1 Umuti kariau aina nuna aints ainau uminakka, nampekar pase chichau ainawai.

Nunia natsamchau ainawai. Aints nampek pujakka, paanka nintimrachminuitai.

2 Aintsu apuri kajetiringkia juun yawaa shaamai chichaawa nunisketai.

Tura asamtai niin kajkartin ainauka mantamawai tusar shamkartin ainawai.

3 Aints jiyaanitan nakitinauka nekasar pengker nintimsar pujuinawai.

Antsu netse ainauka pachitsuk chikich ainaun jiyaktasar wakerinawai.

4 Nakia nuka takakmastin ayat takakmatsui. Nunia ukunam juuktaj takusha pengké wainkashtinuitai.

5 Aintsu nintimtairingkia entsa timiá kunanam iruna tumawaitai.

Tumau wainiatang aints nintip: ¿Itiur nintimua? tusa nekaatnuitai.

6 Aints untsuri chichainak: Amin ajapanka pengké ukukchatatjame nangkamiar tinawai.

Antsu nekas chichaman chichainaunka ¿yáki wainkamnawaita?

7 Aints tunaarinchau nekas pengker pujakka ni uchiri ainaun waramtiksatnuitai.

8 Aintsu apuri ni aintsri tunaarin nekaatas apu ekemtainam ekemas pujus,

nu aintsun aya jimiaj pujus ni tunaurin nekaatnuitai.

9 Wikia pengké tunaarinchawaitjai. ¿Wina nintirka tunau nekas atsawai tusa, anangtsuk yáki titinuita?

10 Meram nekapmatai tura esanti nekapkesha metekchau aina nunaka Apu Yus tsuutawai.

11 Uchi umiu tura pengker nintiniuka yáki tusar ni turamurijai paan nekamawartin ainawai.

12 Aintsu kuwishin antutirin tura jiijai jiimtairincha Apu Yus mai metek najankauwitai.

13 Aya karap wajasaip. Tu pujakmeka yuumaktatme. Antsu shintaram takakmakmeka yuumakchatnuitme.

14 Warinchu sumin warinchun jiis chichaak: Nuka pengké paseetai tayat,

nunia majachik sumak ukuki: Maj, nekasan nintipitjai tumamui.

15 Kuri nekas akikaitai. Tura kaya akiksha sumakmin ainawai. Antsu paan nintimin ainauka jumchik irunui. Nu aints ainauka kurin nangkamasarang tura kaya akikian nangkamasarang timiá pengker ainawai.

16 Aints nekashtai tumashmamtai, chikich aints: Wi akimiatkatatjai tamataikia, nuna wejmakri aitkam jurukim ukusta. Tura nekashtai tumashrin akimiatkamtaikia, wejmakrinka ataksha susata. ✡ Prov 6.1-5

17 Anangkartin chikich aintsun anangka yutan majachikjai sumak nuna yuwak:

Nuka nekas yuminuitai tayat, ukunam nungka tsetserin apakua nunisketai.

18 Aints ainau ni nintimauringkia itiur aina tusar aujnaisar, chichaman najanawartin ainawai.

Turinau asaramtai aints ainau mesetnum wetasar, nunaa eemkar ni nintimaurin pachisar

chichainak, mesetnasha najanawartin ainawai.

19 Aujmakratniuka chikicha chichamen uurkashtinuitai.

Tura asamtai aujmakratin ainaujaingkia tsaningkaip.

20 Aints aparin tura nukurincha numingkia nuka ukunam kirit teenam pujuinawa nunisang jakatnuitai.

21 Aints ainau kakarmachu kuikian irumina nuka ukunmaka nu kuikiajaingkia wararsachartinuitai.

22 Nu aintska wina pase awajtusmiana nunaka wikia yapaijkiatatjai tiip.

Antsu Apu Yus turati tusam, jaimiasam nakasta. Ningki yapaijkiatnuitai. ✡ Rom 12.19

23 Meram nekapmatai metekchau ainaunka Apu Yus tsuutawai. Tura meram nekapmataijai

aints ainaun anangkinauncha arantak nakitawai. ✡ Prov 20.10

24 Apu Yus aints ainautin: Ju jinta amakrum wekaasataram turamji. Tura asamtai aints ningki nintimias:

Wikia ju jintan amakan wekaasatjai tayat, Yus tsangkatachmataikia pengké turachminuitai. ✡ Sal 37.23-24

25 Aints tenap nintimtsuk: Yusjai tajai: Juka Yusnau ati tayat, nunia wake nintimiar.

Yusnau achati ta nuka itiurkachminum pujustinuitai.

26 Aints ainau trigon juukar jingkiajincha tura saapencha akankartas su su umpuinawa nunisang

aintsu apuri nekauka pase aints ainaun arák akupkatnuitai. ✡ Luc 3.17

27 Apu Yus aintsun ni wakanin susau asamtai, nuka aintsu paaniurintai. Tura asa aintsu wakani

ni nintimauri pengker arti tusa pengker awajsatnuitai.

28 Aintsu apuri nekas chichaman aneak, wait anengkratin asa, ni aintsri ainaun tuke pengker inartinuitai.

29 Natsa ainau kakaram asar, wikia warimpitja tumaminawai.

Tura juuntach ainausha nekainau asar, wikia jemperinuitjai tumamainawai.

30 Pase ainau pengker wajasarat tusar awatinamtaikia, nuka tsuaka nunisketai. Tura asamtai ni tunaarin nintimrarti tusar awatratnuitai.