1 Wajcaw, yi ilu' kaRyosil,

¿ja pe' ke'l junawes te c'u'lu'?

¿Mbi tzuntz yi ja ko' cyaj cyen tilolu'?

Wech na txa'ij cho't bin tanu' tane'n.

2 Wajcaw, ulk tx'akx yi tanumu' tc'u'lu'.

Yi tanumu' yi ja je xtxa'olu' tenẍchan.

Yi tanumu' yi ja xcye'u' tan colpe'n.

Ej nin ulk tx'akx tc'u'lu' yi mbi mbajij le wi'wtz Sión kale nnajewe'tu'.

3 Na yi ka'ama'l, ja el cu'n swutz.

Ja el cu'n swutz cyak'un kacontr.

Tircu'n yi ca'lu' ja lo'on.

4 Ej nin yi e' contru', ate' xe yi ca'lu'.

Nin na chiẍch'in tan yi tzatzin yi ate' cu'nt, tan tu' yi ja chixcye' ske'j.

Ja wi't je' e'chk chibandera swutz yi sawanil yi ca'lu'.

5 Ta', ja cho'c tan xite'n cyakil yi at xe yi ca'lu'.

Ja baj chitzec'ol tan xbil tu martiy, cyakil yi e'chk yubel yi ca'lu' yi banij tan tze'.

6 Cho'n cunin quitane'n tan xite'n chi na ban jun yaj tan cu'se'n e'chk tze' wi jun cojbil.

7 Ej nin ncha'tz ja oc k'a'kl tircu'n cya'n.

Ja el k'ej yi ca'lu' cya'n na ja cu' chixitul tircu'n.

8 Ncha'tz Ta', nk'e'tz ntina'tz, ma na ja baj chixitul cyakil yi e'chk ca'l kale na koque't tan c'u'laje'nu'.

9 Qui't na jal yi e'chk takle'n yi at xe'.

Ej nin qui'ct e' elsanl stzi'u' at skaxo'l jalu'.

Ej nin qui na el katxum tetz yi tona' tzaj wi' cyakil e'chk ila'tz.

10 Ma jalu' ilu' kaRyosil,

¿tona' nin yil ke'l liwr ẍchik'ab yi e' kacontra'tz?

¿Tona' nin yi qui't tak'u' ama'l scyetz tan cyoque'n tan telse'n k'eju'?

11 ¿Mbi tzuntz yi qui na ẍchaju' yi poreru' scyetz?

¿Mbi tzuntz yi qui'c na tak' cyenu' tan tak'le'n chicaws?

12 Na sajle'n tunintz ilu' yi ketz kaRyosil, nin ja xcye'u' scye'j wi'nin kacontr yi ate' bene'n tzi'n wi munt.

13 Ej nin tan yi teru' poreru', ja cu' jatxolu' yi mar.

Nin ja xcye'u' te jun yi i cu'n txuc tane'n yi at xe mar.

14 Nin ja ben jo'lilu' yi wankil tul jun ama'l tz'inunin tu', tetz chiwa' yi e' smaron txuc.

Nin ja xcye'u' tan yak'pe'n e'chk wi' yi Leviatán, yi jun chin txuc yi at xe mar.

15 Ncha'tz ilu' bnol tetz yi e'chk tzanla' tu e'chk k'ab a', yi at bene'n tzi'n.

Poro ncha'tz ko ya'tz tajbilu', ilu' na tzajsan cu'n.

16 Ilu' txumul tetz yi tkan skil tu yi tz'o'tz, na ilu' bnol tetz yi k'ej tu yi xaw.

17 Nin ilu' txumul tetz yi tiemp tetz k'alaj tu yi tiemp tetz cresum.

Na ilu' bnol tetz yi munt, nin na tilu' yi ma'lbil.

18 Wajcaw, ulk tx'akx tc'u'lu', yi ilenin na tzan yi contru' tan telse'n k'eju'.

Nin wi'nin e' yab na chitzan tan talche'n yi qui'c xacu'.

19 Ej nin o' eli'ch te c'u'lu'.

Na yi o' ketz, qui'c ketz kawalor.

Ni'cu'n o' tu jun tal plomẍ.

Cha'stzun te quil tak'u' ama'l tan kalo'one'n cyak'un yi e' yi i cu'n cyuch' yi smaron txuc.

20 Ulk tx'akx tc'u'lu' yi yolu' yi suknaku' sketz, na wi'nin biyol nak bene'n tzi'n.

21 Quil tak'u' ama'l tan tele'n chik'ej cyakil yi e' tal prow, yi e' yi buchijche'.

Ma na nink cho'c tan tak'le'n k'eju'.

22 Ma jalu' ilu' kaRyosil, oku' il te'j.

Na sak swutzu', yi cyakil k'ej na chitzan yi e' mal nak tan telse'n k'eju'.

23 Na yi e'a'tz, nternin na chiẍch'in tan telse'n k'eju'.

Nin cyakil k'ej, na chitzan tan joyle'n puntil tan tocse'n chic'u'l mas wunak tan telse'n k'eju'.

Ba'n tcu'n tak'u' chicaws.