Melɛ̌ Mékɔ̄ɔ̄lē 1 Tɛsalonika 1

Kálag eʼsó echě Paalɛ áténlé

Baá Tɛsalonika

Ndibned ń kálag

Dyad á Tɛsalonika dɔ́ɔ ábédé nló mé aloŋ á mbwɔ́g e Masɛdonia. Áde Paalɛ ábídé á dyad á Filipi, ankɛ̌ á Tɛsalonika ádībē mwembé áwed. Ámbīd e póndé, Paalɛ anhidé á Tɛsalonika ákɛ á dyad á Bɛria. Anhidé áwed ámpē ákɛ̄ á dyad á Kɔrinto, áwed-taá ákúdé kálag echě mod awě búmɔ̄ bébɛle nsɔ́n, Timotiɛ, álómmé mɔ́, âláa mɔ́ tə̂ŋgɛne mekan ḿme mébɛnlad á mwembé ḿme ńdé á Tɛsalonika.

Paalɛ antelé mwembé ḿme ndé á Tɛsalonika, enɛ́n kálag eʼsó âwéd bɔ́ nlém á abum tə̂ŋgɛne adúbe áde bédúbpé Sáŋgwɛ́ɛ́ bédə̄ŋ-ʼɛ mɔ́. Áwēd-te, ankamtɛ́n bɔ́ nyaa e aloŋgé echě ánwōŋgē áde ábédé ne bɔ́, ákōŋ-ʼɛ bɔ́ mekan alúmed áte tə̂ŋgɛne epɛ éche Krǐstəə ápɛɛ́ ámpē, éche êmpɛɛ́n mpuutéd átîntê e mwembé ḿme ndé á Tɛsalonika. Anlúméd bɔ́ áte ngáne áwóó nlém áte âtim ámbīd áwāb âbɛl boŋ áwêd bɔ́ nlém á abum tə̂ŋgɛne mam mémpēe ḿme ménɔneʼ ádab adúbe. Anláá bɔ́ mekan ḿme bétə́ŋgɛ́né abɛl âwóged Dyǒb menyiŋge ne ngáne aloŋgé ádāb átə́ŋgɛ́né abɛ́ asin áde bésinɛɛ́ epɛ éche Sáŋgwɛ́ɛ́.

Nkabtéd ń kálag

Ndibned ń kálag 1.1

Meságnɛn ne mekɛnag 1.2-3.13

Elébé tə̂ŋgɛne abɛ́ á bad bé Krǐsto 4.1-12

Elébé tə̂ŋgɛne epɛ éche Krǐstəə 4.13-5.11

Elébé é asóg 5.12-22

Nsógtɛn ń kálag 5.23-28

1 Mɛ Paalɛ, nchoo ne Sailasɛ bɔ́ Timotiɛ, mɛ-ɛɛ́ ntenleʼ nyé enɛ́n kálag. Ntenle nyé bad ábe bédé á mwembé ḿme ńdé á dyad á Tɛsalonika, nyé ábe nyêdé bad ábe Dyǒb Titɛ́ɛ, nyêbɛ́-ʼɛ bad ábe Sáŋgú Yesu Krǐstəə.

Nsimé ne nsaŋ ḿme Dyǒb ḿbɛ̂ ne nyé.

Paalɛ aságnan áyə̄le adúbe
áde bad bé Tɛsalonika béwóó

2 Sêságnan Dyǒb áyə̄l e nyé moosyəə́l póndé tɛ́, séhāg nyé á mekáne póndé-tɛ́ nzé sêkânneʼ. 3 Nzé sêkânneʼ ádɛd Dyǒb echɛd Sáŋ, sêbɛlé sékamtán nsɔ́n ḿme nyébɛlɛɛ́ áyə̄le adúbé áde nyédúbpé. Sêkamtan ngáne edəŋge éche nyéwóŋné bad bémpēe ébɛ́lé nyêbɛle ntǔ âwóŋgɛn bɔ́, nɛ̂ŋgáne alyə́g áde nyélyə́gé nlém áyə̄l e epɛ éche awesyánē Sáŋgwɛ́ɛ́, Yesu Krǐstəə, ábɛ́lé mekuu méwúú nyé ásē. 4 A-baányaŋ, sêbíí nɛ́n bán Dyǒb ádə́ə́ nyé apwɛdé-ʼɛ nyé âbɛ́ ábē bad. 5 Sêbíí nɛ́n áyə̄le áde sêmpɛɛ́ áwɛ̄n boŋ sékanlé nyé nkalaŋ ḿ bwâm, saké eʼyale běnpɛn bɔ́ɔ sêmpɛɛ́nné. Boŋ ngíne e Edəə́dəŋ éche Ésáá chɔ́ embɛ̌l boŋ sékalé nkalaŋ ne ngíne, sênkǒŋ-ʼɛ adúbe nɛ́n bán kéchéé éche séhɔ́bɛɛ́ édé mbále. Nyêbíí ngáne abɛ́ ádɛ̄d démbɛ̄ɛ̄ áde sémbɛ̄ɛ̄ ne nyé. Chǒm éche ênkə̌ŋ boŋ ábé nɛ̂ édíi âwóŋgɛn nyé. 6 Ne nyé, nyêhídéʼáá nyaa e abɛ́ echě sénwōŋgē, nyéhīdē-ʼɛ abɛ́ áde Sáŋgwɛ́ɛ́. Edəə́dəŋ éche Ésáá êmbɛ̌l nyêwóg menyiŋge akob áde nyénkobpé nkalaŋ ḿme sêmpɛɛ́nné áwɛ̄n. 7 Né-ɔɔ́, abɛ́ ádɛ̄n démbɛ̄ nɛ̂ŋgáne eláŋsɛ́n átîntê e bad ábe bédúbpé, ábe bédé á mbwɔ́g é Masɛdonia ne Akaya. 8 Nyɛ́ɛ̄ nyêkəə́ boŋ nkalaŋ ḿme Sáŋgwɛ́ɛ́ ńwógnéd mebwɔ́g mémpēe. Saké á mbwɔ́g é Masɛdonia ne á Akaya děmpɛn-ɛɛ́ ńwógnédé. Boŋ adúbe áde nyédúbpé Dyǒb dɔ́mpē áwógnédé hǒm ásyə̄ə̄l. Né-ɔɔ́, nzɔm ké pɔ́g eésaá echě séhɔ́bɛɛ́ ádɛ́n akan ámpē tə̂ŋgɛne nyé. 9 Ábê bad běn bɔ́ɔ bétime ahɔ́b ngáne nyênkobpé sé nken áde sépédé áwɛ̄n. Béhɔ́bé-ʼɛ ngáne nyétímné Dyǒb, nyétɛ̄dē-ʼɛ abɛle á myǒb mé metóm boŋ nyébɛnlé Dyǒb děn áde ádé á aloŋgé. 10 Béhɔ́be-ʼɛ ngáne nyésinɛɛ́ epɛ éche Mwǎn a Dyǒb awě abíde ádyōb. Ane Mwǎn a Dyǒb, Yesuɛ, awě asooʼ syánē ásē e nkɔ́gsɛn ń Dyǒb ḿme ńhúɛʼ, mɔ́ɔ̄ Dyǒb dêmpuúdté.