1-3 Farisai ruas iringantin ibi Yisu riban ruruban da atsungꞌa gin iyus Yowanis riban ruruban da atsungꞌa gin. Da bitsintaꞌ Yisu runggan anungꞌ irurub garam u; riban atsungꞌa gin angu irurub garam. Gubuꞌ Yisu sruꞌa gin bida Farisai ruas ringanta i nan igi, da itangin intap Yudia rai da irut riban ifa intap Galili. 4 Da sanab Arangan yunga gin igi irunt wasaꞌ i intap Samaria.

5 Ibinigi da Arangan ibawaꞌ intap Samaria gampan mangan nida Sikar gin, imingꞌ uts angu da intap Yakop yutan da narunggan Yosef. 6 Da Yakop mpui gan rafan imingꞌ igi. Yisu ibawaꞌ da impa iruꞌ uts da mpui rafan ringan i rinin iraraiꞌ nidzun angu i sanab guntiꞌ yunga badan. Da gubuꞌ impa wasaꞌ sib ibi 12 kilok. 7 Da sagat Samaria bits iba i ranguda mpui, da Yisu ini da arangan, “Sagat i, isangꞌ i u rima mpui da dzi numan?” 8 I Arangan riban atsungꞌa gin ifa sib gamp igi i uda nam gadan.

9 Ibinigi da sagat Samaria ini da Arangan ibiani, “Ai! U garam Yuda da dzi sagat Samaria. Ibi anungꞌ da u gut i dzi i mpui i numan?” (I rib Yuda ipaꞌ ruan i ruta rib Samaria mpruꞌa ruan.)

10 Yisu ini arangan nifunggan mungaꞌ ini binaꞌ, “Dabi u dasruꞌ i Anutu maraampi gan da u dafaringꞌ garam guta i agu i mpui, da u madagut Arangan da madarim mpui maran taꞌan da agu.”

11 Da bitsintaꞌ sagat igi ini rutin ibiani, “Garam tsiraꞌ, mpui rafan ani warangꞌ bingan, da u wayu nam mangan i finuꞌa mpui gin u! Ibinigi da agu bu-uda mpui maran taꞌan igi i nanungꞌ? 12 Agi tafanggangꞌ Yakop irim mpui rafan ani da agai ramangꞌ rusangꞌ, da arangan runggan irut narun rusan da apu gan impruꞌ ruan numan. Mani agu mayus arangan?”

13 Yisu ini arangan nan gan mungaꞌ ibiani, “Garam numa mpui rafan ani da wan bungꞌ atip atsaraꞌ, 14 da bitsintaꞌ manga numa mpui dzi riman da arangan, da wan anungꞌ isangꞌ i tipa tsaraꞌan u. Da mpui dzi riman bungꞌ asu mpui maran mingꞌa wasaꞌ i arangan da bungꞌ afringfring da narim nam mpada maran taꞌan ntingan angu.”

15 Da sagat igi ini da Arangan, “Garam tsiraꞌ! Warim mpui igi da dzi, i dzi wangꞌ anungꞌ tipa tsaraꞌan da tida bada ani i finuꞌa mpui u.”

16 Yisu ini da arangan ibiani, “Wafan da wanuꞌ gabunggam da warut waba.”

17 Sagat igi ini Arangan nifunggan mungaꞌ ibiani, “Dzi gabunggangꞌ imaꞌ.”

Yisu ini da arangan ibiani, “U ni nan nidzun bingan i u gabunggam imaꞌ. 18 Da bitsintaꞌ mungꞌ, da u su gabum 5 sib, da aruani da garam aru agu ruta mpadan igi wasu u gabunggam nidzun u, imaꞌ. Nan u nidan igi nan nidzun.”

19 Sagat arangan ini da Yisu ini binaꞌ, “Garam tsiraꞌ, dzi tsangan ibi agu profet mangan. 20 Aga tafangꞌ rusangꞌ da agai ibinigi impruꞌ ruangꞌ imingꞌ mamai igi i pumuꞌa Anutu, da bitsintaꞌ agam rib Yuda ini mumai pumuꞌa Anutu gin da imingꞌ Yerusalem angu.”

21 Yisu ini da arangan, “Sagat ai, wamuaruts dzi nan gangꞌ. Gubuꞌ mangan bungꞌ abawaꞌ da agam wasangꞌ pumuꞌa Ramangꞌ Anutu mingꞌa mamai ani ma gamp Yerusalem aga angu u. 22 Agam rib Samaria ipumuꞌ mangan aru agam mamida i sruꞌa gin, da aga rib Yuda ipumuꞌ aru aga sruꞌa gin, i Anutu nanggan rima garam sib iwaꞌ imingꞌ garam Yuda gin. 23 Da bitsintaꞌ gubuꞌ mangan isu uts i waꞌan da ibawaꞌ sib da arani, da garam pumuꞌa nidzun bungꞌ apumuꞌ Ramangꞌ Anutu i Marapayam rini urun gan da nan nidzun, i Ramangꞌ isau garam bida nigi i pumuꞌa Arangan. 24 Anutu igi Marapayam, da garam pumuꞌa Arangan napumuꞌ Arangan i Marapayam rini urun gan da nan nidzun.”

25 Sagat arangan ini da Yisu ibiani, “Dzi sruꞌ i Mesia bungꞌ aba” (faringꞌa Kristus gin, Garam Anutu Ragadan ugu). “Gubuꞌ Arangan bawaꞌan, da bungꞌ aragi nam santan angu wasi da agai.”

26 Da Yisu ini da arangan ibiani, “Dzi Arangan Aruani* Dzi Arangan Aruani —Mingꞌa nifu nan Grik da nan ani isangꞌ nan “Dzi Mpa Ibi Arigi Angu” mingꞌa Yowanis 8:24, 28, 58, da 13:19. Watsanga:Kis 3:14; Ywn 8:24,28,58; 13:19; 18:5,6,8. ini nan da agu.”

27 Gubuꞌ arigi angu da Arangan riban atsungꞌa gin itip ibawaꞌ da irunt fafun i tsanganda Yisu ruta sagat igi nida nan. Da bitsintaꞌ manga wagut i Arangan i nan bida ani, “U sau nam idzuwai?” ma “Wain idzuwai da u rut sagat igi ini nan?”

28 Sagat igi itangin gur mpui gan rai da itip ifa gamp da ini da rib gamp igi ibiani, 29 “Agam waba da watsangan garam kupisa dzi nanggangꞌ santan dzi nangan ugu wasi da dzi! Mani Kristus, Garam Anutu ragadan, arangan aga?” 30 Da ampan santan gamp igi iyung iwaꞌ ba i tsanganda Yisu.

31 Mingꞌa wasaꞌ i gubuꞌ maran arigi, da riban atsungꞌa gin irim udzungꞌ da ini da Arangan ini binaꞌ, “Rabai,† Rabai — Nan Rabai wainggan ibi Kidungwaga. waga nam.”

32 Da bitsintaꞌ Arangan ini da rib igi ibiani, “Dzi nanggangꞌ gadan rumingꞌ, da agam wasruꞌ gin u.”

33 Ibinigi da ribarangan ini da ruan ini binaꞌ, “Manga mayu nam gadan aba rutin, ma?”

34 Yisu ini da ribarangan ibiani, “Dzi nam gadan gangꞌ ani: atsungꞌa Anutu aru tanginda dzi badan ugu maranggan furan da ntsupa i gan guman. 35 Agam inang da ini ibiani, ‘Ukam iruꞌ da iruꞌ angu rungꞌ imingꞌ i fawaꞌa gubuꞌ gum atiꞌan.’ Aitsangan! Dzi ni nidan da agam, wataningꞌ da watsanga, nam muntida gum wasaꞌ aga isu nidzun sib i yunga gin. 36 Da aruani da garam yunga nam atiꞌan iyu nam ntsuman gan da yufum nam atiꞌan nidzun mpada maran taꞌan ntingan angu. Ibinigi da garam ntanga nam da garam yunga nam atiꞌan nagu ruan nugun tsiaꞌan. 37 I garam inang da ini biani, ‘Garam mangan intang da garam mangan iyung gin.’ Nan igi isu nidzun i sanab bida ani. 38 Dzi tangin agam ifan i yunga nam atiꞌan mingꞌa gum agam mamida nanga gum in, da agam iyung nam nidzun aru rib fain nanga gum uwatsuwats gin ugu.”

39 Ampan Samaria ampi bingan mpada gamp igi imuaruts Yisu i nan sagat igi nidan, “Arangan ikupis dzi nanggangꞌ santan dzi nangan ugu wasi da dzi.” 40 Da ribarangan iba da Arangan da yaga i ruta ribarangan mpadan, ibinigi da Yisu ifa mpa gamp igi isangꞌ gubuꞌ iruꞌrun. 41 Da rib ampi bingan fain imuaruts Yisu i nan Arangan fisa gin angu. 42 Da ini da sagat igi ibiani, “Aga anungꞌ imuaruts Arangan iyab i nan u nidan da agai angu u, imaꞌ. Aga muaruts iyab i nan aga runggangꞌ ringanta gin mingꞌa Arangan nifunggan nidan, da aga sruꞌgin ibi nan ani nan nidzun i Arangan garam aru rima garam intap sib.”

43 Gubuꞌ Yisu mpadan nigi gubuꞌ iruꞌrun sib, da Arangan itangin nigi rai da iyung ifa Galili. 44 Da mungꞌ da Arangan runggan ini binaꞌ, “Wasangꞌ tsarifa profet mangan mingꞌa gan gampan wain u.” Mt 13:57; Mk 6:4; Lk 4:24 45 Gubuꞌ Arangan fawaꞌa Galili, da garam gamp igi yis yaring gin, i ribarangan ibinigi ifa i gubuꞌ mararam tsiraꞌ Angira Atupa Sib mingꞌa Yerusalem da itsangan nam santan Arangan nangan mingꞌa nigi.

46 Yisu itip ifawaꞌ Kana, gamp isiꞌ mingꞌa Galili aru Arangan itama i mpui suda wain gurun gin ugu. Da king garam guman mangan narunggan igingꞌ rinin imingꞌ gamp Kapenaum. 47 Gubuꞌ arangan ringanta i Yisu mingꞌa Yudia bada Galili, da ifa aga Arangan i tipa ruta fada Kapenaum da nanga arangan narunggan rinin dauman, i wain ibi inang i mampan. 48 Yisu ini da arangan, “Bida agam mamida i tsanganda nam maran mangan santingꞌa Anutu nampanggan wasi, da agam wasangꞌ muarutsa dzi u.”

49 Da king garam guman itip yaga Arangan ini binaꞌ, “Garam tsira! Agi ruꞌa sung, i dzi maragab narunggangꞌ bungꞌ abumamp i!”

50 Yisu ini da arangan ibiani, “Wafan! U narunggam rinin idaum.” Da garam igi imuaruts nan Yisu nidan da ifan.

51 Aru arangan rungꞌ yunga sanab fadan da mamaꞌ guman fain iba tur arangan i sanab ruta nan bini bida ani, “U narunggam rinin idaum wa.” 52 Da arangan igut i tuas arangan i gubuꞌ maran idzuwai da narunggan rinin idaum, da ribarangan ini binaꞌ, “Nigi aru 1 kilok gubuꞌ wasaꞌ maiꞌ ugu da rinin sasusan itiri arangan rai.” 53 Da raman isruꞌ gin i gubuꞌ maran arigi angu da Yisu ini da arangan ibiani, “U narunggam rinin idaum.” Ibinigi da arangan irut riban santan imuaruts Yisu. 54 Gubuꞌ Yisu mingꞌa Yudia tipa bawaꞌa Galili, da inang nam maran mangan igi. Da isu nam maran mangan iruꞌrun Arangan nanga mingꞌa Galili.