1 Tuke Pujuu see titajum,

wagki niyai pegkejak;

niina anenkajig tuke auwai.

2 Israel aents aidauk yamaikiuch:

“Apajuí anenkeg tuke auwai”, titinme.

3 Sacerdote aidaushkam:

“Apajuí anenkeg tuke auwai”, titinme.

4 Tuke Pujuun eme anentus diin aidaushkam:

“Apajuí anenkeg tuke auwai”, titinme.

5 Waittanum pujusan

Tuke Pujuun untsukbaijai,

dutika ai, aijuk uwemtijugmayi.

6 Tuke Pujuu wijaig pujawai;

nuadui wika ishamkagtatsjai;

minak makichkish pegkegchauk

awajtumain ainatsui.

7 Tuke Pujuu wijaig pujawai;

nuniau asa minak nii yaintui.

¡Nuadui mina shiwag aidau

mina kajegtuina nuna nii ijinamun wainkattajai!

8 Aentsnum kajintsa anentaima wekaetsuk,

dekas Tuke Pujuuwaig kajintsa anentaimainaitji.

9 Apu aidaunum kajintsa anentaima wekaetsuk,

dekas Tuke Pujuuwaig kajintsa anentaimainaitji.

10 Tikich nugkanmaya aents aidau

tuwagtukagmayi;

tujash Tuke Pujuu daajin depetkamiajai.

11 Ashí tententuawagmayi;

tujash Tuke Pujuu daajin depetkabiajai.

12 Etejai betek tuwagtukagmayi;

tujash jagki ijumjamun jii apea

emegkauwama imatikan ajapabiajai;

¡Tuke Pujuu daajin depetkabiajai!

13 Ajua maami tusag shitatkiagmayi;

tujash minak Tuke Pujuu ayamjutkabi.

14 Wika Tuke Pujuu mina senchimtija

nuna kantamjajai.

¡Niiyai mina uwemtijinuk!

15 Aents Apajuín umijin aina nuna jenig

shiig aneas untsumainak:

“Tuke Pujuun senchijiya nunú depetmake”,

titinme.

16 ¡Tuke Pujuun senchijiya duka

augmatkuish, makichkish ejemaitsui!

¡Tuke Pujuun senchijiya nunú depetmakui!

17 ¡Jakashtatjai, iwaku pujuttajai,

wagki Tuke Pujuu iina ayamjutpak

dutikauwa nuna etsegkatasan!

18 Tuke Pujuu minak shiig senchi

suwimkan sujusmayi;

tujash jakati tusag idaituschabi.

19 ¡Apajuí jee pegkegma nuna

waitiji ujatjitajum;

nuwi wayan Tuke Pujuun see titag tajai!

20 Juju waitiya duka

Tuke Pujuu pujamunum waitaiyai;

aents Apajuín nemajin aidauk

nunú waitiya nuni wayawagtinai.

21 Tuke Pujuuwah, see tajame

wagki ame antugtukam uwemtijuju asamin.

22 Kaya ekenag jegamin aidau

kaya pegkegchauwai tusag,

dakitjajua nunú yamai

dekas kaya ima pegkeg atsumtai wajase.

23 Nunak Tuke Pujuu dutikae,

duka yamaik puyattsa diimainai.

24 Juju tsawanta juwai,

Tuke Pujuu iina ayamjutpakua nunú;

nuadui ¡yamai shiig anenaku jiistamawagmi!

25 Tuke Pujuuwah, ¡wait aneasam uwemtikagtugta!

Tuke Pujuuwah, ¡wait aneasam yaijatkata,

shiig batsamsagmi!

26 ¡Tuke Pujuu awemamu mina nunú

dekas ememattai ati!

¡Tuja Tuke Pujuu jee pegkegma nuwi pujusan atumin pegkegnum yumigkiajime!

27 Tuke Pujuuk Apajuíyai.

¡Apajuíyai tsaaptinun sujamsauk!

Yagkug aidau yajuaka altarnum

ejegawagmi, dutikawaja Apajuí

aentsji aidau nuwi batsata nunú uyuntsagmi.

28 Amek mina Apajuíg asamin see tajame,

nuniakun amina imanjumin emematjai.

29 Tuke Pujuu see titajum,

wagki niyai pegkejak;

niina anenkajig tuke auwai.