꞌ saꞌ ri kibꞌiꞌij. Riꞌix xew chibꞌiꞌij janipa ri kuya ri Dios chiwe chupa ri ora, ma na ix ta ri kixchꞌawik, e ri Santowilaj Ruxlabꞌixel ri Dios.

12 »E taq kꞌu ri tikawex kekiya ri katz-kichaqꞌ pa kamik; ri kꞌo kalkꞌoꞌal kekiya taq ri kalkꞌoꞌal pa kamik; ri e alkꞌoꞌal keyaktaj chikij kichu-kiqaw y kekikamisaj. 13 Lik kꞌut tzel kixil kuma taq ri winaq ruma ikojom ri nubꞌiꞌ. Pero china kꞌu ri kuchuqꞌubꞌej ribꞌ chwach taq waꞌ wa kꞌaxkꞌobꞌik kꞌa chupa ri kꞌisbꞌal re, e riꞌ ri kakolobꞌetajik.

14 »Echiriꞌ riꞌix kiwil ri lik chꞌul y lik kꞌixbꞌal uwach kayaꞌ pa ri luwar pa lik na taqal ta wi, jelaꞌ pachaꞌ ri xutzꞌibꞌaj kan ri qꞌalajisanel Daniel* Dn. 9:27; 11:31; 12:11 (china kꞌu ri kajilan re waꞌ, chumaja usukꞌ); ekꞌuchiriꞌ, ri e kꞌo pa taq ri luwar re Judea, chebꞌanimaj ubꞌi chwa taq ri juyubꞌ. 15 China kꞌu ri kꞌo lo chwi ri rocho,† Ruwi ri kocho raj Israel ojertan taqꞌaj uwiꞌ yey waꞌ kuriq uchak re anabꞌal oración, re kiwaꞌbꞌal y re kiwarabꞌal chaqꞌabꞌ echiriꞌ lik kabꞌukbꞌutik. maqaj ne lo che ukꞌamik bꞌi ubꞌitaq re pa ja. 16 Yey china ri kꞌo lo pa juyubꞌ, matzelej lo che ukꞌamik bꞌi ruqꞌuꞌ re pisbꞌal rij.

17 »Chupa taq kꞌu laꞌ la qꞌij, lik toqꞌoꞌ kiwach ri e yewaꞌ ixoqibꞌ y ri ketzꞌumtisanik. 18 Lik kꞌu chitzꞌonoj che ri Dios chaꞌ echiriꞌ kixanimaj bꞌi na e ta uqꞌijol echiriꞌ kꞌax tew y kꞌo jabꞌ. 19 Ma taq laꞌ la qꞌij re unimal kꞌaxkꞌolil, na uꞌanom ta kꞌana julajoq chwi lo echiriꞌ ri Dios xuꞌan ruwachulew y na kuꞌana ta chi ne kꞌana julajoq. 20 We ta ri Qaqaw Dios na kuqꞌatij ta taq laꞌ la qꞌij re runimal kꞌaxkꞌobꞌik, riꞌ na jinta junoq kakꞌasiꞌ kanoq; noꞌj ruma kꞌu kꞌax kebꞌunaꞌ ri ebꞌuchaꞌom, kuqꞌatij ruqꞌijol waꞌ.

21 »We kꞌo kꞌu junoq kabꞌiꞌn chiwe: “¡Chiwilapeꞌ, wara kꞌo wi ri Cristo!” o “¡Chiwilapeꞌ, leꞌ kꞌolik!”, mixok il che. 22 Ma kekꞌun ri kakiꞌan “Cristo” che kibꞌ y ri kakiꞌan e qꞌalajisanelabꞌ re ri Dios che kibꞌ, pero xa e sokosoꞌnel. Ekꞌu rike kakiꞌan nimaq taq kꞌutubꞌal y milagros re kesokosoꞌn rukꞌ, yey kꞌo ne pa saq kesokotaj jujun chike ri ebꞌuchaꞌom ri Dios. 23 Lik kꞌu chichajij iwibꞌ, ma ximbꞌiꞌij ronoje waꞌ chiwe riꞌix echiriꞌ kꞌamajaꞌ ne kuꞌanaꞌ.

24 »Ekꞌuchiriꞌ ikꞌowinaq chi ri kꞌaxkꞌobꞌik che taq laꞌ laꞌ qꞌij, kuꞌan qꞌequꞌm uwach riꞌ ri qꞌij, y ri ikꞌ na kuya ta chi ruwonibꞌal. 25 Ri chꞌumil ketzaq lo che ruwa kaj, y konoje ri kꞌo kichuqꞌabꞌ che ruwa kaj keyikiyoꞌxik. 26 Ekꞌuchiriꞌ, kilitaj Ralaxel Chikixoꞌl Tikawex kakꞌun lo pa sutzꞌ rukꞌ runimal uchuqꞌabꞌ y rukꞌ runimal uchomalil.* Dn. 7:13; Ap. 1:7 27 Kebꞌutaq kꞌu ru ángeles che umolik kichiꞌ konoje ri ebꞌuchaꞌom ri Dios pa taq ronoje luwar che rukajchal rajlibꞌal ruwachulew.‡ “Rukajchal rajlibꞌal ruwachulew”: Waꞌ keꞌelawi pa norte, pa sur, pa relebꞌal qꞌij y putzaqibꞌal qꞌij. Kujeq kꞌu riꞌ che jun luwar, yey kukꞌisbꞌej che jun chik.

28 »E chimaja ri jun kꞌambꞌal naꞌoj puwi ri cheꞌ re higo: Echiriꞌ kujeq katux lo kꞌakꞌ uqꞌabꞌ y kujeq kꞌut katux ruxaq, ruma kꞌu laꞌ kiwetaꞌmaj xa naqaj chi kꞌo wi lo ruqꞌijol echiriꞌ kabꞌukbꞌutik y na jinta jabꞌ.§ “Ruqꞌijol echiriꞌ kabꞌukbꞌutik y na jinta jabꞌ”: Kil “verano” pa vocabulario. 29 Jekꞌuriꞌlaꞌ riꞌix, echiriꞌ kiwilo kuꞌana ronoje taq waꞌ, chiwetaꞌmaj kꞌu riꞌ xa naqaj chi kꞌo wi lo ruqꞌijol rukꞌunibꞌal Ralaxel Chikixoꞌl Tikawex. 30 Paqatzij wi kambꞌiꞌij chiwe: E kꞌo tikawex re waꞌ wa qꞌij na kekam tana we na xkil tubꞌi ronoje waꞌ. 31 Ruwa kaj y ruwachulew xa kasach uwach, noꞌj taq ri nuchꞌaꞌtem na kasach ta uwach.

32 »Ekꞌu chwi ruqꞌijol y ruꞌorayil waꞌ, na jinta junoq etaꞌmayom re; na ketaꞌam tane ri ángeles e kꞌo chilaꞌ chikaj, na retaꞌam tane ri Kꞌajolaxel, ma xew ri Qaqaw Dios etaꞌmayom re.

33 »Chiwila kꞌu riꞌ, mawar iwach y lik chiꞌana orar, ma na iwetaꞌam taj jampalaꞌ kopon ruqꞌijol waꞌ. 34 Ri kuꞌanaꞌ e pachaꞌ echiriꞌ juna achi keꞌek naj. Ekꞌuchiriꞌ keꞌek, kuya kan ri rocho pakiqꞌabꞌ ri raj chakibꞌ y chikijujunal waꞌ kuya kan kichak. Kubꞌiꞌij kꞌu kan che ri chajinel re ri puerta: “Lik matkos che uchajixik ri ja” kachaꞌ. 35 Jekꞌuriꞌlaꞌ riꞌix, lik mawar iwach, ma na iwetaꞌam taj jampalaꞌ kakꞌun lo ri rajaw ja; laj echiriꞌ kok raqꞌabꞌ, laj pa tikꞌil aqꞌabꞌ, laj pa nabꞌe uchꞌawibꞌal ri teren o echiriꞌ kel lo ri qꞌij. 36 Mawar kꞌu iwach riꞌ, chaꞌ we xaqikꞌateꞌt xkꞌun lo ri Iwajaw, na kixuriq taj kixwarik. 37 Ekꞌu wa kambꞌiꞌij riꞌin chiwe riꞌix, kambꞌiꞌij chike konoje: Lik mawar iwach» xcha ri Jesús.