1 Aints chikich aintsun chicharak: Tunaarum inaisata tusa nukap chicharmaitiat,

nu aintska antutsuk, tunaun inaitsuk turakka, aneachmau mengkakatnuitai.

2 Pengker nintintin ainau ni yaktarin eemtikinamtaikia, aints ainau warainawai.

Antsu pase aints ainau chikich ainaun ínainamtaikia, chikich aints ainau wait wajainawai.

3 Natsa nekas paan nintimias pujakka, aparin waramtikui.

Antsu natsa kungkatpijai tsanias pujauka apari kuikiarin nangkami ajapui.

4 Inakratin ni aintsri ainaun nekas pengker inauka ni yaktarin eemtikiatnuitai.

Antsu chikich inakratniuka ni aintsri ainaun tuke: Akirkataram ta nuka ni yaktarin mesratnuitai.

5 Aints tuke nangkami anangkak chikich aintsun chicharak: Ameka pengke aintsuitme tauka

aints kuntinun achiktas ejatkan ejatua nunisketai.

6 Aintsu tunaari ainauka aints kuntinun achiktas ejatkan najanawarua nunisarang ainawai.

Antsu anangmichu ainauka pengker nintimsar warasartin ainawai.

7 Aints pengker nintintin ainauka kuikiartichu ainau yuumamurin nintimsar pujuinawai.

Antsu pase aints ainauka nunaka pengké pachinatsui.

8 Aints taetet awajsartin ainauka yaktanam pujuinaun itit awajsartin ainawai.

Tura paan nintimtin ainauka aints ainau kajernaiyamuri atsuti tusar pengker chichasartin ainawai.

9 Aints paan nintimniuka netse aintsjai chichaman nakuirtas chicham iwiaaratniunam weak, netseka niin wishiku pujamt kajerkatnuitai. Antsu nuniangka chichaman iwiaaratatkama pengké tujintawai.

10 Mangkartin aints ainauka aints anangmichun wainkar nukap kajerkatin ainawai.

11 Aints netseka pachitsuk ni wakeramurin najanui.

Antsu paan nintintin ainauka ni wakeramurin metatin ainawai.

12 Aintsu apuri wait chichaman pachitsuk anturak pujakka, ni inatiri ainaun mash pasemamtikiatnuitai.

13 Aints yamrumichun tura niin itit awajniuncha Apu Yuska mai metek ni jiijai ni turamurin jiisarti tusa najanamiayi. ✡ Prov 22.3; Mat 5.45

14 Inakratin kuikiartichu ainaun mash metek pengker awajua nuka tuke ni aintsri ainaun pengker inartinuitai.

15 Uchi ainaun paan nintimin arti tusar chicharkartinuitai. Tura chicharmasha antichu ainaunka awatrartinuitai. Tura waininayat uchi pachishtai ainauka nukurin inatsartin ainawai.

16 Pase aints ainau yujainamtaikia, tunausha nukap yujaawai.

Antsu anangmichu ainauka pase aints ainau mengkakatniurin wainkartin ainawai.

17 Uchiram chicharkumka amin pengker nintimtikramratnuitai. Turamtai ni jiisam warastinuitme.

18 Yuse chichame etserin atsamtaikia, aints ainau pachitsuk tunaun takainawai.

Antsu Yuse chichamen umirinauka nekasar pengker nintimsar pujuinawai.

19 Aints ni inatirinka aya chichasang nuiniarchatnuitai. Kame, antayatang umirkashtinuitai.

20 ¿Aints wárik chichaun wainukaitam? Kame, aints nintimchau ainauka

niin nangkamasarang nuimiartin ainawai. ✡ Prov 26.12

21 Aints ni inatirin uchichinak tsakatmaruka ukunam ni tsakatkaringkia ni wakeramurinak najanatnuitai.

22 Aints kajeuka tuke maaniktas wakerawai. Tura nu aintska tunaun nukap turatnuitai.

23 Aints ningki nintimtumasang: Miajuitjai taunka Yuska: Ameka mianchawaitme tawai.

Antsu aints: Mianchawaitjai tumamunka Yuska: Miajuitme tawai. ✡ Mat 23.12; Luc 14.11; 18.14

24 Aints kasa aintsjai tsanias wekaas kasamua nuka ninki wiasmamkatnuitai. Tura aints ainau niin chicharinak: Ame nekame nuka Yusjai tajai tusam etserkata tinamaitiat pengké etsertsui.

25 Aints ainaun shaminauka chingki ejatkanam achikmawa nunisarang ainawai.

Antsu Apu Yusen nintimratin ainauka ejamkaru ainawai.

26 Aints untsuri aya apurinak wait anentrurti tusar seainawai.

Antsu Apu Yusen seaina nuka angkan pujusartin ainawai.

27 Pengke aints ainauka pase aints ainaunka nakitinawai.

Tura pase aints ainauka anangmichu ainaunka nakitinawai.