1 Jesus kwertengerl ikwerenh-rnem-akert alhenh, ra artwa aparrng arey-alhek. Ra aparrng anenh awey akelyank. 2 Kwertengerl-rnemel Jesus renh ayernek, “Akalty-anthenh-anthenhay! Ilek-penh artwa nhenh awey akelyank aparrngirrek? Amikw-then aynikw-then apek apmwangkwarr alhenh? Akngeyel renh aparrngilek alakenh-anyem apek?”

3 Jesus-el renh-rnem tyernek, “Menty! Artwa nhenh apmwangkwarr aney-angenh, amikw-then aynikw-then-antey, akelyank artwa aparrng anenh. Atha arrekantherr-itwek anngetherr mwerriletyek, arrantherr aretyek-awaty, ayeng rlterrk ilkwa Akngey-kenh-akert aneyel. Arrantherr rlwanty-anenherr-arey! 4-5 Ayeng ahern nhenhel Akngey-kenh lyenenty impen-antey, ahern-areny ingkerrenhek. Athanem ingkerrenh-angkwarr iwerr arraty ilerl-apayntetyek. Itwernel-awaty anwantherr warrkirr-ayntetyek Akngeyel ayenh thwenek ahern nhenh-warl, ayeng ikwer warrkirr-ayntetyek. Arlta atyenh arrerirreyel-kety ipmelhetyekan warrk-kety ingwel nthakenh warrk-kety ipmelhem-apeny.”

6 Ikwer-penhan ra ahern-warl apelh iwek, apelh atnthanem mpwarew, artwa aparrng renh-anem annga atherr apernek atnthel-anem. 7 Artwa ikwer-warl ra angkek, “Kwaty ngenty Siloam-warl alha, inngerr lhewelhetyek.” Artwa ra kwaty-warl alhek, inngerr-anem lhewelhek, irrarlkelhemel. Ra mwerranem arenh, annga rlketyek-anem. Kwaty Siloam alakenh aynteyel angka Aram-areny-kenhel, “Artwa renharl thwenek.”

8 Artwa aparrng-penh apmer-warl alpek. Ikwerenh-rnemel renh arek, apatemel-anem rarl annga rlkem-anem apey-alpek, ra aparrng-tangkwel ngkwelty manek aparelhenh. Rernem ayernerrenh, “Artwa wethang ran nhey nhenhan aparrng ngkweltyek aparelhenh iwerr impalthel anerl-anemel?”

9 Kel artwa ingwer-rnem angkerrenh, “Kel artwa rey-antey annga rlkeyel-anem!” Artwa ingwer-rneman angkerrenh, “Kel ra ikwer-apenyarl.”

Artwa aparrng-penh ranem ilelhek, “Kel ayengarl weth iwerr impalthel arrekantherr ngkweltyek inkeyam-ayntenh, aparrng-tangkwel.”

10 Rernem artwa renh ayernek, “Nthakenharl ntwa areyel-anem? Ilekel annga mwerrilek?”

11 Ra renh-rnem arraty-anem ilelhek, “Artwa anyent itnan Jesus ra ayenh atnthel apelh-penhel annga atherr apernek, rap ayenh ilanthek kwaty Siloam-warl alhetyek, inngerr irrarlkelhetyek. Ikwer-penh atha annga rlkelhemel-anem arek.”

12 Rernem renh ayernek, “Nthenh-anem artwa ra, rarl ngenh mwerrilek?”

Ra tyernek, “Inpa, rwengk.”

13-14 Artwa aparrng-penh renh Jesus-elarl mwerrilek atntha apelh-penhel arlta Saturday-el, ltyerrey-angker impen ikwerel. Alakenh-they rernem artwa renh Pharisee-rnem-warl atnwenhek, rernem renh ayernetyek, nthakenharl irrek. 15 Pharisee-el-rnem artwa renh ayernek, “Nthakenh ntwa mwerr-anem anngel-atherr areyel-anem?”

Artwa aparrng-penh ra tyernek, “Jesus-el ayenh annga apernek atnthel apelh-penhel. Ikwer-penh ayeng kwaty Siloam-itwek inngerr lhewelhek. Ikwer-penhan atha annga rlkemel-anem arek.”

16 Rernem ilterrenh ikwer-they. Pharisee ingwer-rnem angkerrek-anem, “Artwa rarl artwa nhenh mwerrilekan arlta Saturday-el, ltyerrey-angker impen ikwerel. Alakenh apmwarl! Ra Ingkart-kenh angkakert-wenyarl!” Pharisee ingwer-rneman angkerrenh, “Artwa ra angkakert Akngey-kenh apek, mwerr-angkwarrarl.”

17 Pharisee-rnemel artwa renh ayernek arrpemarl, “Nthakenh ngan angkem, artwa rarl annga atherr ngenh mwerrilekek?”

Artwa ra tyernek, “Artwa yanhan Akngey-kenh angkakertarl.”

18 Pharisee-rnem ikwer irrpeltherrenh, irrtywerrerl-anenty-arrpantey. Ra ikwer-rnem ilelhek arratyarl, rarl ampa akelyank aparrng anenh. Rernem amikw-then aynikw-then ikwer-atherr yangkelek, ratherr artwa ikwer-penh iletyek. 19 Ratherr apetyek. Pharisee-el-rnem renh-atherr ayernek-anem, “Nhenhang alerengkw mpwelekanthenh? Arratyang mpwelanth ileyel, akelyank-antey ra aparrng anenh? Alakenh mpwelanth ileyel, nthakenharlap ra areyel-anem?”

20 Ratherr tyernek, “Ya wenh, kel aylekanthenh. Arraty ra aparrng akelyank anenh.” 21-23 Jew-rnem atyetyart-rnemel angka arrwekel-antey arrernek, “Ingwerentyel Jesus renh Christ itnewenty, anwantherr renh irrentem tyaty anwekantherrenh-they. Iteng-atherr alakenh arlarl ilelhek, ratherrarl Jew atyetyart-rnem-kety aterirrenh. Lyertan aylanth iterl-arey-angenh, nthakenharl ra areyel-anem. Aylanth iterl-arey-angenh arrpemarl, angwenhelarl renh mwerrilek. Artwa ilkwa renhant ayernenherr-arey, ra kel arrekantherr ilelhetyek, ampa akely-wenyarl!”

24 Pharisee-el-rnem artwa renh ikngwerl-alpek arrpemarl, renh ayernetyek. Rernem ikwer-warl angkek, “Arraty inngant ilelha, Akngeyel ngenh arekerr. Anwantherr artwa renh iterl-areyel, rarl ngenh mwerrilek. Ra artwa apmwa!”

25 Artwa ra renh-rnem tyernek, “Atha artwa renh apmwa antwey-angenh. Arwa atha iterl-areyel, ayeng aparrng anenh awey akelyank, aleyan atha areyel-anem.”

26 Rernem artwa ayernek arrpemarl, “Nthakenharl ra ngenh mwerrilekan?”

27 Artwa ra tyernek arrpemarl, “Atha arrekantherr arrwekel-antey ilek, rarl ayenh mwerrilek. Arrantherr atyeng arrkent awelheyel? Arrantherr ilkelheyel, renh arrantherr apentetyek arrpemarl?”

28 Rernem renh iltek-anem, “Ntwarl ikwerenh-angkwarr apenteyel, anwantherr Moses-kenh-angkwarrant apenteyel? 29 Anwantherr Moses renh iterl-areyel, Akngeyelarl renh arrernek. Artwa yanh anwantherr iterl-arey-angenharl, apmer nthenh-areny?”

30 Ra ikwer-rnem-warl angkek arrpemarl, “Kel! Ranap anngetherr ayenh mwerrilekarl, aleyant atha annga rlkemel areyel-anem. Arrantherrap apmer ikwerenh renh iterl-arey-angenh, ran irrwerl-areny. 31 Anwantherr iterl-areyel artwa apmwel Ingkart renh ayernenty, ra ikwer nthakenh awelhey-angenh. Ingkart-kenh-angkwarrarl aneyel-rnemekant awelhem. 32 Awank-they alakenh ayntenh, artwa ahern-arenyel aparrng renh mwerriley-angenh. 33 Artwa yanhelan ayenh mwerrilekan, ran Ingkart-kenharl. Ahern-areny arrangkwarl. Innga, ran Ingkart-kenharl.”

34 Pharisee-rnem artwa aparrng-penh ikwer-warl angkek, “Nga apmwa anenh ampa akelyank. Ntwa anwenhantherr Ingkart-angkwarr akalty-anthey-angenh.” Rernem Jew-rnem-kenh tyaty akely-they renh irrentek-anem, “Ngan nhel aney-angenh wenh!”

35 Jesus-el awek, Pharisee-rnemelarl artwa renh irrentek tyaty akely-they. Jesus artwa ikwer nthwenh. Renh arey-alhek. Jesus-el renh ayernek, “Ntwa Artwa Impen Ingkart-kenh ayenh tnakeyel?”

36 Artwa ra ayernek, “Angwenharlap artwa ran, Ingkart-kenh Impenan? Atha renh innga tnaketyek arrpemarl inkwerelhemel.”

37 Jesus-el renh tyernek, “Ntwa kel anngetherr areyelarl! Ayeng rey-antey Artwa Impen Ingkart-kenh.”

38 Ra Jesus tyernek, “Ingkartay! Atha ngenh tnakeyel.” Ra ampwethel arrernelhek Jesus-itwek kwenirremel, inkwerelhemel.

39 Jesus angkek arrpemarl artwa ikwer-warl, “Ayeng apetyek ahern nhenh-warl, ingkerrenh atha arrkernetyek. Ingwer-rnem aparrng-apeny, ayenh iterl-arey-angenh. Atha renh-rnem annga mwerrilem-apeny. Atha renh-rnem akalty-anthem, rernem ayenh iterl-arem-anem. Mwerr-arrpantey tnakelheyel-rnem rernem apmwangkwarr aleth apenteyel amentel, artwa aparrngel iwerr apmwangkwarr apenteyel-apeny. Nthakenh atha renh-rnem mwerriley-angenh, akalty-anthey-angenh.”

40 Pharisee-el-rnem renh awek. Rernem Jesus ikwer angkek, “Anwekantherr ngan angkeyel? Ntwa anwenhantherr aparrng antweyel, apmwangkwarr apenteyel-rnem?”

41 Jesus angkek, “Arrantherr aparrng-apeny aneyel. Arrantherr ilelheyel, arrantherr Ingkart-kenh-angkwarr apenteyel-arrpantey. Arrantherr apmwangkwarr-antey aleth apenteyel.”