1 Gubuꞌ mangan da Yisu yugin, da gubuꞌ Arangan udagin sib, da Arangan garaman atsungꞌa gin mangan ini da Arangan, “Nifutsarif, wasantingꞌ agai i nan udagin, nabi Yowanis santingꞌan da garaman atsungꞌa gin.”

2 Yisu ini da ribarangan ibiani, “Gubuꞌ u nida udagin, da wani wabiani,

5 Da Arangan ini da ribarangan, “Bida agamam mangan fada da rinunggan da pas wasaꞌ da nuꞌa arangan da nidan, ‘Raingꞌ, warim bret iruꞌ da bits da dzi, 6 i dzi rinunggangꞌ mangan iba sanab bingibing, da nam gadan imaꞌ i dzi riman da arangan.’ 7 Da manga gingꞌa wasaꞌ ini nan mungaꞌ, ‘Anungꞌ rima barabin da dzi u. I dzi tsungin muantsi sib, da dzi rut narungꞌ rusangꞌ igingꞌ sib. Da dzi wasangꞌ uriꞌan da rima nam mangan u.’ 8 Dzi ni guta i agam, agam maram ifur i arangan bungꞌ auriꞌ da narim bret, i wain arangan rinunggan igi? Imaꞌ. Nam rima udzungꞌ angu da arangan bungꞌ auriꞌ da narim nam aru aranga sauda runggan gin igi. 9 Ibinigi da dzi nani da agam: wagutin da agam bungꞌ ayu; wasau da agam bungꞌ awaꞌ rutin; wadidinting muantsi da Arangan bungꞌ atus muantsi i agam. 10 I rib santan aru guta gin da iyu mungaꞌ; manga saudan da bungꞌ awaꞌ rutin; da manga didintinga muantsi da muantsi bungꞌ atus ruan. 11 Agam raman ruas, bida mangan narunggan guta gin i yafas da bungꞌ arim mur, ma? 12 Ma bida aranga guta i apu urubit mangan da u bungꞌ arim nifumafai?* nifumafai - ‘Nifumafai’ igi nifun Adzera ratar, da aruani da garam faꞌ santan ifaringꞌ apu igi binganggan ‘skorpion’, da nam tsakia gan tsiraꞌ bingan ibi gaif. Imaꞌ, anungꞌ isangꞌ. 13 Agam garam maisan, da bida agam sruꞌa i rima nam bini da narum rusam, da Ramanggam mpada gunungun ibinigi rurim maran angu i rima Marapayam Mararam da rib guta gin.”

14 Gubuꞌ mangan da Yisu idaru marapayam maisan nifu mutut sinungꞌ garam mangan, da garam arangan itip ini nan, da ampi tsiraꞌ irunt fafun gin. 15 Da bitsintaꞌ faingꞌ ini, “Arangan iyu nampang gan imingꞌ Bilsebul,† Bilsebul - Sadang binganggan mangan. marapayam maisan gudzun gan gin, i siata marapayam maisan rai.” Mt 9:34; 12:24; Mk 3:22 16 Da rib faingꞌ intsaꞌ Arangan da igutin i santingꞌa nam maran mangan bida Arangan iba imingꞌ Anutu gin.

17 Da Yisu isruꞌ i ribarangan maran furan gan igi, ibinigi da ini da ribarangan, “Bida garam intap mangan branga ruan suda iruꞌ da isa ruan da bungꞌ asiat runggan rai, da utup bitsintaꞌ branga ruan da bungꞌ asiat runggan rai nabinigi. 18 Bida Sadang utupan mpada tayangꞌ gin branga ruan suda iruꞌ, da bumuntida babampaf bida anungꞌ? Dzi ni nan igi, i agam ini dzi daruda marapayam maisan i Bilsebul nampang gan. 19 Da bida dzi siata marapayam maisan i Bilsebul nampang gan, da bida anungꞌ i agam mamaꞌ gam atsungꞌa i agam? Ribarangan isiat marapayam maisan rai ibinigi da ribarangan bungꞌ araru agam i nan agam nidan. 20 Da bitsintaꞌ bida dzi siata marapayam maisan waꞌa manaꞌ i Anutu banginggan, da nigi isantingꞌ Anutu nanggan mpada tayangꞌ gan garaman ibawaꞌ da agam sib.

21 “Da gubuꞌ garam rini urun mangan ruta bangin nam muntida sib i gan ungaran, da gan nam bunumpan bungꞌ amingꞌ bini. 22 Da bitsintaꞌ, gubuꞌ garam mangan rini urun yusa arangan bada isa arangan, da bungꞌ ampa riri gin, da nayu arangan bangi nam aru rima runggan sib in ugu sinungꞌ, da nasu wain i gan nam bunumpan da nafab.

23 “Manga mamida rima dzi sib, da irim ipiap i dzi, da manga mamida ufuma ampan mpruꞌan da dzi, da idaru rai.

24 “Da gubuꞌ marapayam maisan tanginda garam mangan rai, da ifa nam manaꞌ dadauntan i sauda mumai mpada asap in. Da bitsintaꞌ, gubuꞌ sauda wasi da ini da runggan, ‘Dzi bungꞌ atip afa ungar dzi tanginda rai ugu.’ 25 Da gubuꞌ bawaꞌan da itsangan ungar igi isamur sib da iwaꞌ bini da imingꞌ utaꞌ angu. 26 Ida arangan itip ifan da iyu marapayam maisan 7 maisa yusa arangan ugu, da ribarangan iba tip yatangꞌ da impa ungar igi. Da garam arigi nanggan mpadan imais wasi iyus miamun ugu.”

27 Da Yisu rungꞌ nida nan aru nigi da sagat mangan mingꞌa wasaꞌ i utup tsiraꞌ igi inuꞌ, “U rinanggam aru apingꞌa agu da mpada tayangꞌ agu nugun natsiaꞌ!”

28 Da Arangan ini nan mungaꞌ, “Hai, da bitsintaꞌ rib aru ringanta i Anutu sisingꞌ bini gan da atangꞌa warangꞌ gin nugun natsiaꞌ nayus.”

29 Da garam ampi tsiraꞌ waꞌa sib da fain rungꞌ waꞌa badan, da Yisu ini, “Utup gubuꞌ aruani rib maisan. Ini tsanganda nam maran mangan i santingꞌa bida dzi ba imingꞌ Anutu gin. Da bitsintaꞌ, imaꞌ, nam waꞌan da Yona ugu angu bungꞌ asu nam santingꞌan da ribarangan i tsangandan. 30 Nam idzuwai waꞌan da Yona ugu isu nam santingꞌa garam Niniwe ibi arangan iba imingꞌ Anutu gin, da nam idzuwai waꞌan da Garam Narunggan ibinigi bungꞌ asu nam santingꞌan da utup gubuꞌ aruani. 31 Da gubuꞌ raruda garam da Kwin mingꞌa intap fiꞌ bungꞌ atip amunti marataꞌ mpruꞌan da utup gubuꞌ aruani, da bungꞌ asantingꞌ rib igi nanggan maisan wasi, i arangan iba imingꞌ bingibing bingan i ringanta i Solomon uwayantan bini. Da garam bini bingan yusa Solomon ugu aruani. 32 Da gubuꞌ raruda garam da garam Niniwe bungꞌ atip amunti marataꞌ mpruꞌan da utup gubuꞌ aruani, da bungꞌ asantingꞌ i gan nanggan maisan wasi, i wain ibi rib Niniwe iparim i ruan i nan Yona fisagin, da garam bini bingan yusa Yona ugu aruani.

33 “Manga tanga rampi da anungꞌ idzigin ma itangaf gur ragun gin u. Imaꞌ; arangan yantungꞌ iyab wagungꞌ i rib atangꞌa ba ungar da tsanganda puatsadan. 34 U maram nidzun isu rampi i u nidzunggam. Gubuꞌ u maram nidzun dauman da puatsadan isisungꞌ u nidzunggam santan, da bitsintaꞌ gubuꞌ u maram nidzun maisan da nam mimin isisungꞌ u nidzunggam. 35 Da u maram fura bida puatsadan mingꞌa wasaꞌ i agu, da watsanga runggam sib i nigi anungꞌ mimindan u. 36 Ibinigi da bida puatsadan sisungꞌa u wasaꞌ gam santan da marafaingꞌ anungꞌ mimindan u, da santan bungꞌ adzidziwan nabi rampi puatsadan arida sib i agu.”

37 Da Yisu fisa i nan sib, da Farisai mangan igut i Arangan i ruta gada nam. Ibinigi da Arangan yatangꞌ ifan da impai iga nam. 38 Da bitsintaꞌ Farisai itsangan da irunt fafun i Yisu anungꞌ yatsungꞌ garam Farisai sanaban adzuꞌa bangin mungꞌ i gada nam u. Mt 15:1-2; Mk 7:1-5

39 Ida Nifutsarif ini da arangan, “Waringantin. Agam Farisai iti yadzuꞌ kap da plet manaꞌ angu, da bitsintaꞌ agam wasaꞌ gam ifungꞌ angu i nam yafida un da nanga sasub. 40 Agam garam brabruꞌan! Anutu aru tipa nam manaꞌ, itip nam wasaꞌ impruꞌ ibinigi. 41 Da bitsintaꞌ warim nam mingꞌa wasaꞌ da garam sauda runggan, da nam santan agam nangan bungꞌ awaꞌ bini i Anutu maranggan.

42 “O agam Farisai, watsauꞌ i runggam! I agam irim bus mara maran rini gaunt mingꞌa gum ufuma suda 10 igi gan bits isu dangki da Anutu. Da agam anungꞌ inang uwayant bini i garam fain ma maram yari i Anutu u. Da bitsintaꞌ agam maram wari i Anutu da wanang bini i garam, nampruꞌ da nam rima dangki igi. 43 O agam Farisai, watsauꞌ i runggam! I agam maram yari i uda bintip miamun mingꞌa ungar mpruꞌa ruan gin da garam tsarifa agam mingꞌa maket. Mt 23:6-7; Mk 12:38-39; Lk 20:46 44 Agam watsauꞌ i runggam! I agam isangꞌ garam badzab gampan mamida tirida tauf in da garam anungꞌ isruꞌ gin da iyung iyab in.”‡ garam badzab gampan...da iyung iyab in - Garam Yuda Nan Gan Faidagin Ratar ini bida garam yunga yaba i intap rima garam badzab in sib ma gifa garam mampan ma nam idzuwai garam mampan gingꞌa gin, da ibubumpua da wasangꞌ atangꞌa Ungar Mararam nasangꞌ tipa runggan sib.

45 Da garam gudzupuꞌ i nan faidagin mangan ini da Arangan, “Kidungwaga tsiraꞌ, nan u nidan da arani irim barabin da agai impruꞌ.”

46 Yisu ini nan mungaꞌ, “Agam garam gudzupuꞌ i nan faidagin, watsauꞌ i runggam! I agam nan gan faidagin ampi bingan irim barabin raragun da garam da ribarangan ibuaringꞌ itsiri. Da agam warim bangi tsitsin gam mangan i rima sib u. 47 Watsauꞌ i runggam! Ibiani, agam isara tauf i profet ruas agam tafam rusam miamun isa funub ugu ntsufan. 48 Ibinigi da agam isantingꞌ rururungan i agam maram yari i tafam rusam miamun sanaban nangan; ribarangan yis profet ruas funub da agam isara tauf i ntsufan. 49 Ibinigi da Anutu nan gan mararuru ini, ‘Dzi bungꞌ atangin profet da aposel nafan da ribarangan, da ribarangan bungꞌ awaya profet da aposel ruas nanggan mpadan da bungꞌ ais faingꞌ funub.’ 50 Nabinigi da yangin tuas arani bungꞌ asu wain i profet ruas santan biꞌ gan aru yata rai da miamun Anutu tanginda gunungun da intap bawaꞌan da aruani, 51 mingꞌa Abel biꞌ gan da bawaꞌa Tsekaria biꞌ gan aru isa funub mingꞌa wasaꞌ i Ungar Mararam da mumai tsarada nam in. Hai, dzi nani da agam, yangin tuas aruani bungꞌ awaꞌ da nam mungaꞌ i asub santan ugu.

52 “Agam garam gudzupuꞌ i nan faidagin, watsauꞌ i runggam! I agam itsungin muantsi sib i garam uwayantan i sruꞌa i Anutu. Agam runggam watangꞌ u, da agam imunti sib i rib nida atangꞌan.”

53 Gubuꞌ Yisu tanginda ungar igi rai, da garam Farisai da garam gudzupuꞌ i nan faidagin nugun itsakia, da mingꞌa gubuꞌ arigi da fadan da irim ipiap i Arangan i nan guta gin ampi bingan. 54 Ribarangan yintsaꞌ Arangan i bida Arangan nida nan fain asub da mpungan.