31
Egiptunmaya suntag aidau ayamjutpakagtatui tinu aidau pachisa ujakbau
1 Egipto nugkanmaya aidaun caballoji maanitai aidau kuashat,
tuja carrojishkam imanisag asagmatai,
Israel aents aidauk dita yaimpaktinme tusag
shimutuina nunak wait anentuinajai,
wagki Israel aents aidau ememattai
Tuke Pujuu pegkegma nunú yaimpakti tusag,
niina segamainun idayinak wainak yujau asagmatai.
2 Tujash Apajuík makichkish tsanushtayai,
iman asa suwimkan sukagtinai,
tuja nii dutikatjai tibaun yapajiag idaichauwai,
betek uminai.
Apajuík aents pegkegchaun takau aidaun
yayaunak suwimkan susa ijinatnai.
3 Egiptunmaya aidauk Apajuíchu ainawai,
ditak aents ainawai;
tuja caballoji aidaushkam iyashtin ainawai, wakankesh ainatsui.
Tuke Pujuu ditanak suwimkan susattawai.
Nuadui Israel aents aidauk ya ditan ayamjawa
nujai betek suwimkan jukiag jinawagtatui.
4 Tuja Tuke Pujuu chichagtak tujutmae:
“León uwijan maamtai, uwijan kuitamin aidau tuwakag,
senchi untsumkag leónkan uwakatajtakush
uwakmainchau ainawai.
Numamtuk Tuke Pujuu ashí senchigtina nunú taattawai muja Siógnum
niina aentsji aidaun ayamjuktatus.
5 Tuja chigki nanaak wekagas
niina uchijin kuitamama numamtuk,
Tuke Pujuu ashí senchigtina nunú
Jerusalégnak kuitamak uwemtikattawai,
dutika ayamjuk agkanmitkattawai.”
6 Nuadui Israel aents aidauwah,
atum tudau, chicham imtimkiu akugmesh,
ataktu Apajuí umigkatajum.
7 Wagki atum aidautijum,
oro, plata aidaujai atum dakumka najanamu aidau
emematjum nunú idaisagminig,
8 asirianmaya aents aidauk ijina utsam agtatui,
tujash nunak aents aidauk ijinashtatui,
ayatak maaniamun ishamainak pisajagtatui,
tuja datsauch maanitan yacha aidaush
wainka inaku waitkatai wajasagtatui.
9 Tuja dita apujig nuna ishamak tupikaki jiinkittawai,
tuja suntaja apuji aidaushkam banderajinak ukuinak pisajagtatui.
Tuja junashkam Apajuí chichaak:
“Niina shiwaaji aidaun suwimak susatnujig
Jerusalégnum umikbau awai”, tawai.