33
Moisés Israel aents aidaun pegkegnum yumigjamu
1 Apajuí inake Moisés, nii jakatnuji jegamtai pujusa, Israel aents aidaun pegkegnum yumigkiak, 2 juna aatus tiuwai:
“Tuke Pujuu jutijai pujustatus
muja Sinaínum tauwai,
tuja nugka Seírnum nagkamas
niina tsaaptinjig etsanjabi.
Nunik etsantug yaakat Parágnum
nagkamas uyuuntamsabi,
tuja diez mil ángel aidaujai
weak, niina uweje untsujiya
duwi chicham umiktin agagbaun takakuyi.
3 Tuke Pujuuk niina aentsji aidaunak aneawai,
tuja niinu etegjamu aidaunak kuitamui,
nunú aidau Apajuín emematuinawai,
nuninak nii umiktajum tibaun uminawai.
4 Moisés chicham umiktin
Jacob wegantunum tuke asatna nuna Apajuí susamun juki amasajui.
5 Apajuík Jesurúnkan apuji wajasui.
Apajuík Israel aents aidaun apuji aidaun apuji,
tuja Israela uchiji maki
makichik wegantu aidau
ijunjajua nuna apuji wajasui”, tiuwai.
6 Tuja Rubén wegantun pachis Moisés juna aatus chichajak:
“¡Rubén wegantu aidauk tuke batsamsatin agtinai!
¡Aishmag ujumak ataish,
jinaa megkaejashtin ainawai!” tiuwai.
7 Tuja Judá wegantun pachis Moisés juna aatus chichajak:
“Tuke Pujuuwah, Judá wegantu
aidau amina segapainakuig antugkata.
Ataktu awagkim tikich aents
Israel wegantu aidau batsatbaunum ijumjata.
Amina senchigmijai ayamjukta, dutikakum yaigta
niina shiwaajinish ayamjumakti tusam”, tiuwai.
8 Tuja Leví wegantu aidaun pachis Moisés juna aatus chichajak:
“Tumim Urim* “Tumim, Urim”: Juka makichik wajich najanamu aajakui, nuna sacerdote Apajuíjai chichastatus wayak jujaku ainawai. Nujai dekajakajui Apajuí wakegamush tukita nuna. aina duka aminu ainawai.
Nunú Leví wegantu amina
sacerdotejum aidau
ame tabaun betek umigtamin
aina nunú susauwaitme.
Tuja Masá nugkanum ame dita dekapsauwaitme,
dutikakum Meribá
nugkanmashkam amina aentsjum aidau
yumi susauwaitam nuwi senchi jiyakuitme.
9 Leví wegantu aina duka
ame chicham umiktajum tiuwaitam nuna
puyatjus uminawai, nuninak kakanmamainawai
ame chicham tibauwa nuna betek umikagtatus.
Nuna ima senchi dita patayin nagkaesau
eme anentuinawai.
Nunidau asag ditá apaji aidaun
dukuji aidaujai chichajuinak:
‘Atumnak wika dekatsjime’ tuinawai;
tuja dita yachi iwai aidaun, umayi iwai aidaun,
tsakat aidaunashkam chichajuinak:
‘Wika atumnak dekatsjime’ tuinawai;
tuja ditá uchiji aidaun nawanji aidaujai chichajuinak:
‘Dekatsjime yatsu ainajum’ tuinawai,
wagki ditak ashí Apajuí umigtan
idaisaju asagmatai.
10 Dita ainawai amina chichamem umiktin
agagbau aina nuna Jacob wegantun
jintintuina duka.
Dita ainawai kugkuin incienson
kuntin maa apeamujai jukiag,
aak pegkejam aakmakbaunum
nunú patasa apetai puja nuwi pataina nunú.
11 Nuadui Tuke Pujuuwah,
dita amina umigtamainak
puyatjusag takaina nunú
pegkegnum yumigsata.
Dutikakum dita shiwaaji aina
dushakam ame ijinata,
tuja ditan kajejin aina dushakam
ataktu wakitkig waitkaschatin atinme”, tiuwai.
12 Tuja Benjamín wegantun pachis Moisés juna aatus chichajak:
“Tuke Pujuuwah, amek Benjamín
wegantu aina duka aneame.
Nuadui ditak shiig aneasag batsatui.
Amek múun ashí senchigtinaitam ibau asam
tuke kuitamtinaitme.
¡Nuadui ame kuitamsam batsamsagtinai!” tiuwai.
13 Tuja José wegantu aidaun pachis Moisés juna aatus chichajak:
“Tuke Pujuu niina nugkenak
pegkegnum yumigsatin ati,
dutikamu asamtai, nayaimpinmaya yumi yutak,
tuja nugka initkeniash yumi pukuni jiinainak
niina nugkenak tuke uchupsagke atinai.
14 José wegantu aidauk dita ajakmamujinian
maki makichik mijantin
ajak juut nantu jegatai, shiig
kuashat juuka yuwagtinai.
15 Dita wegantu aidau ajakmamujig, ikam aidau,
muja aidau ayá iman aidaun juwagtinai.
Tuja muja makichkish megkaechauwa iman tuke atinai dita ajakmamu aina duka.
16 Dita nugkenig yujág shiig
pegkeg aidau piyaktinai.
Nuadui nii wegantu agtina
nudaushkam imanisag ajiti tusam yaigta.
Wagki ame mina zarza kegamunmaya wantintugkam,
amina aentsjum aidaun yajuak emati tusam etegtuawaitam,
dutiksamek ame Josék niina yachi iwai aidaun,
ekeu aidaun apuji ati tusam etegkauwaitme.
17 Tuja Efraín wegantunmayag
suntajak shiig kuashat agtinai,
tuja Manasésnumiashkam aents maanin aidauk shiig kuashat agtinai.
Nunú aina duka toro uchiji
yama nagkamchak petsakbau pegkejama iman,
búfalo senchigtinama iman agtinai.
Iman asag ashí aents tikich
nugkanmaya aidaunash, ditá
senchijijai depetkatin ainawai”, tiuwai.
18 Tuja Sabulón wegantun Isacar wegantujai pachis Moisés juna aatus chichajak:
“Sabulón wegantu aidautigmek shiig aneastajum,
atumek nayantsanum yujasjum tikich nugkanum waji sujitin asajum.
Untsu Isacar wegantu aidautigmek
aakchinmak batsamsajum,
kuntin tagkumajum shiig
kuashat uyugkajum shiig
aneasjum batsamsagtinaitjume.
19 Nunik batsamas tikich Israel aents aidaun
ipaa mujanum yajuak iwajagtinai.
Dutikawag nuwi batsamas,
ame dutikatajum tusa timauwa nuna uminak
kuntinun maawag apeagtinai.
Tuja nayantsanum waji pegkeg kuashat ayá
nuna tikich nugkanum yujasag sujiagtinai.
Nuninak nayantsanmaya
yutai aidaun yuwagtinai”, tiuwai.
20 Tuja Gad wegantun juna aatus Moisés chichajak:
“¡Apajuíyah, ame Gad wegantu aidauk
nugka múun susatnaitme, nuadui
amina see tujamainak emematjamtin ainawai!
Gad wegantunmaya aidauk león dakamama
numamtuk dakamak
aentsun maakug kuntujin tsupijug,
buuken tsupijug ukutnai.
21 Israela uchiji aidau maki makichik wegantu
aina nuna apuji aidau Canaán nugkan
tesagdayagtaish, Gad wegantu aidau
ima muuntan jukitnai apu aidau juinamujai betekak.
Dita aidauk ame dutikata
timauwa nuna umikagtin ainawai.
Dita aidauk pegkegnum
chichajam agtinai, wagki
ame Israel aents aidau
umiktajum timauwa nuna umidau asag”, tiuwai.
22 Tuja Dan wegantun Moisés juna aatus chichajak:
“Dan wegantu aidauk león tsakat
kuntinu tsekentama nujai betekai,
iman asa niina shiwaajin jeteakug, nugka
Basánnum nagkamas tsekenti jiintawai”, tiuwai.
23 Tuja Neftalí wegantu aidaun Moisés juna aatus chichajak:
“Neftalí wegantu aidaunak Tuke Pujuu
shiig anentus diyawai,
Ame Apajuíyah, ditak kuashat
pegkeg aidaunum yumigsauwaitme.
¡Nuadui kucha múun Galilea tutaya duka
nujinum nagkamas tsumujiya
aatus ditanu atinai!” tiuwai.
24 Tuja Asher wegantu aidaun Moisés juna aatus chichajak:
“Apajuíyah, ame Aserak Jacopa uchiji
tikich aina nuna nagkaesau
pegkegnum yumigsata.
Dutikamu asamtai, niina yachi aidau
eme anentsa diitai ati.
Tuja kuashat olivogtin asa
aceitejishkam imanisag ajitin ati.
25 Niina yaaktaji aidauk,
tuja jee aidaushkam kuashat waitigtin atinai.
Tuja nunú waiti aidauk jiju hierro,
bronce aina nujai najanamu asamtai,
niina shiwaajish kakajus utumainchau atinai”, tiuwai.
26 “Jesurúman Apajuíji atumin
yaimpaktatus niina senchijijai yujagminum
egkemak minina imanuk tikichik atsawai.
27 Apajuí Tuke Pujuuwa nunuwai
amina ayamjumataigmek.
Niig tuke senchigtina iman asa amina yaimpawai.
Ame wainminig amina shiwajumnak
uwakek ipisiak ijinata tusa amina inapawai.
28 Israelak ishamkagtutsuk kajinas pujustinai.
Nii wegantu aidaushkam agkan
utugchat atsaunum batsamsatin ainawai.
Niina nugke aidaunmash trigo aidauk
shiig kuashat aitnai, tuja uva ajakmaushkam
imanisag aitnai, tuja yumishkam tuke
yutitnai, nuniau asamtai, yuminak atsumchatnai.
29 ¡Israel aents aidautigmek
shiig aneastajum, wagki atum
kuashat asajum eme anentai ainajum
imanuk tikich aents aidauk atsawai!
Atumnak Tuke Pujuuwa nunú uwemtijamjaugme.
Nii atumnak kuitamjamui.
Tuja nigki ayamjutpaktatui.
Atumi shiwaajum aidaujai maaniagminish,
niyai depetmitkagbauk.
Nuadui shiwag aidauk atumiin yunumjagtinai.
Nuninakui atum wagagkijum
ijinatin ainagme”, tiuwai Moisés.
*33:8 “Tumim, Urim”: Juka makichik wajich najanamu aajakui, nuna sacerdote Apajuíjai chichastatus wayak jujaku ainawai. Nujai dekajakajui Apajuí wakegamush tukita nuna.