MATYU
Suialag Mo Matyu Ginofena
Hwa buk enaig esog
Hwa ginofba Matyu enaig sihifeg autunam God Israel elim sihi fwahani asa Sisas ati enam upugug. Afa God enaig sihifena og ka elim ningihiaiba asa ma blo nem pese lambi. Hwa suialag moba eba mango Ju elni mungu mo. Amo, enag suialag mo eba mungwali elni gafa fenig.
Maia Sisas hwa bite la gofenaba mangwal sa Sisasim puguna ena mom Matyu sihiageg. Afa Matyu enaig sihifiahgena maia Sisasim afag foklanam afa ikan ehem tigifatinibi asa ehe pese buihianam afa sisi gam fukukana.
Afa mingnag kwania mo Matyu sihiageg eba Godna bog meg mom sihig. Tok Pisinba enaig seflifig Godna Kingdom. Afa Sisas enaig gafuga ofefnaba ogna Godna bog meg mom sihiageaka. Ena buklaba eba afala gohug mo feg. Ena moba Sisas elim ogfufenugeg mo.
1. Afa angig mo sapta 5 fegim ikag 7 la pugug eba enaig esog Sisas mugla mo sihina. Afa ena nai yi Sisas enaig esona Godna elni nihe sa ma enaig gohei.
2. Afa angigieg mo sapta 10 la Sisas heafna patalfuiag elim enaig sihifeni og elim kana mo osihigon fibi sa ne mangwal fifie.
3. Afa olyi nai mo sapta 13 la eba Godna bog meg lasug mo.
4. Afa fignieg mo sapta 18 la eba haig nihe nufuna patalfuiag el sa ma fi.
5. Afa afala gohug mo sapta 24 fegim ikag 25 la pugug eba enaig esog awaieg osuna mangwal sa haig haig puguiagefe.
1
Sisasna simbianingag eba enaig eseg
1 Ena moba Sisas God Gisfu Fwahag Elni simbianingam suwigig. Ehe Devitna simbianinga afa Devit Abrahamna simbianinga.
2 Abrahamna leg Aisak. Aisakna leg Jekop.
Jekopna leg Juda afa heafna nilite. 3 Judana legnigi Peres i Sera i.
Ehenigina afag Tamar. Peresna leg Hesron.
Hesronna leg Ram. 4 Ramna leg Aminadap.
Aminadapna leg Nason. Nasonna leg Salmon.
5 Salmonna leg Boas. Heafna afag Rahap.
Boasna leg Obet. Heafna afag Rut. Obetna leg Jesi.
6 Jesina leg Devit eba misog el. Devitna leg Solomon. Autunam heafna afag eba Uriana angwag.
7 Solomonna leg Rehoboam. Rehoboamna leg Abiya.
Abiyana leg Asa. 8 Asana leg Jehosafat.
Jehosafatna leg Jehoram. Jehoramna leg Aisaia.
9 Aisaiana leg Jotam. Jotamna leg Ahas.
Ahasna leg Hesekia. 10 Hesekiana leg Manase.
Manasena leg Emon. Emonna leg Josaia.
11 Josaiana leg Jekonia afa heafna nilite. Enanam Babilon el Israel elim wanafunam heafgelni bite la lasani.
12 Maia lasanibi Jekoniana leg Sealtiel. Sealtielna leg Serubabel.
13 Serubabelna leg Abiut. Abiutna leg Eliakim.
Eliakimna leg Eso. 14 Esona leg Sadok.
Sadokna leg Akim. Akimna leg Eliut.
15 Eliutna leg Elieser. Elieserna leg Matan.
Matanna leg Jekop. 16 Jekopna leg Josep.
Josep Mariana alagag. Afa Maria Sisasim wanigana. Sisasba seflig Krais God Gisfu Fwahag El. 17 Afa Abrahamna simbianinga gohugum ikag Devit nai yi pugug eba 14 la gohug. Afa Devitna simbianinga afohianam enanam Babilon Israel elim ambe wanafuna eba 14 la gohug. Ena nai yi gofenaba God Gisfu Fwahag Elbi gohna eba gwenaig eseg 14.
Maria Sisasim God Gisfu Fwahag Elim wanigana
Luk 2:1-7
18 Sisas Krais, God Gisfu Fwahag El, gohug mo enaig eseg ehena afag Maria ati Josepim eso fwahini og ma Josepnai yi gai. Afa mas ika gana mo, afa nangunibi Maria Godna Sungwabug ati afnialigni fena. 19 Ehena alagag Josep eba suialag el. Ehe ogna ehem flagim fwaha. Ehe mo ambala sihiagim oksina afa sa mas Mariam afwanef mo faina mo. 20 Josep enam onigkafnaba afa itila Godna oflanai el blona ehem puguna. Enag oflanai el esona og, “Josep Devitna simbianinga nofeka Mariam flagiba embefe. Sa hig enaba afnialigni wanigiahba el mas enaig eseg mo eba Godna Sungwabug ehe faig enag luwalba. 21 Enaba fagonai luwal wanigafe. Afa ne ehena unehlagimba Sisasim unehlig asa mungwali heafna elni amtakwalig mo huguflaitinam afa ehefum lambfe asa God ehengelim mas mungwa faifi.”
22 Enaba pugunaba Ainiyag ati Godna mo fli sihiule elni mengig la sihi fwahanaba ena moba nufunam puguna, mo fli sihiule el esona og;
23 “Higim, angwafig mungu angwaming alagagla ga fwainig afnialigni afa fagonai luwal foklafe. Afa unehlagba Emanuelim seflife.” Ais 7:14
Enag mog unehlaba ‘God bigim wanga.’ 24 Josep ginim buihianam asa gwenaig esena Ainiyagna oflanai el asa sihinagenaba asa ehe enag angwafigbi flana. 25 Angwafigbi flanam mas mungua kifela ahginimo awai esug afena afa asa luwal fagona waniganaba. Afa asa ehe Sisasim unehlana.