1 “Dzi ni nan igi sib da agam i agam anungꞌ tanginda nanggam muarutsan rai u. 2 Rib igi bungꞌ apaꞌ agam rai nawaꞌ manaꞌ i ungar mpruꞌa ruan gin. Da gubuꞌ bungꞌ awaꞌ i manga nida isa agam funub da bungꞌ ani i runggan i arangan pumuꞌa Anutu i sanab bida nigi. 3 Rib igi bungꞌ anang nam bida nigi i agam, i wain wasruꞌ i Ramangꞌ ma dzi u. 4 Da bitsintaꞌ dzi ni nan igi da agam da aruani, i gubuꞌ nam igi bawaꞌan, da agam maram bungꞌ afur nan dzi nidan da agam ani.

“Dzi wani nan igi mungꞌ da agam u, i dzi rungꞌ irut agam impai. 5 Da bitsintaꞌ aruani da dzi bungꞌ atip afan da Ramangꞌ aru tanginda dzi badan ugu, da agamam bits wagut i dzi ibi, ‘U ni fada anungꞌ?’ 6 Da bitsintaꞌ agam wangum ibarabin iyus, i wain ibi dzi ni nan santan igi da agam. 7 Da bitsintaꞌ dzi ni nan nidzun bingan da agam! Dzi gangꞌ fadan ani bini i rima agam sib, i bida dzi mamida fadan da Marapayam aru rima agam sib wasangꞌ i badan u. Da bida dzi fadan da dzi bungꞌ atangin Arangan naba da agam. 8 Gubuꞌ Arangan badan, da bungꞌ asantingꞌ garam intap i gan nanggan maisan nangan wasi, da dzi sanabangꞌ rururungan, da Anutu nanggan raruda garam. 9 Arangan bungꞌ asantingꞌ ribarangan nanggan maisan wainggan wasi rutin nabi ribarangan anungꞌ imuaruts dzi u. 10 Da bungꞌ asantingꞌ ribarangan i dzi sanabangꞌ rururungan nabiani, dzi fadan da Ramangꞌ da agam anungꞌ isangꞌ i tipa tsanganda dzi u. 11 Da bungꞌ asantingꞌ ribarangan nabi Anutu bungꞌ araru garam intap, i Anutu iraru garam intap gudzunggan sib wa.

12 “Nan ampi bingan rumingꞌ i dzi nidan da agam, da bitsintaꞌ agam wasangꞌ i buaringꞌa nan igi barabin gan da aruani u. 13 Gubuꞌ Marapayam nan nidzun badan da bungꞌ asantingꞌ nan nidzun santan wasi da agam. Arangan anungꞌ isangꞌ i nida nan i rugan uwayantan; da bitsintaꞌ bungꞌ ani da agam i nan Arangan ringanta gin. Da bungꞌ afis i nan i nam idzuwai igi bungꞌ amus waꞌan. 14 Arangan bungꞌ au nan idzuwai dzi nidan da nani wasi da agam. I sanab bida nigi da Arangan bungꞌ arim bingan tsiraꞌ da dzi. 15 Nam sib angu mingꞌa Ramangꞌ gin isu dzi gangꞌ, i wain igi da dzi ni i Marapayam Mararam bungꞌ ayu nan dzi nida rutin da nani da agam.

16 “Da wasaꞌ isiꞌ pas angu da agam wasangꞌ i tsanganda dzi, da ruwasaꞌ isiꞌ pas da agam bungꞌ atip natsanga dzi.”

17 Da riban atsungꞌa gin fain ini da ruan ibiani, “Nan igi wainggan ibi anungꞌ i nan Arangan nida bida, ‘Wasaꞌ isiꞌ pas angu da agam wasangꞌ i tsanganda dzi da ruwasaꞌ isiꞌ pas angu da agam bungꞌ atip natsanga dzi,’ da nan uts aruani, ‘i dzi fadan da Ramangꞌ’?” 18 Da ribarangan rugut i ruan ini binaꞌ, “Nan ‘wasaꞌ isiꞌ pas angu’ igi wainggan ibi anungꞌ? Agi wadzidziwan i nan Arangan nidan ani u.”

19 Yisu isruꞌ i ribarangan uwayantan nanga i guta i Arangan igi sib da ini rutin ini binaꞌ, “Dzi ni da agam sib ibiani, ‘Wasaꞌ isiꞌ pas angu da agam wasangꞌ i tsanganda dzi da ruwasaꞌ isiꞌ pas angu da agam bungꞌ atip natsanga dzi.’ Agam igut i ruam ifa iba i nan arigi, ma? 20 Dzi nani nan nidzun da agam! Agam bungꞌ arang da natsauꞌ i ruam nidzun angu, da garam intap nugun bungꞌ atsiaꞌ nidzun. Agam wangum bungꞌ abarabin, da bitsintaꞌ agam wangunggam barabindan bungꞌ aitam i ruan nasu nam nugun tsiaꞌan. 21 Nigi bungꞌ abi gubuꞌ sagat priꞌa i rima narun da wangun ibarabin i arangan gubuꞌ gan rima narun ibawaꞌ. Da bitsintaꞌ gubuꞌ arangan apingꞌa narun igi sib, da maran isamu nam tsakia, i nanggan nugun tsiaꞌan i mamaꞌ narun iwaꞌ sib. 22 Da nigi binigi angu i agam! Gubuꞌ aruani da agam wangum ibarabin, da bitsintaꞌ dzi bungꞌ atip natsanga agam da agam nugum bungꞌ anuf nidzun. Da nam nugun tsiaꞌan nidzun bida nigi da garam mangan wasangꞌ i siata rai sinungꞌ agam. 23 Mingꞌa gubuꞌ arigi da agam wasangꞌ tipa guta dzi i nam mangan u. Dzi ni nan nidzun bingan da agam, dzi Ramanggangꞌ bungꞌ arim nam idzuwai agam guta gin i dzi binganggangꞌ. Ywn 15:16 24 Mungꞌ ugu bawaꞌan da aruani da agam wagut i nam mangan i dzi binganggangꞌ u. Aruani da wagutin i dzi binganggangꞌ da agam bungꞌ ayu, da nam nugun tsiaꞌan tsiraꞌ bungꞌ asisungꞌ agam wangunggam.

25 “Dzi ni nan ani da agam imingꞌ nan raman, da bitsintaꞌ gubuꞌ igi bungꞌ abawaꞌ da dzi wasangꞌ tipa nida nan raman da agam u; dzi bungꞌ aragi Ramangꞌ wasi da agam. 26 Da gubuꞌ arigi da agam bungꞌ agut i Ramangꞌ i nam i dzi binganggangꞌ. Da dzi anungꞌ ini ibi dzi udagin da Ramangꞌ i agam u; imaꞌ, agam runggam. 27 I Ramangꞌ runggan maran yari i agam, i agam maram yari i dzi da imuaruts dzi ibi dzi imingꞌ Anutu gin iba. 28 Dzi mingꞌ Ramangꞌ gin iruꞌ ba intap. Da dzi nang i tanginda intap rai da tipa fadan da Ramangꞌ.”

29 Yisu riban atsungꞌa gin ini da Arangan ibiani, “Aruani da U ni nan dzidziwandan da agai da U wani nan raman u. 30 Aruani da aga tsangan i Agu sruꞌ i nam sib angu impruꞌ da garam gar uwayantan. Garam nanga i guta i Agu, da U sruꞌ gin sib. I wain igi da aga muaruts i Agu mingꞌ Anutu gin iba.”

31 Yisu ini ribarangan nan gan mungaꞌ ibiani, “Aruani angu da agam imuaruts, a? 32 Waringantin! Gubuꞌ mangan isu uts i waꞌan da ibawaꞌ sib, da garam bungꞌ adaru agam nadzarang nafa gampam ruga rugam. Da agam bungꞌ atangin dzi rai da dzi runtaꞌ angu rubungꞌ amunti. Da bitsintaꞌ dzi runtaꞌ anungꞌ isangꞌ muntida susuda marangꞌ u, i Ramangꞌ rurut dzi. 33 Dzi ni nan igi mungꞌ da agam, i agam antungꞌa ba i dzi da dzi nan gangꞌ nufan bungꞌ asisungꞌ agam wangunggam. Mingꞌa intap ani da agam bungꞌ abuaringꞌ barabin nayus, da bitsintaꞌ agam wamunti babampaf da anungꞌ ratan u, i dzi mpa riri i intap ani nampanggan sib wa.”