1 Yakop iringant i Laban narun rusan nan gan nida yaba i arangan bida ani, “Yakop iyu agi ramanggangꞌ nanggan santan da isu garam nidzun i nam bunump tsiraꞌ.” 2 Yakop itsangan Laban uwayantan yitam i ruan da maran anungꞌ yari i arangan ibi miamun ugu u. 3 Da Yawe ini da Yakop ibiani, “Watip wafa rumpum rusam da utupam gampan. Da Dzi bungꞌ arut agu.”

4 Ibinigi da Yakop irim sisingꞌ da Retsel da Lia i badan da arangan mingꞌa arangan mpada tayangꞌ apu gan gin. 5 Rib iruꞌ igi ibawaꞌ da arangan ini da ribarangan ibiani, “Dzi tsanga agam ramanggam uwayantan nanga yaba i dzi da aruani wabi aru mungꞌ arangan tida nangan ugu u, da bitsintaꞌ dzi ramanggangꞌ Anutu gan rurut dzi. 6 Agam itsanga dzi gumangꞌ uwats uwats tsiraꞌ nanga yaba i agam ramanggam sib wa, 7 da bitsintaꞌ arangan iti ini nan umpur da dzi da nifu-nan gan iyuꞌan ampi bingan isangꞌ 10 i nam bunump riman da dzi. Da bitsintaꞌ Anutu imunti sib i arangan i anungꞌ ngaungꞌa dzi u. 8 Bida arangan nidan, ‘Apu rinin puatpuatagin nasu u nanggam,’ da apu santan irim narun puatpuatagin isangꞌ ruan. Da bida arangan nidan, ‘Apu umpuar taringꞌan nasu u nanggam,’ da apu santan irim narun umpuar taringꞌan isangꞌ ruan santan. 9 I sanab bida nigi da Anutu iyu agam ramanggam nuning da dumpa gan sinungꞌ da irim da dzi.

10 “Mingꞌa nuning arapuꞌ da rinan gubuꞌ gan yaba i ruan, da dzi tsanga nam puafuban mangan i nuning arapuꞌ rinin umpuar taringꞌan da puatpuatagin angu yaba i nuning rinan. 11 Mingꞌa nam puafuban igi da Anutu angira gan*31:11 Anutu angira gan: Watsanga 16:7. ini da dzi ibiani, ‘Yakop.’ Da dzi ni, ‘Dzi rumpai.’ 12 Da angira ini binaꞌ, ‘Watsangan nuning arapuꞌ rinin umpuar da puatpuatagin runggan angu iyab i rinan. Dzi nang ibinigi, i wain ibiani, dzi tsangan nam santan Laban nanga yaba i agu sib wa. 13 Dzi Anutu aru waꞌan da agu mingꞌa Betel, mumai u antungꞌa tauf da yatsa madamin gin†31:13 mumai u antungꞌa tauf da yatsa madamin gin: Watsanga 28:18. da tagada ruam i tsarifa dzi runtaꞌ angu gin ugu. Wauriꞌ da watangin gamp ani rai sung angu da watip wafa gampam wain.’ ”

14 Retsel da Lia iringant i nan igi da ini binaꞌ, “Aga binganggangꞌ mangan wamingꞌ impruꞌ da aga ramanggangꞌ i nam bunumpan mangan u. 15 Ramangꞌ inang agai ibi rib marawampua. Arangan itangin agai da agu da iyu nam bunump in da iga nam bunumpan arangan santan sib. 16 Da nam bunump santan Anutu uda sinungꞌ arangan isu agi da narungꞌ rusangꞌ nanggangꞌ rururungan. Da wanang nam nabi Anutu nidan da agu.”

17 Ibinigi da Yakop itangin narun rusan da finin rusan iyab kamir, 18 da itsuts i apu gan santan uda mingꞌa Mesopotemia i fada da ramanggan Isak i gan gampan Kanan. 19 Da gubuꞌ ribarangan nanga i fadan da Laban ifa sib i trapa dumpa gan rinifufun da Retsel iwap mugus maraganun mingꞌa ramanggan ungaran sib. 20 Yakop irim umpur i Laban, garam Aram, da idzigin nan gin da irunt ifa gan arun. 21 Arangan iyu nam bunumpan santan da irunt, yis mpui Yufretis udziꞌ ifa marafain da iyung ifa i waꞌa intap mamai Giliat.

22 Gubuꞌ suda iruꞌ da bits da Laban iyu sisingꞌ ibi Yakop irunt an arun. 23 Laban iyu gan utupan da irunt yatsungꞌ Yakop isangꞌ gubuꞌ 7 da iwaꞌ da arangan mingꞌa intap mamai Giliat. 24 Da Anutu iwaꞌ da Laban (garam Aram) da idziang i nam puafuban da ini da arangan ibiani, “Watsanga runggam sib i nan gam nidan da Yakop.” 25 Yakop irut utupan yari ungar impai imingꞌ mamai Giliat, da gubuꞌ arigi da Laban irut utupan iba tsangan da impa marafain.

26 Da Laban ifan da Yakop da ini, “Wain idzuwai da u rim umpur i dzi da u yu dzi narungꞌ rusangꞌ finam ani iba ibi sagat wapan mingꞌa wasaꞌ i nam isan? 27 Ibi anungꞌ da u kup angu i dzi da u runt iba? U madani da dzi da dzi dasu nam gadan da aga dangump nam da datangin agam rai ruta nam nugun tsiaꞌan. 28 U runt asub da dzi watsutsuf rumpungꞌ rusangꞌ da narungꞌ rusangꞌ mangan u. U nang uwayant maisan bingan. 29 Dzi sangꞌ i wayada agam, da bitsintaꞌ idziang ugu da u ramanggam Anutu gan ini da dzi ibiani, ‘Watsanga runggam sib i nan gam nidan da Yakop.’ 30 Dzi sruꞌgin ibi u maram ifur iyus i tipa fada gam gampam wain da u tangin dzi rai. Da bitsintaꞌ wain idzuwai da u wap dzi mugusangꞌ maraganun sib?”

31 Da Yakop ini da Laban, “Dzi rat i u bungꞌ ayu narum rusam finam iruꞌ ani sinungꞌ dzi, ibinigi da dzi kup i agu da dzi runt iba. 32 Da bida u tsanganda aga mangan uda u mugusam da arangan namamp. Mingꞌa agi utupangꞌ maranggan, da waba sau gam nanggam da wau.” Da bitsintaꞌ Yakop wasruꞌgin ibi Retsel iwap ramanggan mugusan u. 33 Ibinigi da Laban yatangꞌ Yakop ungaran apu rini gangan da isau. Nigi ntsup sib da yatangꞌ Lia ungaran da inang ibinigi. Arangan inang ibinigi angu i sagat gum iruꞌrun impruꞌ, da bitsintaꞌ wawaꞌ da mugusan igi u. Ntsupa ungar igi sib da yatangꞌ Retsel ungaran. 34 Retsel iyu ramanggan mugus maraganun da ifarangꞌ iruꞌ nam rima yaba kamir barun i garam gar mpada gin da impa ragun gin. Laban inguar i nam sib angu imingꞌ ungar wasaꞌ da wawaꞌ rutin u. 35 Retsel ini da ramanggan ini binaꞌ, “Ramangꞌ, dzi gaib runggangꞌ da agu i dzi wasangꞌ i muntida yaba u maranggam u. I dzi yu ukam.” Ibinigi da Laban inguar i nam bunump santan da wawaꞌ da gan mugus maraganun mangan u.

36 Yakop nugun iruaꞌ nidzun angu i Laban da impiꞌ ini binaꞌ, “Dzi nang nam idzuwai asub? Nam maisan idzuwai dzi nang da u daru dzi ibi garam asub? 37 U nguar i dzi nanggangꞌ santan da u waꞌ da nanggam idzuwai? Warim namingꞌ wasaꞌ i u ribam da dzi ribangꞌ maran da ribarangan natsangan i mangan nan gan isu nidzun, dzi ma agu. 38 Dzi nang gum i agu isangꞌ udzuf 20 aruani. Dzi mpa tayangꞌ u dumpa gam da nuning gam ngarubini bingan angu da sib angu irim narun bini. Da dzi waga dumpa arapuꞌ mangan imingꞌ u gin u. Imaꞌ angu. 39 U apu gam idzuwai apu buman ma garam wapan da gubuꞌ ma idziang, da u rim riringꞌ da dzi i dzi rima mungaꞌ gan. Ibinigi da gubuꞌ apu buman garada dumpa ma nuning funub, da dzi wayu iba santingꞌ agu gin u; imaꞌ. Dzi runggangꞌ irim mungaꞌ i nigi. 40 Dzi gumangꞌ ibinigi: gubuꞌ igauf dzi funub da idziang rangarang gan idadaum dzi da dzi sau marampruꞌ gingꞌan. 41 Udzuf 20 dzi ruta agu mpadan ugu ibiani: dzi nang gum i agu isangꞌ udzuf 14 i uda u narum rusam finam iruꞌ ani da dzi nang gum i agu isangꞌ udzuf 6 i uda apu mingꞌa agu gin. Da u iyuꞌ iyuꞌ dzi i u nifunggam nidan isangꞌ 10 i nam bunumpangꞌ da u anungꞌ irim rururungan. 42 Da bida dzi rumpunggangꞌ Abraham da ramanggangꞌ Isak Anutu gan aru garam rata gin damami ruta dzi, da u madawat dzi rai dafa bangi sasaꞌ angu. Da bitsintaꞌ Anutu irarab dzi gumangꞌ uwats uwats da dzi banginggangꞌ tanginda ruꞌan, ibinigi da idziang ugu Anutu ini u uwayantam maisan u nanga yaba i dzi ugu wasi da agu.”

43 Ibinigi da Laban ini Yakop nan gan mungaꞌ ibiani, “Sagat iruꞌ igi isu dzi narungꞌ rusangꞌ. Da narun rusan isu dzi gangꞌ, da apu igi isu dzi apu gangꞌ. Watsangan! Nam santan aru u udan igi isu dzi nanggangꞌ. Da bitsintaꞌ dzi nanang nabi anungꞌ i dzi narungꞌ rusangꞌ finam iruꞌ igi da narun rusan? 44 Da agi naudzu nan da nanang nam mangan namunti wasaꞌ i agu da dzi i agi marangꞌ rufura nan udzudan igi.”

45 Ibinigi da Yakop iyu tauf guntiꞌ mangan da yantungꞌ imunti isu dubung. 46 Da ini da gayan rusan impruꞌ ini binaꞌ, “Agam wafura i tauf ba da wantungꞌ wampruꞌ da ruan nasu marabuntup.” Ibinigi da ribarangan iyufum tauf isu marabuntup sib da impruꞌ ruan impai uts da tauf ufuman igi da iga nam iyab i nam udzudan igi. 47 Laban ifaringꞌ tauf ufuman igi binganggan Yegar Sahaduta, da Yakop ifaringꞌ ini Galid.‡31:47 Bingan Yegar Sahaduta mingꞌa nan Aramaik da bingan Galid mingꞌa nan Hibru wainggan bitsintaꞌ ‘marabuntup i rima maran furan’.

48 Da Laban ini, “Tauf ufuman ani isu ampap i rima maran furan i nan udzudan muntida wasaꞌ i agu da dzi da aruani da fadan.” I wain igi da Yakop ifaringꞌ ini Galid. 49 Da itip ifaringꞌ i binganggan mangan Mitspa (wainggan ibi mumai mingꞌa wasaꞌ tsanganda mungaꞌ da mungꞌa sib), i Laban ini, “Gubuꞌ agi tanginda ruangꞌ rai da Yawe namunti wasaꞌ i agu da dzi da natsanga agi ragun i agi anungꞌ atupa nan gangꞌ udzudan ani sib u. 50 Da bida u nanga dzi narungꞌ rusangꞌ finam ani nanggan mpadan maisa wasi ma u tipa uda sagat faꞌ mpruꞌan da garam maꞌan i tsangandan da mamida barima sisingꞌ da dzi da maram wafur, Anutu imunti wasaꞌ da irarab agi sib.” 51 Laban ini da Yakop impruꞌ ibiani, “Watsangan tauf guntiꞌ rung muntidan ani da tauf dzi ufuman suda marabuntup mpruꞌan mingꞌa wasaꞌ i agi iruꞌ ani. 52 Tauf guntiꞌ da tauf marabuntup ani isu nam maran furan nan utusa i ruan gin. Dzi wasangꞌ atupa ampap tauf ani sib i wayada agu u, da agu anungꞌ atupa tauf ani sib bada marafain i wayada dzi u. 53 Abraham da Nahor da ramanggan Tera Anutu gan bungꞌ amunti wasaꞌ i raruda agu da dzi bida agi manga runta asub.”

Ibinigi da Yakop itsarif ruan da Laban i ramanggan Isak Anutu gan binganggan aru rib rata nidzun angu gin ugu. 54 Da itsara apu da Anutu imingꞌ mamai igi da inuꞌ gayan rusan iba da irut impruꞌ ruan iga nam. Gada nam sib da ribarangan santan igingꞌ nigi. 55 Pisa tataꞌ mangan nigi da Laban itsutsuf rumpun rusan da narun rusan finam iruꞌ igi da ifinti ribarangan. Da arangan itip ifa gampan.