1 Wina nintirjai tuke Yus pengkeraitai titatjai.

Yusru ameketme juuntam.

Ameketme kakarmam.

2 Ameka paantin asam,

tarachia tumau nayaimpisha najanawaitme.✡ 1 Tim 6.16

3-4 Ameka entsa ainausha najanawaitme.

Tura mukuntiunam wekainuitme.

Tura nase najanau asam,

tuke nase akupnuitme.✡ Heb 1.7

5 Ameka nungka pengké muchikchati tusam metamiame.

6 Tura juun entsa timiá kuna asa,

nungkan netkati tusam,

ame tsangkamkamiame.

Tura asakmin juun entsaka murancha netkamiayi.

7 Tura wainiatum ameka juun entsa kuyuati tusam chicharkamiame.

Tura asakmin juun entsaka ami chichammin ipiamta tumaun antuk wári kuyuamiayi.

8-9 Juun entsa kuyuamtai,

mura ainau tsapuiniarmiayi.

Tura juun entsaka ataksha nungkanka mashkia netchau ati tusam surimkau asakmin,

ataksha ni nangkaankatniurin kuyuamiayi.

10 Tura muranam pukuni ainia nu entsa arti tusam,

amek akupnuitme.

11 Tura pachim ainau yumin umurarat tusam,

entsa muranmasha tura paka nungkanmasha akupnuitme.

Pachim yupiram ainia nusha umurarmi tusam,

entsasha najanawaitme.

12-13 Nanamtin ainau entsa yantamen pujuinauka shiniinawai.

Yumi umurarat tusam mukuntiunmaya yumi akupnuitme.

Ameka mash najanau asam,

ni yutairisha suame.

14-15 Chirichri waaka ainau yuwaarat tusam najanawaitme.

Aints ainausha yutancha yuwaarti tusam,

ni yutairisha suame.

Tura yutai nereu ainau aints nungkanmaya uweniar yuwaarti tusam suame.

Nunia olivo macharijai ni namangken yakararti tusam suame.

Nunia ni yutairisha tuke suame.

Tura umutirincha umurarti tusam suame.✡ Sal 65.9-13

16 Numi ainau juun wajasarti tusam numpesha suame.

Kanu ainausha amek araawitme.

17 Nanamtin ainauka numinam pasungminawai.

18 Tura chipu yupiram ainau muranam yakí wekajinawai.

Chikich kuntin ainausha waanam matsatinawai.

19 Aints ainau nantun nekaawarti tusam,

nantusha najanamiame.

Tura tsaasha ame najanamu asa,

kintajai metek jeawai.✡ Gén 1.14-18

20 Ame tee ati tama tee wajawai.

Pachim ainau tura kuntin ainausha kashisha wekainawai.

21 Juun yawaa ainau ni uchiri yutairincha eatinawai.

Turinamtai Yus ni yutairincha suawai.

22 Tura tsawaarmatai ataksha waanam wayaawar tepeenawai.

23 Aints ainau tsawaarar jeanmaya jiinkiar,

ni takatrin takakmasartas weenawai.

Nunia kiarai waketkiar,

ataksha ni jeen waketinawai.

24 Yusru ami takatrum timiá untsurintai.

Ame nekamtairumjai mash najanawaitme.

Ame najanamu asar mash nungkanam yujainawai.

25 Juun entsasha sarmaitai.

Nuni namak juuncha tura tuupchisha yujainawai.

26 Nuni kanu juunnum aints engkemawar wekainawai.

Apuupsha nuni wekainawai.

27 Ame mash yujaina nuna yutairisha suame.

28 Ame suam ni yutairincha juwinawai.

Ame uwejem yapaarakmin tutuarar pujuinawai.

29 Ame yuta suachmaka wake mesekar pujuinawai.

Ame mayatairisha juramka,

aints ainausha jakar ataksha nungka tsetseri najanartin ainawai.

30 Ame ni mayatairi suamu asar,

ataksha nungkanam yujarmi tusar pujuinawai.

31 Yuse kakarmari tuke nangkankashtinuitai.

Ni takatri ainaujai Yuska waraawai.

32 Yus uurkat tama nungkaka muchiawai.

Tura muran takasamtai,

mukunit jiinui.

33 Tura asamtai Yusen tuke nintimsan kantamatajai.

Iwiaaku pujaknaka Yusrun Salmon kantamruatatjai.✡ Sal 146.2

34 Wikia Yusrun tuke pengker nintimtusan pujajai.

Tura Yusnum tuke warastinuitjai.

35 Tunaarintin ju nungkanam matsatinau mengkakartin ainawai.

Tura Yusen umirtan nakitinausha mash mengkakartin ainawai.

Antsu wikia tuke nintirjai Yus pengkerapita tura Yus juuntapita titatjai.