1 Wait anentagme aminak,

wagki amek tikich nugkanmaya aidau

tsainaitkum tsaikchamuitme,

nuigtush amek tikich nugkanmaya aidau

tsanuwaitkum tsanugchamuitme.

Nuadui amujatut idaisa pujamin,

aminashkam tikich nugkanmaya aidau tsaipakagtinai,

tuja tsanujatut idaisa pujamin,

tikich nugkanmaya aidau tsanupajagtinai.

2 Tuke Pujuuwah,

niimpap yaimpaktatua tusa

aminig anentaimaidautik wait anenkagtugta.

Nuniakum tuké kashikmasam yaijatta,

tuja ishamainnum jegamunmash ame uwemtikagtugta.

3 Amina chichamjumin antukag ishamainak,

tikich aents aidauk pisainawai,

tuja yaakat muunnumia aidauk

amina senchijum iwainamun wainainak,

ishamkag pampagkag megkagainawai.

4 Nuniagtai dita shiwaaji aidau

manchijai betek yumpuntuk utsantuawag,

dita wajiji aidaunak ashí yajutuinawai.

5 Tuke Pujuuwai dekas múuntak,

niig nayaimpinum pujawai;

Jerusalégnumia aidaunak pegkejan takainak,

esegag pujustinme tiuwai.

6 Nuadui shiig pujustinme tusa tuké kuitamtinai.

Unuimata duka dekata nujai uwemtan sukagtau asa,

waji pegkeg aidaun nagkaesauwai.

Tuke Pujuu puyatjusa umigbauwa nunuwai

waji pegkeg akik aina nuna nagkaesau.

7 ¡Suntag wajiu aidau tikich yaimpaktinme tusag,

jintá yujas untsumainawai,

tuja agkan pujutan chichaman etsejin

aidaushkam kajekag buutuinawai!

8 Jinta aidauk bashiake,

makichkish jintanmak yujainatsui,

tuja jutijai chichaman umikajua nunash uminatsui;

nuadui ajantunisa niniamush atsawai.

9 Israel aents aidaun nugkega duka ajak aidau tsapaachu asamtai,

wake besemag wajas awai.

Líbano aidaush datsaamainak jajatuk jinawai;

tuja nugka paka Sarón tutaya dushakam

yaunchkek pegkeg ajak shiig tsapaya nunak

yamai uwegshujai betek wajase.

Tuja Basán nugka, muja Carmelo tutaya nujai

nugka pegkeg numi dukentin ayau asa,

pegkeg samekbau wajas ayá duka duke kakekamtai,

wentsamtuk ijunui.

10 Nuadui Tuke Pujuu chichaak:

“Wi yamai nantagkitjai;

nuniakun ashí mina senchijun iwainaktajai.

11 Tuja atum chicham umiamua duka

dupa kagakujai betek,

nuigtush tsuwatjai betek ainawai.

Nunin asamtai wi umpuamua nunú

nunak jiijai betek ekemak ajapattajai.

12 Nuadui aents aidauk jagki tsupigbau akaam

keegama numamtuk keeka yuku wajasagtatui.

13 “Atushat pujautigmek,

wi dutikauwaitag nunú dekatajum,

tuja tikiju pujautigmeshkam, mina senchijua nunú dekaskeapi titajum.”

14 Aents pegkegchau aidau Jerusalégnum

batsata duka sapijin kujainawai,

tuja aents Apajuín umigchau aina dushakam sapigmainawai.

Nuninak: “¿Ii ainag nuwiyash yaki jii kajinchau

tuke kee auwa ibaunmash pujusainta?”

15 Aents pegkejan takau, dekaskenum chichau,

tuja tikichin atanki yajutuk wiakchameuchu,

tuja akikam yaimchau,

magkagtuata tusa tamash dakitin,

nuigtush pegkegchaunak makichkish anentaimtuchu,

16 nunú aentsuk waitkascham agkan pujustinai.

Niina jeeg utumainchau kaya jegamkamu atinai.

Tuja nii yuwatnujish uwagtinjish ashí ajitnai.

17 Tuja ataktu wainkatnaitme

apu niina imanjin etsantug tsaaptin wajas eketu.

Niig atushat tikich nugka aidaunmash inamjatnai.

18 Ame yaunchuk sapigmayum nunú anentaimtusa chichaakum:

“Apu kuichkiji atin akikmakbau aidaun dekapainak,

akikmaktajum tusa

waitkagmayanum dusha ¿tuwi batsatua?

¿Tuwi batsatua ajak juukbau aidaun

dekapau aajabia dusha?

Iina uchiji aidaun suntagmagatnume tusa

achija yajutjamianum dusha ¿tuwi batsatua?” titinaitjume.

19 Aents pegkegchau tikich chichaman antumainchaun

pachimtakan chichaaku aidaujai ijunjajum

pujajum duka yamaik nunikchattagme.

20 Jerusalégnum jega Apajuí emematku ijuntainum

ijunja jiistamnuweg nunú anentaimtusam diista;

Jerusalégkak aak shiig aakmagbau yumpumainchau

numi ajigbaush kupimainchau, tuja

daekai jigkakbaush tsujimainchauwama iman atinai.

21 Nuwi Tuke Pujuu niina imanjijai iina wantintugmawai.

Jerusalégnumak namak múun chichijam aidau ayawai.

Namak iman agtaish, shiwag aidauk

dita lanchaji wiyanka wekaetai aina duikish,

tuja lanchaji múun aina duikish kakajus utuachagtinai.

22 Wagki Tuke Pujuuwai iina ayamjutpa duka,

tuja ii umiktinnak nii chichaman sukagtawai.

Niyai iina apujig, iina uwemtijamin.

23 Nunú lanchanum numi ajiamu aidau

jigkakbauwa duka daekak takatkae,

nuniku asamtai jáanch detuamua duka

pukugak iyaumain wajawai.

Nunitai wemainchau dekapenakui,

lanchajin utsaantua wajiji aidau yajutkagtatji,

dutikajin aents shutuu ai aidauwaske

dita wajiji aidaunak yajuakagtatui.

24 Tuja Judá wegantu aidaun tudaujinak

Apajuí tsagkujatnai,

nuadui makichik aentskesh:

“Jajai”, tusa tauk atsutnai.