1 Ibinigi da Isak inuꞌ Yakop ba da ifinti da ifai nan gin, “Agu anungꞌ uda sagat Kanan mangan u. 2 Wauriꞌ da wafa rinanggam ramanggan Betuel gampan mingꞌa intap Mesopotemia, da wau gayanggam Laban narunggan finam mangan. 3 Anutu Nampang Wain Tsiraꞌ nafinti agu da nautus i u yanginggam nasu garam wain wain ampi bingan. 4 Anutu narim nam fintidan da agu da gam yanginggam nabi nam fintidan ragada mungꞌ da Abraham ugu. Da intap aru Anutu riman da Abraham ugu da u mpada suda marawampua gin ani nasu agamam.” 5 Isak ini ibinigi sib da itangin Yakop ifa Mesopotemia da Laban, Betuel garam Aram ugu narunggan. Laban igi Yakop da Isau rinanggan Rebeka nafunggan.

6 Da Isau iringant i nan ibi Isak irim nan fintidan sib da Yakop da itangin arangan ifa Mesopotemia i uda sagat mingꞌa nigi, da ipaꞌ arangan i anungꞌ uda sagat Kanan mangan u. 7 Da Isau iringant ibi Yakop yatangꞌ warangꞌ i ramanggan da rinanggan nan gan da ifa Mesopotemia sib. 8 Gubuꞌ arigi da Isau uwayantan ipuꞌ i ramanggan Isak buginda sagat Kanan igi. 9 Ibinigi da Isau ifan da Ismail, Abraham narunggan marub ugu, da itip iyu Ismail narunggan Mahalat, Nebaiot nafunggan finam, impruꞌ da finin rusan iruꞌ ugu.

10 Yakop itangin gamp Birsiba rai da ifa i waꞌa gamp Haran. 11 Gubuꞌ arangan waꞌa mumai furis wasaꞌ mangan da igingꞌ igi, i gubuꞌ iruꞌ sib. Arangan iyu tauf maragangaf da yis gudzun gin isu unubin da igingꞌ marampruꞌ. 12 Da arangan ipuafub da itsangan antim guntiꞌ bingan wain mingꞌa intap da buntun fawaꞌa gunungun, da itsangan Anutu angira gan ruꞌan da yaban. 13 Da itsangan Yawe muntida wagungꞌ gin da nidan, “Dzi Yawe, u rumpunggam Abraham da ramanggam Isak Anutu gan. Intap aru u gingꞌa gin igi, Dzi bungꞌ arim da agu da yangin rusam. 14 U yanginggam bungꞌ awaꞌ nasangꞌ intap ngaruntsuaf, da bungꞌ ampa nadzarang nafa gubuꞌ yaban da gubuꞌ ruꞌan da dzraꞌ da fiꞌ. Mingꞌa agu da yangin rusam da garam intap utup utup santan bungꞌ ayu nam fintidan. 15 Da waringantin, dzi bungꞌ arut agu da nampa tayangꞌ agu i sanab idzuwai u fada gin, da dzi bungꞌ atip nau agu naba intap aruani. Dzi bungꞌ anang nam sib angu dzi nidan da tagadan da agu nasu nidzun, da dzi wasangꞌ i tanginda agu rai u.”

16 Yakop maran itaꞌ da ini i wangunggan, “Nan nidzun bingan, Yawe impai ani, da dzi wasruꞌ gin u.” 17 Arangan irat da ini binaꞌ, “Mumai aruani inang dzi rat funub angu. Mumai aruani isu Anutu ungaran da gunungun muantsi nifunggan.”

18 Pisa tataꞌ maratait da Yakop iyu tauf suda unub in ugu da yantungꞌ iyab isu nam maran rufuran. Da iyats madamin iyabin i santingꞌa bida Anutu mumai gan mararam igi. 19 Yakop ifaringꞌ mumai arigi binganggan Betel— wainggan Anutu ungaran. Garam mpada nigi mungꞌ ifaringꞌ gamp igi binganggan Luts. 20 Yakop itsaf ruan nidzun angu da Yawe ini binaꞌ, “Anutu, bida u ruta dzi da mpada tayangꞌ dzi bini i sanab guntiꞌ dzi nida fada gin da u rima nam gadan da ngarukui da dzi, 21 da bida dzi ba tipa waꞌa ramanggangꞌ gampan ngarubini da nigi da agu Yawe bungꞌ asu dzi Anutu gangꞌ. 22 Da tauf aru dzi antungꞌan ani naraga mumai aruani nasu U Anutu ungaram tsarifa Agu gin. Da nam santan u riman da dzi— dzi bungꞌ afab nasangꞌ 10, da narim 10 igi gan bits da agu.”