1 Uchiru, wi akupamurun unuiniajme nu kajinmatsuk tuke nintimin ukusta. 2 Nuka timiatrusmek umirkumka, nukap musach pengker nintimsam pujusam warastinuitme. 3 Tura nekas chicham ainauka tura wait anengkrataisha pengkej inaisaip. Antsu aints ainau shaak nungkurtinua nunismek kajinmatsuk nintinam nintimsam pujusta. 4 Nu turakminka Yuscha aminka pengker nintimturmastinuitai, tura aints ainausha nunisarang amin pengker nintimturmasartinuitai. 5 Ami Apuram Yus tuke nintimaurmijai nintimtusta. Antsu amek: Wikia nintipitjai, tuuka nintimtumasaip. 6 Ame warí turame nuka Apuram nintimsam turata. Nu turakminkia ni jinti nekas tupin aa nuna inakturmastatui. 7 Wikia mash nekajai. Witsukaitja chikich ainaun nangkamasnak timia nekauna tuuka nintimtumasaip. Antsu Apuram pengker awajsata, tura tunausha inaisata. ✡ Rom 12.16 8 Nuka tsuwakan nangkamasang pengkeraitai. Tu pujakmeka namangkem

kakamtikratnuitme. 9 Kuik juwame nuka tuu ajanmaya araka juwame nusha akankam Yus tuke susata.

10 Nu turakmeka ajanmaya juuktatme nuka nukap yujartinuitai. Tura amutirmesha amukashtinuitai.

11-12 Uchiru, aints ni uchirin aneau asa, pengke aints ati tusa, wait wajaktinun susatnuitai. Tura asamtai,

uchiru, Apuram amin anenmau asa, wait wajaktinun suramsamtaisha nuka nakitraip. ✡ Heb 12.5-6; Ap 3.19

13-14 Nekatniuka kuikian nangkamasang pengkeraitai, tura paan nintimratniuka kurin nangkamasang iin yainmaktinuitji. Aints paan nintimratniunka tura nekaatniunka juwawa nuka nekas warastinuitai.

15 Paan nintimratnuka kaya nekas akik aina nuna nangkamasang paan nintimratniuka timiá wakerumaintia. Tura asamtai nuna nangkamaska timiá pengkerka atsawai. 16 Apurka paan nintimratnunka nukap suramji.

Nunia nukap musach pujustinun, tura yuumatsuk pujustinun, turasha iin pengker awajtamsatniurincha suramji. 17 Nujaingkia angkan nekas pengker pujusminuitji.

18 Paan nintimratin iin pujurtamatinkia, tuke iwiaaku pujustinuitji. Tura nekasar warastinuitji.

19 Ii Apuri Yuska ni nekatairijaingkia ningki nintimias nungkancha, tura nayaimpincha najanamiayi. ✡ Gén 1.1 20 Tura nekas timiá nekau asa: Yakiya yumi nungkaya entsajai akankamu ati tusa

akankamiayi. Tura yumin tura sanancha akupkamiayi. ✡ Gén 1.6-7

21 Uchiru, paan nintimram nintip wajasta. Kame, pengker aa nu jiisam, tura tunausha jiisam,

warí pengkeraita tura warí pengkerchawaita tusam nintimrata. 22 Tu pujakmeka nekas pengker

pujustinuitme, tura aints ainau amin waitmakar: “Nuka nintipitai” tusar, aints shaakun nungkurar

wekainawa nunisarang amin waitmakartinuitai. 23 Tura asamtai pengker nintimsam jintanam

angkan wekasatnuitme, turasha tukumkayatmek ayaarchatnuitme. 24 Tura kanakmesha shamkashtinuitme, tura sapijmiatsuk pengker kanurtinuitme. 25 Tura aneachmau itiurchat akungka, tura tunau aints

ainaun Yus wait wajaktinun akupkamtaikia, ameka shamkashtinuitme. 26 Nu kintia jeamtaikia,

itiurchatnum iyaaraim tusa Apuram: Shamkaip tusa waitmaktinuitai.

27 Aints ainau yuminamtaikia, ame yaingmin akumka, wait anentakum pachitsuk yaingta.

28 Tura ami irutkamuram yuminamtaikia, yamaik takakumka: Kashin winita, turakminka susamjinam

tutsuk, yamaik susata. 29 Amijai patas puja nuna pasen awajsataj tuuka nintimraip.

¿Nuka amin pengker nintimturmas pujatsuash? 30 Aints amin pase awajtamtsuk pujamtaikia,

ameka nangkami nijai maanitsuk asata. 31 Pase aints wainkam: Wikia nijai metek kuikiartin wajasan, kakaram wajastasan wakerajai, tusam suwirpiaku nintimtusaip. Turasha ni tura nunasha

turatasan wakerajai tuuka nintimtusaip. 32 Ii Apuri pase nintintin ainaun nakitawai. Antsu pengker nintintin ainaun ni amikria nunisang pengker awajui. 33 Pase aints ainaun ni weari ainaujai ii Apuri kajerawai. Antsu pengker aints ainaun pengker awajui. 34 Wishikiartin ainaunka ii Apurisha wishikratnuitai. Antsu jampechu ainaun wait anentratnuitai. 35 Paan nintintin ainauka pengker

awajsamu ainawai. Antsu netse ainauka natsanpiaku asaramtai, jiitnasha nakitin ainawai.