1 Garam uda takis da garam asub ampi bingan angu ifa tsuafiꞌ Yisu sib i rima ringan i Arangan. 2 Da Farisai da garam gudzupuꞌ i nan faidagin ini nan pusupusan ibiani, “Garam aruani iti isu rinun rusan angu i garam asub da irut iga nam.”

3 Da Yisu ini nan raman ani da ribarangan: 4 “Bida agam mangan mpada tayangꞌ dumpa 100 da gan bits fada sinungꞌ da 99 rumpadan, da garam igi bungꞌ atangin 99 igi rai i puatsi manaꞌ da bungꞌ afa i sauda mangan igi sangꞌa waꞌa rutin. 5 Gubuꞌ arangan waꞌa rutin da bungꞌ auntu da nayung nafa gampan ruta nugun tsiaꞌan. 6 Da gubuꞌ arangan waꞌa ungar da bungꞌ ais bangin i rinun rusan da riban mpada uts nampruꞌ da nani rutin, ‘Dzi waꞌ da dumpa gaꞌ saudan ugu da agam nugum watsiaꞌ nampruꞌ da dzi.’ 7 Dzi nani da agam, i sanab bida nigi da rib mpada gunungun nugun bungꞌ atsiaꞌ i garam asub mangan parima i ruan fadan da Anutu, nayus rib rururungan 99 asuban maꞌan i parima i ruan gin.”

8 Da Yisu itip ini, “Ma bida sagat mangan uda moni gan 10 da rima bits rai,* da rima bits rai - Moni bitsintaꞌ igi isangꞌ moni udan i gum nangan da gubuꞌ bitsintaꞌ. da arangan nanga bida anungꞌ? Arangan bungꞌ antang rampi da nasamur ungaran igi da nasau nasangꞌ waꞌa rutin. 9 Da gubuꞌ arangan waꞌa rutin da arangan bungꞌ ais bangin i rinun rusan da riban mpada uts nampruꞌ. Da nani rutin, ‘Agam nugum watsiaꞌ nampruꞌ da dzi, i dzi waꞌ da moni gangꞌ saudan ugu.’ ” 10 Yisu ini, “Dzi nani da agam, i sanab bida nigi da Anutu da gan angira gan inang da nugun itsiaꞌ iyus i garam asub mangan parima i ruan.”

11 Yisu rung ini, “Garam mangan narunggan marub iruꞌ impai. 12 Da isiꞌ ini da ramanggan, ‘Ramangꞌ, wafab nam bunumpam u suda wain gin ani dzi gangꞌ.’ Ibinigi da raman ifab nam bunumpan igi isangꞌ narun rusan igi.

13 “Da gubuꞌ iruꞌ ifa sib da narun isiꞌ isub moni i nam bunumpan igi santan. Da arangan iyung ifa gamp bingibing mangan. Da iwaya moni gan santan i sanab maisan bida garam buman uwayantan imingꞌ nigi. 14 Gubuꞌ arangan ntsupa moni gan santan sib da mangits tsiraꞌ iwaꞌ imingꞌ gamp igi santan. Da arangan isau runggan nidzun angu. 15 Ibinigi da arangan ifa gut i garam gamp wain igi mangan i gum da itangin arangan i mpada tayangꞌ ifab i rima nam gada rutin. 16 Da mangits yis arangan funub angu da maran ifur i gada upis gangan ifab gadan igi sufan, da bitsintaꞌ mangan anungꞌ irim arangan sib i nam mangan u.

17 “Gubuꞌ arangan tsanganda runggan da arangan maran ifur da ini, ‘Ai, dzi bubiani! Dzi ramanggaꞌ mamaꞌ guman ugu santan impa bini angu i nam gadan, da mangits ibu is dzi funub angu i nani! 18 Dzi bungꞌ atip nafan da ramanggaꞌ da nani rutin nabiani, “Ramangꞌ, dzi nang asub i Anutu da agu, 19 da dzi anungꞌ rung idaum i u faringꞌa bida u narunggam. Watsanga dzi nabi u mamaꞌ gumam mangan.” ’

20 “Ibinigi da arangan yuriꞌ da iyung i waꞌa da ramanggan. Da gubuꞌ arangan rung bada guntiꞌ da ramanggan itsangan da maran intuꞌ i arangan. Ramanggan irunt ifan da arangan da impung da itsutsuf i gian. 21 Da narun ini da raman, ‘Ramangꞌ, dzi nang asub i Anutu da agu. Dzi anungꞌ rung idaum i u faringꞌa dzi bida u narunggam.’

22 “Da bitsintaꞌ ramanggan ini da mamaꞌ guman, ‘Wayu ngarukui bini naba sung da watsuf da arangan, da watsuf ring i banginggan da faga gangkang i faganggan. 23 Da agam wayu makau narun dadabungan bini arugu naba da wais funub. Da agi naga nam da nugungꞌ natsiaꞌ gin. 24 I dzi narunggaꞌ aruani imamp sib da maran itip itaꞌ. Gubuꞌ guntiꞌ bingan da dzi watsanga i maran da aruani da dzi tip iwaꞌ rutin.’ Ibinigi da ribarangan iga nam ruta nugun tsiaꞌan.

25 “Gubuꞌ arigi da rain tsiraꞌ impa gum wasaꞌ sib. Da gubuꞌ arangan basuda uts da ungar, da iringant i mint da nam ngumpan. 26 Da arangan inuꞌ mamaꞌ gum bits i sruꞌa i nam waꞌan igi wainggan. 27 Da mamaꞌ gum ini, ‘U rainggam itip ibawaꞌ ngarubini angu, ibinigi da u ramanggam ini da aga is makau narun dadabungan bini arugu gin.’

28 “Da rain tsiraꞌ nugun itsakia da ibugin atangꞌa fada ungar igi. Ibinigi da raman iwaꞌ ifa i yafada arangan i atangꞌa ba. 29 Da bitsintaꞌ arangan ini nan mungaꞌ da ramanggan, ‘Watsangan! Udzuf ampi bingan ugu da dzi nang gum tsiraꞌ bingan i agu. Da dzi anungꞌ isu ringa dadantang i u nan gam nidan. Da bitsintaꞌ agu anungꞌ irim nuning narun mangan da dzi i ruta rinungꞌ rusangꞌ gadan da nugungꞌ nufan! 30 Da bitsintaꞌ gubuꞌ u narunggam aru tapuda u nam bunumpam rai i sanab araraꞌ ugu bawaꞌan da u is makau narun dadabungan bini arugu gin!’

31 “Da raman ini, ‘Dzi narungꞌ, gubuꞌ sib angu da u rut dzi mpai, da nam santan dzi gin ani isu u gam. 32 Da bitsintaꞌ agi naga nam da nugungꞌ natsiaꞌ, ibiani u rainggam ani imamp sib da maran itip itaꞌ; agi watsanga i maran da agi tip iwaꞌ rutin.’ ”