1 Da Anutu ini da Yakop ibiani, “Wauriꞌ da watip wafa gamp Betel da wampai nigi da warim mumai mararam tsarada nam in da dzi Anutu aru waꞌan da agu da gubuꞌ u runta sinungꞌ rainggam Isau badan ugu.”

2 Yakop iringant i Anutu nan gan igi da ini da utupan da riban ruta mpadan ibiani, “Agam santan watiri gam mugus maraganun gam udan ugu rai da wayiꞌ mpui da watip runggam bini da watsuf ngarukui gam sapan. 3 Ida agi bungꞌ ayab gamp Betel, da dzi bungꞌ arim mumai mararam tsarada nam in da Anutu aru nanga dzi nan gangꞌ udagin suda nidzun. Arangan irim dzi sib da gubuꞌ dzi waꞌan da barabin ugu, da impa tayangꞌ dzi i sanab santan aru dzi fada gin ugu.”

4 Ibinigi da ribarangan santan itapu mugus maraganun santan impruꞌ da nam arida i ringan da irim da Yakop. Da Yakop iraf ntsuf in imingꞌ gai tsiraꞌ wain mingꞌa Sekem da idzufungꞌ sib. 5 Da Yakop irut ampan gan itumuangꞌ nanggan santan da ifan. Da Anutu itangin nam ratan tsiraꞌ ibuafir gamp santan mingꞌa uts da ribarangan fadan da manga wadaru u. 6 Yakop da ampan gan santan igi ibawaꞌ gamp Luts mingꞌa intap Kanan. Luts igi gamp Betel binganggan ratar. 7 Mingꞌan nigi da arangan yantungꞌ tauf isu mumai mararam tsarada nam in da ifaringꞌ mumai arigi bingan ibi El Betel (wainggan ibi Anutu Mpada Betel), i Anutu iwaꞌ da Yakop imingꞌ arigi da gubuꞌ arangan runta sinungꞌ rainggan badan. 8 Gubuꞌ aru ribarangan mpadan nigi da Debora, Rebeka sagatan mpada tayangꞌ gin, imamp da ribarangan irim arangan imingꞌ gai tsiraꞌ wain imingꞌ Betel. Ibinigi da ifaringꞌ gai igi binganggan “Gai Singisiang.”

9 Da Yakop tanginda Mesopotemia rai da tipa fada intap Kanan sib, da Anutu itip iwaꞌ da arangan imingꞌ nigi da ifinti arangan. 10 Da ini da arangan ibiani, “U binganggam Yakop. Da aruani da wasangꞌ i rungꞌ tipa faringꞌa u binganggam Yakop u; bungꞌ afaringꞌ u binganggam faꞌ Israil.” Ibinigi da Anutu ifaringꞌ arangan binganggan Israil. 11 Da Anutu ini da arangan, “Dzi Anutu Nampang Wain ini da agu ibiani, warim narum ruas nautus i ruan nawaꞌ nasisungꞌ nabinigi. Mingꞌa agu da garam wain wain da king ruas bungꞌ awaꞌ nabinigi. 12 Da intap dzi riman da u rumpunggam Abraham da ramanggan Isak aruani isu agu gam. Hai, aruani da dzi rima da agu, da bungꞌ asu u tafanggam taptap yangin rusan nanggan.” 13 Da Anutu itangin arangan rai i mumai aru Anutu ruta arangan nidan nan da ruan gin ugu da ifan. 14 Yakop yantungꞌ tauf guntiꞌ mangan imingꞌ mumai Anutu nida nan da arangan gin ugu da iyats wain da madamin ragun gin isu ampap santingꞌa mumai mararam tsarifa Anutu gin. 15 Da Yakop ifaringꞌ mumai Anutu ruta nida nan da ruan gin igi binganggan Betel— Anutu ungaran.

16 Yakop irut utupan itangin Betel rai da iyung ifan i waꞌa gamp Efrata. Rungꞌ yunga fadan da Retsel gubuꞌ gan nanga i apingꞌan iwaꞌ da ipriꞌ da nam tsakia tsiraꞌ bingan iyus. 17 Da arangan rima narun ruta nam tsakia tsiraꞌ da gan sagatan rima sib ini da arangan ini binaꞌ, “U anungꞌ ratan u, i u rim marub mangan.” 18 Da gubuꞌ Retsel ntafa gin i mampan da ifaringꞌ mamaꞌ mitan igi binganggan Benoni (wainggan ibi mamaꞌ uda tsakia gin). Da bitsintaꞌ ramanggan Yakop ifaringꞌ i binganggan Benyamin (wainggan ibi mamaꞌ gifa gamp). 19 Ibinigi da Retsel imamp da irim i sanab fada Efrata (gamp Betlehem binganggan ratar). 20 Mingꞌa Retsel ntsufan rima gin da Yakop iraꞌ i tauf guntiꞌ mangan da intang iruꞌ isu ampap i santingꞌa Retsel ntsufan gingꞌa gin. Da tauf igi rungꞌ imunti da aruani.

21 Israil yuriꞌ da ifan da iyus ungar guntiꞌ tsanganda dumpa sib nida Eder gin ba da yari ungaran iruꞌ. 22 Gubuꞌ Israil rungꞌ mpada mingꞌa nigi da Ruben yatangꞌ da irut ramanggan sagat guman Bilha igingꞌ da Israil iringantin.

27 Yakop ibawaꞌ da ramanggan Isak i gamp Mamri, mingꞌa uts da gamp Kiriat Arba (bingan mangan Hibron) aru Abraham da Isak mpada gin ugu. 28 Isak impai udzufan isangꞌ 180, 29 da ifufi nidzun bingan angu da arangan imamp. Da narun rusan Isau da Yakop irim arangan.