1 Wajcaw, ¿mbi tzuntz cho'n na tew tibu' joylaj?

¿Mbi tzuntz na tew tibu' tul yi tiempe'j yi chin q'uixc'uj nin ato' cu'nt?

2 Na yi e' mal nak, nicy' nin na chiban yi cyetz cyajbil.

I cunin e' yab tx'i' tan chibuchle'n yi e' tal prow.

Poro e' te'n chicopon tc'u'l chitramp yi ja bnix cya'n.

3 Yi e' mal naka'tz, na cyocsaj quib nim tu yi e'chk takle'n yi na cyaj chiban.

Yi e'a'tz na cho'c tan telse'n k'ej, nin tan jisle'n Kataj.

4 Yi e' mal naka'tz, qui na chitx'ixwij yi na chixmay nin tcya'j nin na cyaltz:

“Qui'c Ryos at. Cya'l jun kayajon te yi na kaban,” che'ch na bantz.

5 Cyakil yi na chiban, ilenin na wutzin.

Ẍchiwutz cyetz, qui'c ltajcyenu' scye'j.

Nin ẍchiwutz cyetz qui tz'icy' teru' yi mbi na chiban.

Tze'e'n tu' na chiban te chicontr.

6 Nin na chitxum:

“Cya'l jun tz'ucu'l ske'j. Quil jal kaproblem,” che'ch na bantz.

7 Ntin e'chk jis na el tzaj le chitzi', nin ntin e'chk c'alaj yol, tu e'chk la'jil.

Yi na chijilon, cy'a'n nin banle'n junt cya'n, na chin c'a' nin chiyol.

8 Na chiben lakak aldey.

Nin na cho'c tan chiq'uicy'le'n yi e' yi qui'c quil.

Nin ewun cuntu' na chibiy cu'n.

Nin nternin na chitzan tan chiq'uicy'le'n yi e' yi qui na jal puntil tan chicolol quib ẍchik'ab.

9 Nternin na chitzan tan chiq'uicy'le'n, chi na ban jun balum le julil, yi ewun cuntu' na el tzaj wokp, tan chitz'amle'n yi e' tal prowa'tz.

Nin yi na tx'amxij ta'n, nintzun na jut nintz le julil.

10 Ni'cu'n e' mal naka'tz.

Na chiban list quib tan chitz'amle'n yi e' tal prowa'tz, nin na chixcye' tan chitz'amle'n nin tan chibajse'n.

11 Na yi chitxumu'n yi e' mal naka'tz i'tz:

“Qui na oc Ryos tan xtxumle'n yi kil.

Siquier nak xmayin tzaj i' te cyakil yi na kaban,” che'ch.

12 Wajcaw yi ilu' inRyosil, nink tz'ocu' tan makle'n chiwutz yi e' mal naka'tz.

Elk k'ajabu' scye'j yi e' tal prow.

13 Ta', ¿mbi tzuntz, yi qui na cyek ẍchi'u'?

Na yi cyetz chitxumu'n i'tz:

“Quil tak' Ryos kacaws tan yi e'chk takle'n cachi' yi na katzan tan banle'n.”

14 Poro yi mero bintzi i'tz:

Sak cu'n swutzu', yi mbi na chitzan tan banle'n.

Sak cu'n swutzu' yi mbi na el tzaj le chitzi'.

Nin stk'e'u' chicaws.

Ma yi e' tal prow, cho'n na chicol quib te'ju'.

Cho'n na chicol quib te'ju' yi e' yi qui'c chitaj chitxu'.

15 Tk'e'u' chicaws yi e' mal naka'tz.

Chin puch'ij cunink chisaj tanu'.

Tk'e'u' chicaws te cyakil yi mbaj chibnol.

Qui'k scuyu' jun te yi quil.

16 Wajcaw, ilu' yi rey yi na cawunu' jalu'.

Nin scawunku' sbne' opon tunintz.

Ma yi e' mal nak chisotzok cyera'tz.

17 Wajcaw, yi mero bintzi i'tz:

Yi ja tbitu' chitzi' chikul, yi e' yi na cyek ẍchi'u'.

Na ja che' quiwsaju', nin ja tbitu' yi mbi nchijak teru'.

18 Ta', xomok wi'u' scye'j yi e' tal prow, yi qui'c chitaj chitxu', yi buchij che' cyak'un yi e' mal nak.

Poro tk'e'u' chicaws yi e' mal naka'tz.

Qui'tk cho'c mas tan chibuchle'n yi e' yi ate' jak' chica'wl.