1 Timothy, nga angka ingwerew-anem iterr-aynteyew. Rlterrk-anem aneyenh Akngey-wenh-rnemewan, Jesus apey-alpeyew-alentyan.

2 Akngerranap ingwer-rnemew ilkelhey-angenh aneyenh. Ament inkwerelhemel anerl-aneyenh, ikwer-rnemewant iterr-aynteyenh. Rernemap ilkelh-aynteyenh man akngerrew ilek-ilek-thenew, nakelhemel inkwerelhemel anerl-aneyenh, ingwer-rnem-wety arlkarerremel. Akngerran angkerl-aneyenh angka apmwel arrarletyel-then ingwer-rnemewarl. Rernemap ikwer-rnem-wenh-thenew awelhey-angenh, antwerraynerl-aneyenh ikwer-rnem. Ingwer-rnemelan inerl-aneyenh ilek-ilek ingkerrenh ingwer-rnem-wety, inkwerelhey-angenh-anemarl ikwer-rnemew. Rernemap antwerraynerl-aneyenh ikwer-rnem. Rernemap awelhey-angenh Akngeyew, apmwangkwarr-antey alherl-aneyenh. 3 Ingwer-rneman mwerr aney-angenh ingwer-rnemew. Atwerrenty-penh amperrngerrey-angenh, antwerraynerl-aneyenh-antey. Rernemap alherl-aneyenh tyel-angkaynteyew ingwer-rnemew. Rerneman iterrerl-aneyenh-antey, apmwangkwarrant anaynteyew arrkent. Ahel-antey anerl-aneyenh, ingwer-rnem atwaynteyew. Ilkelhey-angenh, mwerr-angkwarr anaynteyew. 4 Ingwer-rnemelan ikwer-rnem apelty ahay-iwerl-aneyenh ingwer-rnemew, renh-rnem atwaynteyew ipmew. Alhewer rernem ilek-ilek mpwarerl-aneyenh, mwerranty-tangkwel iterrey-angenharl. Rernemap inkwerelherl-aneyenh tyak, nakelherl-anemel-antey. Rerneman anerl-aneyenh Akngeyew iterrey-angenh, arwa arrkentant alherl-aneyenh, iterrey-angenh ingwer-rnemew. 5 Christian-rnem-arrpantey rerneman iterrerl-aneyenh. Arrangkwarl, Akngey iterl-arey-angenharl. Inweng Mwerr-angker aney-angenh ikwer-rnem-itwew, arawerrng ikwerenh atnyeney-angenharl. Menty ikwer-rnem-itwew aney-angenh.

6-7 Artwa weth-lkwer-rneman alherlewem warl arrpanenh-warl, angka apmwa ilaynteyew arelh-rnemew. Arelh yanh-rneman nthakenh rlterrk iterrey-angenh, rerneman nyerrerreyelarl, awankarl apmwel-ayeth anenh. Rernemap intem apmwangkwarr aneyel, intem awelhemel angka apmwew-antey. Arelh rernem angka rlengkeny-angkwarrant aweyew, angka Jesus-akert iylpelerrewerrarl.

8 Timothy, ntwa angka awankeny iterl-areyel artwa ilkwa atherr-akert, awank-akerrarl Egypt-itwew anenh, itnanap Jannes-then Jambres-then? Ratherr atyetyart ilkwa Pharaoh artwerelew, Moses-el angka Akngey-wenharl ilenh-wety. Alakenh arrpemarl artwa weth-rnemelan aley ingwer-rnem artwereleyel, angka mwerr-angker Akngey-wenh awewerr. Irrtywerremel rernem ileyel apmwangkwarr, ilterreyel ingwer-rnem-then. Akngeyelanap renh-rnem irrenteyenh. 9 Ingwer-ingweranap ingkerrenhel iterl-areyenh, rernemarl arwengk-rneman angkeyel. Ingwer-rnem ikwer-rnemew anerl-aneyenh awelhey-angenh-anemarl.

10 Timothy, ngan ingwer yanh-rnem-apeny-weny aneyel, apmwangkwarrarl akalty-antheyel-rnemarl. Ntwap iterl-areyel, angka atharl akalty-antheyelan, ayenganap aneyel arraty-angkwarrarl. Ntwap ayenh arenh, Akngeyewarl ayeng warrkerrenh intem, ikwerant awelhemel. Ntwan ayenh arenh, arraty intemarl ayeng anenh. Ntwan ayenh arenh, warrk yanh atha iwerl-alhey-angenh-antey, rlterrkarl atyeng anenh-angkwarr. Aleth-antey ayengan warrkerrenh, angka Akngey-wenh akalty-anthemel. Ntwap ayenh arenh, ayengarl inkwerelhenh ingwer-rnemewan, aleth-antey ikwer-rnem ilkelhemel.

11 Ntwan iterl-areyelarl, ilek-ilek atyeng rlterrk anenh tawen irrpety yanh-rnem-itwew, Antioch, Iconium, Lystra-itwew. Artwa apmwernemelan atyeng rlterrk inngey arrernenh, irrwampenh-anthemel innga. Akngeyelanap ayenh arntarnt-arenh intem, ayengap anenh iteth-antey. 12 Alakenhap ra apmelerr aynteyel Akngey-wenh-rnemew, rernemarl ikwerenh-angkwarr aneyel arraty-angkwarr, ikwerant iterremel. 13 Apmwa yanh-rnem anyelk-awarr-rnem, rernemarl irrtywerremel ileyel, aleth-anteyap rernem anem apmwel-ayeth. Ingwer-rnemelan irrtywerremel arrpemarl ikwer-rnem-warl ilayntem.

14-15 Timothy nganap alakenh-wenyarl. Ngan intemarl arraty-angkwarr anaynteyew. Ntwap iterl-areyel, ingwer-rnemelarl angka mwerr-angker ngenh anthew. Angka ranap inngarl, ntwan iterl-areyelarl. Ngarl akelyank anenhel, ngap angka ikwer akaltyerrenharl. Akngeyelan artwa angkakert-rneman ilenh, rernem ingkwern-aynteyew pip-warl awank-akerr. Awelhemel anaynteyew ikwer. Angka yanhelan ileyel, Akngeyel anenhantherrenh itethelem apmwewety. Anantherran iterl-araynteyew, Jesus-arl katy ilwew anewantherr. Anantherrap intwemerlerreyew apmwewety, renhap ayern-ayntemel, anenhantherrenh arratyel-aynteyew. 16 Akngey ra ament-antey angka ilek-ilek ilew pip ikwerenh-itwew. Awank-akerr ra artwa angkakert-rnem ilenh, angka ikwerenh ingkwern-aynteyew pip-warl. Angka ikwerenh-angkwarran ran anenhantherrenh akalty-antheyel, arraty-angkwarr anaynteyew. Angka yanh-angkwarr rap anenhantherrenh ilteyelarl, anantherrarl apmwangkwarr-anem aneyel. Angka yanh-angkwarr ra anenhantherrenh arratyeleyel, anantherrap anerl-aneyenh rapeny-anem. 17 Alakenh-anyemap ra ikwerenh-rneman anenhantherrenh akalty-antheyel, anantherrap mwerr-angkwarr-anem warrkerreyew ikwer. Rap anenhantherrenh ilem, anantherrap awelheyew mwerr-angkwarr.