1-2 Yus nungkan najanamiayi.

Tura juun entsancha tura

entsa kanaji ainauncha mash najanau asamtai,

mash Yus najanamu ainauka Yusnau ainawai.✡ 1 Cor 10.26

3 ¿Yuse murarin wakartin ainau warí aintsuk ainia? ¿Turasha ni jeen pengker aa nuni pujusartin ainia nusha warí aintsuk ainia?

4 Tunau takachu ainau,

tura tunau nintimchau ainia nu Yuse pujutirin wayaawartin ainawai.

Tura Yuschau waininayat,

chikich yusen seachu ainau,

tura nangkamiar anangminak:

Wikia nunaka turatatjai tichau ainauk Yuse pujutirin wayaawartin ainawai.✡ Sal 15.1-2

5 Nu aintsu Apuri ni Yusri asa,

tura ni uwemtikrau asa,

ni turamuri tu ainawai tusa nekawai.

Tura asa ni turamurijai metek pengker awajsatnuitai.

6 Jacobo Yusri ni Apuri asamtai,

niin eaina nuka tu pujusartin ainawai.

7 Tuke pujustinnum wayaatin waiti aa nuka uraitaram.

Tura nuka epenchamu tuke atin asamtai,

Inamin nekas pengker aa nuka wayaatnuitai.

8 ¿Nu Inamin nekas pengker aa nusha yaachita? Nuka iinu Yusri kakaram aa nuwaitai.

Nuka nekas iinu Yusrintai,

nangkinam we ni nemase ainaunka

shamchau aa nuwaitai.

9 Tuke pujustinnum wayaatin waiti aa nuka uraitaram.

Tura nuka epenchamu tuke atin asamtai,

Inamin nekas pengker aa nuka wayaatnuitai.

10 ¿Nu Inamin nekas pengker aa nusha yaachita? Ii Apuri timiá kakaram aa nuwaitai.

Inamin nekas pengker aa nuwaitai.✡ Ap 21.10-27