1 Yaakat Betanianmaya aents Lázaro daagtin jaak tepau. Duka umayí María, Marta aatus ijunag nunú yaaktanmag batsamajakajui. 2 Maríaya juuwai kugkuinu juki Jisusan nawen ukatug niina intashinig ujugtujua nunú. 3 María, Martajai Jisusan chichaman akupjuinak:

—Apuh, amina kumpajum aneetaigmea duka jaawai, —tiajui.

4 Nu akatjamu tusá ujaam Jisus:

—Aunak tuke jaak jakashtatui, Apajuí senchijin, nuigtú Apajuí Uchijí senchijinashkam iwainaktatus aniawai, —tiuwai.

5 Jisusak Martan niina kaijai, nuigtushkam umayí Lazaronashkam senchi aneejakuí. 6 Imaatiknaitak jaawai tabaun antukashkam wetsuk, ni pujamunmag jimajá kanajui, 7 nunik ni jintintaiji aidaun chichajak:

—Judeanum ataktú wakettsaik wegagmi, —tiuwai.

8 Tama dita ayaak:

—Jintinkagtinuh, amina awiya judío aidau kayai tukú tukugmainakua mantamawagtatus imatijabiagmaya nuniaigkik, ¿awi ataktú wemi tusamesh tame? —tuidau.

9 Tiagtai Jisus ayaak:

—¿Makichik tsawantan doce hora ajatsuak? Aents tsawai wekaguk tukuumaitsui, shiig wainak wegau asa. 10 Untsu kashi wegauk tukuumain ainawai, tsaaptinum wainmak wegachu asa.

11 Nuna ti nuigtú:

—Iina kumpají Lazarok yamaik kanag tepawai, tujash wi wejin inankittajai, —tiuwai.

12 Nuna tutai ni jintintaiji chichajuinak:

—Apuh, dekas kanag tepauku nantaktatajama, —tuidau.

13 Jisusak Lázaro jakamtai taunak, ditak ayatak kanagmatais tawatai tusag tiajui. 14 Tiagtai Jisus paan iwainak:

—Lazarok dekas jakae, 15 tuja wi awi juwakchau asan shiig aneajai, atumek wi au inanbau wainkajum dekaskeapi tiagtin asagmin. Tujash jegaa diisagmi, —tiuwai.

16 Tutai Tomás, Jimagmamu tutaiya nunú, tikich Jisusa jintintaiji aina nuna chichajak:

—Jutiish niijaig wegagmi, mainakush jutiijai mantamatnume, —tiuwai.

17 Jisus Lázaro pujutain jegakmá, Lázaro ukusam cuatro tsawan wegai jegauwai. 18 Betaniak Jerusalén jegattak kampatum kilómetro jegaantu. 19 Tuja kuashat judío aidau shimutkajui Marían, Martajai ijagsagtatus, umayí jajukam buutuinak senchi wake besemag batsatu asamtai, anentain ichichtugtasag. 20 Nuninai Jisus taattak minawai tabaun Marta antuk, Jisusan igkugtatus jintai, Maríak jegag juwakui. 21 Nunik Marta Jisusan igkug chichajak:

—Apuh, ame juwi pujutaik mina ubajuk jamain wajakchae, 22 tujash wika yamaikish ame Apajuí segamunak imatiksagkeap amamainaita tajai, —tiuwai.

23 Tusá tama Jisus ayaak:

—Amina umaimik aneantatui, —tau.

24 Tama Marta chichaak:

—Dekas tame, wika dekajai tsawan nagkantina duwi aneantina nunak, —tiu.

25 Tutai Jisus chichajak:

—Witjai jakaunash inanmainnuk, wikitjai pujutnash sukagtinnuk. Aents minai kajinas anentaimaidauk, jakaash pujut nagkanchaunum pujusagtinai. 26 Tuja yamai iwaaku batsata dushakam, mina: Dekas Apajuí Uchijimpapi, tujutuinak imá minak umigtuidauk, waitut nagkanchaunmag wechagtin ainawai. ¿Dusha amesh dekaskeap nuniktinaita tamek? —tiuwai.

27 Tama:

—Ehé Apuh, wika dekaskeapi tajame. Amek Apajuí Kristun ju nugka juwi awematnaitjai timawa nunú asam, Apajuí Uchijiyaitme, tiuwai.

28 Nuna tusa ukuak, Martak kai Marían jegantun niinak akanki:

—Jintinkagtin juwi taa untsugmawai, —tiuwai.

29 Nunú tamawaik Maríashkam wajaakug Jisusan wainkatatus wejiuwai. 30 Jisusak yaaktanmag eke waitsuk, Marta igkugbaunmag pujau. 31 María waujus jiinki wetai, judío aidau María anentai ichichtuinak kauná batsatushkam: Umayí ukusbaunum jegantá buuttasas wegatai, tusag pataetukajui.

32 Nunik Maríak Jisus wajamunum jegantá tikishmatug pujus:

—Apuh, ame juwi pujutaik, mina ubajuk jakachampastaih, —tau.

33 Tusa María buuttai, judío Marían pataetuk kaunkaushkam buutiagtatman Jisus wainak, shiig senchi wake besemag dekapjauwai. 34 Nunik:

—¿Tuwí ukusmaugme? —tusa iniimu.

Tutai:

—Apuh juwi ukusmaji, tantá diistá, —tiajui.

35 Tima jegan diikmá wainak Jisus buutu. 36 Nunitai judío aidau:

—¡Diisjuah, yaitnaku aneejakuajah! —tuidau.

37 Tiagtai tikich aidau:

—¿Jujú wainmachunash wainmitkauwe ibaush, Lázaro jataish utugkatnuki, ni pujutaish jakatnasha? —tuidau.

38 Jisus ataktú senchi wake besemag dekapjau, nunik waa muun taimunum ukusá kaya aputukbaun jegantun:

39 —Kayak ekektajum, —tiuwai.

Tutai Marta chichaak:

—Apuh, mejeawastaih, ukusam cuatroa imania kintamjae, —tau.

40 Tutai Jisus ayaak:

—¿Ame dekaskeapi takumek Apajuí senchijí iwainamu wainkattame timajam duka, dekaskeap dutikmainaita tatsumek? —tiuwai.

41 Timatai Lázaro ukuaku epenbaun, kayan eketkaju. Dutikamtai Jisus nayaimpin pagkai diyaak:

—Apawah see tajame, amek minak tuke antugtau asamin. 42 Wika shiig dekajai, amek minak tuke antugtusmeké ame nunak. Nuniayatkun yamai tajame, jujú aents ijuna jushakam shiig wainkag, dekas Apajuí awemamuapi tujuttinme tusan, —tau.

43 Nuna ti idayak senchi untsuká:

—¡Lázaro, nantakim agaa jiinkita! —tiuwai.

44 Tama Lazaroshkam ukuaku uwejé nawejai jaanchi shiig pempeaja, nuigtú yapiin jaanch aputusa ukusbauk imanisag jiinkiuwai. Nunikmatai Jisus chichaak:

—Atiatajum wetí, —tiuwai.

45 Kuashat judío aidau Marían uyunainak yujaidauk, Jisus nu dutikamu wainkag: Dekas juka Apajuí Uchijimpapita, tiajui. 46 Tujash wajumak aents fariseo aidaun jegajuawag, Jisus dutikamun pachis ujakajui. 47 Nunú ujakajam fariseo aidau, sacerdoten apuji aidau, nuigtú apu ditan nagkaesau aidaujai ijunjag chichainak:

—Au aentsua nunú aents dutikmainchaun kuashat iwainag takaa aush ¿utugkattaji? 48 Ayatak idaisa ajinig ashí aents aidau niinak: Dekas Apajuí Uchijimpapita, tusag nemajiagtai, Romanmaya apu aidau suntajan ishitjamkamtai kautjamak, jega Apajuí emematku ijuntaiya juna yumpunjamainak ashí jutiijai amupaktatajama, —tuidau.

49 Nuna tiagtai nuwiya Caifás daagtin nunú mijantin sumo sacerdote atí tusa adaikam pujau asa chichaak:

—Atumek duka machikish dekatsjume, 50 anentaimsagmesh diyatsjume, ashí aents jinumaina nuna makichik aents mantamnamaina duka, —tiuwai.

51 Nunak Caifasak nigki nagkamig tichauwai. Nunú mijantin ni sumo sacerdote wajas pujau asamtai, Apajuí tu anentaimtikbau asa, Jisusai judío aidaunum mantamnatnuk, tiuwai. 52 Tujash imá judío aina nuwigkik maam amaitsui, ashí aents tikich nugkanum batsata nunashkam uwemtikak niina uchijí emakta tau asa, Jisus maam atinun taku tiuwai. 53 Nuna timatai nunú tsawantaik apu aidauk: Jisusak dekas mantamnati, tusag chichaman umigkajui.

54 Tibaun Jisus dekagmama shiig wantinka wekaemainchau asamtai, Judea nugkanak ukuak, makichik yaakat yaijuch Efraín tutai uwejush tikiju anem aunum weuwai. Nui jegaa ashí niina jintintaiji aidaujai ijunag pujusuí.

55 Nuniamunum judío aidau Pascuatin uwijan maawag yuujakú aina nu tsawan tikiju wajasú asamtai, kuashat aents Jerusalén ashinaidau, nui jegawag: Nu jista tsawaakuig pegkediaja jistamtai atí, tibau asamtai nuna umikagtatus. 56 Tuja aents aidauk Jisusan wainkagtatus egaa yujajuidau, nunidau asag jega Apajuí ememattainum wayaa ekeemsajash pempentunisag iniininak:

—¿Atumesh Jisusash wajuk anentaimtagme, ju jistanmash minitpash, atsa pujustimpash? —tuidau.

57 Fariseo aidau sacerdote apuji aidaujai aentsun akatenak:

—Makichkitigmekesh Jisus pujamuji dekagkugmek etsegkatajum, achiká jukimi, —tiajui.