1 Saturday ingwel, arelh-rnem alhek, Mary Magdala-areny-akerr, Salome-akerr, Mary, James-kenh amikw-akerr. Rernem alhek anter inetyek, arrewaly renh apernetyek anterel. 2 Sunday atwemengkel-antey rernem awenng-warl alhek. 3 Rernem angkerreynenh, “Artwa angwenhel apwert yanh arnangelhileyenh intey-theyant?” 4 Rernem arenhek awenng intey rarl arrwekel-antey altywerirrek.

5 Rernem intey-warl aylpenhek. Rernem arek artwa anyent arnkwa arlter-akert anerl-anenty. Rernem aterirrek ikwerety.

6 Artwa anyent angkek ikwer-rnem, “Aterirreyang atyengety arrantherr! Atha arrenhantherr iterl-areyel, arrantherr apetyek Jesus Nazareth-areny aretyek, rarl arwerl iylpeyl-atherrel ilwek. Nhenh Jesus ayntey-angenh, arrangkw. Ra iteth akwentemel alpek. Nhenh arrantherr areyel, arrangkw. Arenherr-arey, nhelanyemarl ra ayntenh ipman! 7 Jesus kel alhek apmer Galilee-warl arrwekel-antey. Arrantherr alhentyel, arrantherr renh arey-alhem apmer Galilee-ek. Arrantherr Peter renh ilenherr-arey kwertengerl ingwer-rnem-then, atharl arrenhantherr ilek-angkwarr.”

8 Rernem intey-they aterel anterrek, artwa ikwerety. Rernem arrewey-alhek, ywarn iterl-aremel. Rernem angka iley-angenh-antey, Jesus-arl akemirrek-penh.

9 [Jesus kel itethirremel akwentek awenng-they. Rap aremirrek Mary Magdala-areny ikwer-warl, Mary irrkaty ikwer-warl, rarl arrenty 7-pel ikwer-they awank-akerr irrentek-warl. 10 Mary rarl arek-penh, kwertengerl Jesus ikwerenh-rnem ra ilek. Jesus ikwer kwertengerl ikwerenh-rnem apal amperrngirremel artnenh, ra intem ipmek ayntentyek-athen. 11 Mary renharl awek-penh, kwertengerl ikwerenh-rnem iterrek Mary-el irrtywerremel ilentyek-athen.

12 Jesus aremirrek kwertengerl ikwerenh-atherr-warl ampepel, apalarl ratherr tawen-they alpenh-warl. Ratherr Jesus renh arek arlka lyerteny-akert-anemarl ra aremirrek. 13 Kel, ratherr tawen-warl alpek. Ratherr kwertengerl ingwer-rnem iley-alpek, ratherrarl Jesus renh arek. Rernem renh-atherr iylpelant awenh irrpelthirremel, ratherr irrtywerremel ilerl-anentyek-athen.

14 Ingwer-ingeran Jesus aremirrek kwertengerl ikwerenh-rnem-warl-anem, rernemarl amern arlkwenh-warl. Jesus-el renh-rnem ilek, “Rernem ayenharl arek-penhel-rneman, inngarl arrekantherr-warl ilek, arrantherr ikwer-rnem irrpelthirrenharl, irrtywerremel ilenty-arrpanteyarl.” 15 Jesus-el renh-rnem thwenek. “Angka atyenh apmer arrpanenhek iley-ayntenherr-arey! 16 Rernem atyeng irrpelthirrey-angenh awelhem, rernem kel baptise inem, Ingkart Akngeyel renh-rnem intem-antey atnyenem. Ingwerel-rnem ayenh iylpelant awem irrpelthirremel, rernem ipma intem-antey aynteyenh. 17 Artwa anyent atyeng irrpelthirreyang awelhem, ra atyenh rlterrk ilkwakertel arrenty ingkerrenh-they irrentem. Artwa anyent rarl atyeng mwerr-angkwarr awelhem, ra tyakarl angka ingwerek-ingwer angkem. 18 Artwa anyent rarl atyeng awelhem, irrpelthirreyang, ra rtnwem anterrkwem tnhwey-angenh, arrangkw. Artwa anyent rarl atyeng awelhem, irrpelthirreyang, ra apmwa ilwenh-ilwenh antywem, nthakenh ra ilwey-angenh. Artwa anyent rarl atyeng awelhem, ra arntety-rnem mwerrilem ingkerrenh, itep ikwerenhel arnep-arnemel.”

19 Kel ilek-penh, Jesus ra alker-warl alpek, Ingkart Akngey-itwel aney-alpek intem-antey. 20 Kwertengerl ikwerenh-rnemel ilerl-apenh apmer arrpanenhek. Akngey-kenh rlterrk-akertel rernem arrenty ingkerrenh-they irrentek. Rernem arntety-rnem mwerrilek. Ingwerel-rnem renh-rnem arek, angkemel, “Akngey-kenh akalty inngarl nhernemey!”]