1 ¡Ii Apuri warartusmi! Ii Yusri kantamruatnuka nekas shiirmaitai.

Tura ii Yusri warartustinka nekas pengkeraitai.

2 Ii Apuri ni yaktarin Jerusalén tutain ataksha jeamkarti tusa,

ni aintsri ainautin kakamtikramji.

Tura Israela weari ainautin atu atu chikich nungkanam akuptamramiaji nunaka ataksha itarmimiaji.

3 Tura napchau nintimsar pujuinauncha ataksha pengker nintimtikratnuitai.

Tura katsumkamu ainauncha tsuwartinuitai.

4 Yuska yaa ainausha warutmak ainia tusa nekawai,

tura kichik kichik yaa ainauncha naarin inaiyawai.

5 Ii Yusringkia juuntaitai,

tura kakarmaitai.

Tura asamtai ni nintimauringkia nekaachminuitji.

6 Wikia mianchawaitjai tumamin ainaunka ii Apuringkia inankitnuitai.

Antsu pasé aints ainaunka tuke inatsartinuitai.✡ Sal 145.14

7 Ii Apuri maaketai tusaram kanta kantamruataram.

Tura ii Yusri warartakrum kitarrjai kanta tuntuyataram.

8 Yuska nayaimpinam mukunit ati tusa akupawai.

Tura yumi jiturti tusa umiawai.

Tura muranam chirichri tsakarti tusa tsapamtikui.

9 Kuntin ainauncha Yus yurui.

Tura kantserkapi uchiri juutinamtaisha Yus yurui.

10 Kawai ainausha tura aints ainausha ni kakarmarijaingkia Yusnaka pengkerka awajinatsui.

11 Antsu niin umirin ainauka tura ni anengkratairin nintimsar pujuinauka Yusnaka pengker awajinawai.

12 Jerusalénnum pujuinautiram,

ii Apuri warartustaram.

13 Ni wakerau asamtai,

atum shamtsuk pengker nintimtusrum pujuyarme.

Tura asakrumin atumi uchiri ainauncha Yus pengker awajsamiayi.

14 Atumi nungkari pengker nintimsaram angkan pujustaram tusa,

Yus atumin pengker awajtamrume.

Tura yutancha pengkeran atumin suramrume.

15 Ningki ni chichamenka nungkanam akupawai.

Turamtai ni chichamengka wári mash nungka ainamunam jeawai.

16 Yuscha michan yukuuya tumaun nungkanam akupawai.

17 Tura kaya tumau micha yakiiya kakeerarti tusa akupawai.

Turasha entsa waininayat,

aints ainau nungkanam wekajina nunisarang katingkiarti tusa,

entsanka pisu najanui.

18 Antsu ni chichamen akupak:

Entsa pisu amia nu ataksha yumi ati tusa najanui.

Tura nasen tsuweran akupak:

Entsa ataksha wej wajati tusa najanui.

19 Yus ni chichamen Jacobo weari ainaun nekamtikiamiayi.

Tura ni umirkatin chichamnaka Israela weari ainau umirkarti tusa akupkamiayi.

20 Antsu chikich nungkanmaya ainaunka ni chichamenka nekamtikiachmiayi.

Tura asamtai ni umirkatin chichamnaka pengké nekaacharmiayi.✡ Rom 1.16; 2.10-13

¡Ii Apuri warartusmi!