49
Jacob jakattak tepesa chichakbau
1 Nuna tusa ashimak niina uchiji aidaun untsuka ikaunman chichajak:
“Juwi tantatajum, nunikagmin
atakesh wajukatnuk ainagme
nuna pachisan ujaktajime:
2 ¡Jacopan uchiji aidauwah,
juwi tanta ijuntsajum
atumin apa Israel tawa nunú antuktajum!
3 “Rubénkah, ametme mina uchig iwaimek,
wi aminak nagkamchakun datsa asan akiauwaitjame,
nuadui amek ajantusa diitai senchigtin wajasuitme.
4 Tujash imankek achatnaitme,
shiig emetja anentaimchau,
yumi tsukati waketama nujai betek asam,
tuja mina eme anenjusa diigchau asam,
mina duwagjaish ikagmakuitam nuadui.
5 “Simeógkak niina yachi Levíjai
betek ajankachu ishamain ainawai.
6 ¡Ajumaish wika atumjai ijunja pujutnak dakitajai!
wagki atumi kajetinig aents aidau maakjum,
kuntinu kagkajish kupijajum uku yujau aidau asagmin.
7 ¡Atumek pegkegchau, dekas shiig pegkegchau!
Atumi kajetjumik kuntin ikamia kajena ibauwai.
¡Nuadui wi atumnak ashí Israel nugkanum dapampaaktinaitjime!
8 “Untsu Judá aminak, yatsum aidauk
pempeentugmakiag emematjamtin ainawai.
Nuadui yatsumin waitkaidaush
ame depetkam ayamjuktinaitme,
tuja amina yatsum aidau
emematjamainak tikishmatjamiagtinai.
9 ¡Judá, mina uchijuh!
Amek leónka uchijijai betekaitme.
León nejen yuwa ejemag wajas
tsuntsuma ayamak múuntsukaitai tumain
nugka tepegama numamtuk atinaitme.
¿Yaki aminash imanminash waitkagmasti?
10 Makichkish Judá senchijinak atankichagtinai,
tuja nii apu wee inabaujinashkam.
Untsu niina nagkaesau dekas apu taamtai,
nuna ashí aents aidau niina chichamen
umijuinak wedau asagmatai ukuktinaitme.
11 Niina burrojinash uva numijin
tuja uva daekjinig jigkatnai, dutikak niina jáanchjinash
¡vino uva yumiji najanamua duwik nijatnai!
12 Niina jiig uva yumiji vino bukuseaya
aan nagkaemas bukuseayai; tuja niina naíshkam
leche pujua aan nagkaemas pujui.* Juna aatus tiuwa nunak nii wegantu aidauk nugka pegkeg ajak shiig tsapaunum batsamas shiig wiakuch agtin asamtai tiuwai.
13 “Sabulógkak nayantsanum uwet
dekas lancha múun aidau anumtaiji aidaunum pujustinai.
Tuja niina nugke nagkatkamuk
Sidón nugka aatus atinai.
14 “Isacarak burro senchigtin kijinun yanau,
niina wenuken waya tepesa dakimakug
inanmainchawama numamtinai.
15 Niig nugka pegkeg ayamainjin wainak
nuna tsuntsumtitnai niina tuntupen kijinun patai jukitatus,
nuniak chichamjumatsuk tikima wainka
tikichi inatai atinai.
16 “Dagkak Israel wegantu aidaujai betek
nii wegantu aidaun apuji atinai.
17 Dagkak dapi jintá dakamak tepes
caballo minittaman sagkannum esai
ajiyama iman atinai.
18 ¡Chah Tuke Pujuuwah,
uwemtijugti tusan amina dakajame!
19 “Gaadnak shiwag aidau jetetnai,
tujash nii wajantak depetuk ipistinai.
20 “Asera nugkeg shiig pegkeg asamtai,
yutai aidauk pegkeg shiig kuashat ajitnai,
iman asamtai nuwiyan apunashkam tuké sutinai.
21 “Neftalík japa agkan wekagas
uchijin shiig pegkejuch aidaun petsama numamtinai.
22 “Josék numi namaka uwet wajas
shiig kagkapena kanawe múun waig
senchi nejegama imanai.
23 Nagki akenin aidau kajejuinawai,
nuniak nagki aketuinawai,
dutikainak tuké waitkainawai.
24 Tujash José kuntujig senchi wajaknai,
iman asa tuke depetmawai.
¡See kuashat Jacopa Apajuíji senchigtinuh!
¡Apajuí Israelan kuitamna nuna daajin see kuashat!
25 ¡See kuashat, Apajuí amina apa Apajuíjiya nunú yaimpakti;
Apajuí dekas ashí senchigtina nunú
aminak pegkegnum yumigtamsatin ati!
¡Nayaimpinmaya pegkeg jutai aina nuwiyanash!
¡Nayantsa initkenia pegkeg jutai aina nuwiyanash!
Tuja ¡uchi akia shiig tsakapaktinnashkam,
dutiksag yaimpakti!
26 Mina apag pegkegnum yumigtujua
nuna nagkaesan wika aminak pegkegnum yumigkiajame.
Wi yumigkiajam juka, nugka nain aidau
tuke megkaekashtina iman atinai.
Juju pegkeg yumigkia juka Josénu atinai,
wagki niyai yachi aina nuwiyan
Apajuí etegkamua duka.
27 “¡Benjamígkak lobo kajen yukagtin
kashikmas neje yuwa ajum agkuantai
ampinjaun tinamkagtina imanai!”
28 Juju doce aina juwai Israela uchiji aidau. Juna aatus ditá apaji maki makichik yumigjauwai.
Jacob jakamu
29 Makichik tsawantai Jacob niina uchiji aidaun juna aatus tiuwai:
“Wi jakatnuk namput wajaschae. Wi jakamtaig mina apag ukusbau aina nuwi waa umikbau Efrógnum hitita aentsu nugken awa nuwi ukugsatajum. 30 Canaán nugkanum waa Macpelá Mamrejai niinis awa nuna mina apachug Abraham ashí Efrógka nugken sumak, juka mina pataaju ukumatai ati tiuwa nuwi ukugsatajum. 31 Nuwi ukusajui Abrahaman niina nuwe Sarajai, nuigtushkam nuwig ukusajui mina apag Isaakan niina nuwe Rebecajai, tuja wishakam nuwig Lean ukusuitjai. 32 Nunú nugka duka, ashí waa aidaujai hitita aentsu nugke aajaku sumakbauwai.”
33 Juna aatus Jacob niina uchiji aidau umikagtinun ujaka ashimak, pegajin ataktu tepesui, nunik nuwig jakauwai.
*49:12 Juna aatus tiuwa nunak nii wegantu aidauk nugka pegkeg ajak shiig tsapaunum batsamas shiig wiakuch agtin asamtai tiuwai.