1 Ilu' inRyosil, ja chucu'l pok' yi awer nak le ama'lu'.

Ja cho'c tan telse'n k'ej yi ca'lu' yi wi'nin xanil.

Ncha'tz ja baj chiwoq'uil cyakil yi tnum Jerusalén.

2 Ma chiwankil yi e' tanumu', yi nchiquim, ja cyaj tetz chiwa' yi e' ku's.

Nin chiwankil yi chimos, ja cyaj tetz chiwa' yi e' smaron txuc.

3 Ja el kojx chiẍch'el chi na el kojxuj a'.

Ja noj cyakil yi tnum Jerusalén tan chich'.

Tircu'n nchiquim. Cya'l jun nclax tan chimukle'n.

4 O' tu' chiyolbe'tz yi e' mas tnum.

O' tu' chitze'lbe'tz, ntin na chixcy'aklin ske'j.

5 ¿Tona' tz'el yi ẍchi'chbe'n c'u'lu' ske'j?

¿Sk'ak'axk pe' mas?

6 ¿Mbi tzuntz qui na chi'ch c'u'lu' scye'j yi e' mas wunak, yi qui na cho'c tan na'wse'n bi'u'?

7 Na ja cu' chibiyol yi e' tanumu'.

Ja baj chipo'tzal cyakil yi teru' ama'lu'.

8 Quil ko' cawsaju', tan paj yi quil yi e' kamam kate'.

Ma na elk k'ajabu' ske'j.

Sajku' tan kuch'eye'n. Na ato' wutz pe'm.

9 Ko' ẍch'eyaju' Ta'. Ko' colpe'u'.

Cuye'u' kapaj, bantz jale'n teru' k'eju'.

10 Na na chixcy'aklin yi e' mal nak ske'j.

Nin na cyal: “¿Lok iryosil?”

Na klo' kaj yil ticy'saju' c'u'lu' scye'j, tan paj yi ja el kojxuj chiẍch'el yi e' ẍchakumu'.

11 Lok tz'el k'ajabu' scye'j yi e' pres yi na chitx'ayne'.

Nin tan yi poreru' che' colpe'u', na tx'aklij quimichil ẍchiwutz.

12 Tak'e'u' juk tir chicaws yi e' yi na chitzan tan yolche'nu'.

Ej nin yil tak'u' chicaws, skak'e' ketz kak'ajsbil teru'.

13 Na yi o' ketz Ta', o' tanumu' nin o' tawunu'.

Skak'e' bin kak'ajsbil teru' tetz ben k'ej ben sak.