4
Age kis cunug temadi feiga, eu kis Anutnadecfo, qeefo eunu
1 O ijana danah bahic, je hahun uhulec madec dana mati bahic mahana cocobi hatu cunugna belegina. Eunu age je hahun madec dana cunug age ageca humeig madegina, “Anutna Kis uqa je i iten,” egina eunu cain meleowain. Euqa eu kis Anutnadecfo, qeefo eunu age kis cunug temadi feiga. 2 Age Anutna Kis ec doqagannufi kobol eu odi. Je hahun madec dana oso uqa madena, “Jisas Krais uqa dana deweg calen,” ena eu Anutnadec, Anutna Kis eu dana uqaca bilia.* Jon uqa jaqec je i jaqen saenna uhulec je hahun madec dana leih age Jisas Kraisnu je leih madein. Je eu tutuc qee. Ege je eunu qee du cuhadoqona, euqa doc dana leih age dana eundec dana cajaca odi iwaladein. Jisasca, Kraisca ale caca qee. Krais eu Je i wele gug qocna sao mahaca qee ifanecna Anutca bilen. (Age Jon 1.1 feiga. Odocob eu Anut Melah. Krais uqa dana calen, eu mele, qa Anut uqa dana cajaca cahahaadecnu cabi on eu uqa Krais ebenna himec odon. Ceteteh cunug Jisas dana uqa mahana bibili li cal memei odon eu Kraisna cabi qee. Odimei eu dana cajaca cahahaadecnu cabi qee cesuldol. Euqa Jon uqa uhulec je hahun madec dana agena je eu mele qee ec maden. Jisas Krais uqa Anut Melah, odimei uqa dana bahic calen. Odimei uqana cabi oc odon eu cabi oc osol himec. 3 Odocob je hahun madec dana uqa Jisasnu je eu odi qee madena kis fil oso eu dana uqaca bilia. Kis eu Kraisna cad, age wele eu hugiannu dah mein. Odocob qila eu wele hon bilia.
4 O ijana mel sim, age Anutnadec. Odocob Kis uqa age dunuh bilina uqa kis eu mahanadec dana age dunuh bilina eu wooldona. Eunu age je hahun uhulec madec dana eu wele wooladein. 5 Je hahun uhulec madec dana eu age mahanadec. Eunu agena je madec eu mahanadec himec, odocob mahanadec dana age agena je dah megina. 6 Euqa ege Anutnadec. Oso uqa Anutnu du cuhadona eu uqa egena je dah mena. Odocob oso uqa Anutnadec qee uqa egena je qee dah mena. Ege kobol euna kis eu melefo, qee kis eu uhulecfo ec doqona.
Dana uqa Anutnu nalug mena eu uqa cotugulnuha nalunuga mena
7 O ijana danah bahic, nalug mec eu Anutnadec, eunu ege nalug mecebmeceboqale. Odocob oso uqa nalunuga mena eu uqa Anutna mel ibuldon, eu uqa Anutnu du cuhadona. 8 Anut uqa nalug mec gug. Eunu oso uqa nalunuga qee mena eu uqa Anutnu qee dona. 9 Anut uqa Melah osol himec. Odocob Anut uqa ege uqanu cebac bilec oqannu Melah osol eu suldocob mahana nen. Kobol euna Anut uqa egenu nalunige geh bahic mena euna ihacgen. 10 Anut uqa nalug mec kobol me bahic eu odi ihacgena. Ege casac Anutnu nalug mom eu qee nijel. Euqa casac Anut uqa egenu nalunige meceb uqa Melah uqadodoc Anut ihandumei uqa euna Anutna gemag bec gondocob egena silail cagasigigiannu suldocob nen.
11 O ijana danah bahic, Anut uqa kobol euna uqa egenu nalunige geh bahic mena eunu ihacgen. Eunu ege nalug mecebmeceboqale. 12 Oso uqa Anut qee fel. Ege cotigeilnu nalunuga moqonafi Anut uqa ege dunuh bilina, odocob uqana nalug mec eu egeca gagadic ihoc bilina.
13 Anut uqa uqana Kis igen. Eunu kobol euna ege uqaca gabandoc biluquna, odocob uqa egeca gabandoc bilina ec doqona. 14 Odocob Memige Anut uqa Melah dana cajaca cunug mahana bilegina eu cahahaadigiannu suldocob nen eu fom eunu je qasali madoqona. 15 Oso uqa Jisasnu uqa Anut Melah ec madena eu Anut uqaca gabandoc bilina, odocob uqa Anutca gabandoc bilina.† Age je 1 Jon 4.2na nijia eu feiga. 16 Eunu ege Anut uqa egenu nalunige mena eunu dumeb wawige meleena.
Anut uqa nalug mec uqana gug. Eunu oso uqa nalunuga mimi bilina eu uqa Anutca gabandoc bilina, odocob Anut uqaca gabandoc bilina. 17 Ege maha ina Kraisca biluquna eu odiwe Krais uqa Memeg Anutca bilesina. Eunu ege gesilgec deelna Anut amegna tawecnu qee cucuieqannu Anutca gabandu biluquna. Odocob ege odi bilocomunfi egena nalunuga mec kobol eu ihoc ligian. 18 Anut uqa osonu nalug mena eu uqa Anut qee cucuidona. Euqa nalunuga mec eu dana osona cebac bilecna ihoc lecebfi dana eu cucuiec culigian. Ge, cucuiec uqana gug eu Anut uqa dana gesildocob ameg me qee ugian. Odocob dana oso uqa cucuiena eu nalunuga mec eu uqana cebac bilecna ihoc qee lel.
19 Anut uqa casac egenu nalunige men. Eunu ege cotigeilnu nalunuga moqona. 20 Oso uqa cotig wele fen uqanu nalug qee mena eu uqa Anut qee felnu nalug mecnu ihoc qee. Eunu oso uqa madena, “Ija Anutnu nalug migina,” enafi qa uqa cotignu gemag beceb sagagdona eu uqa uhulec dana. 21 Odocob ege je gagadic i Kraisnadec om eu odi. Oso uqa Anutnu nalug mena eu uqa cotignuha nalug migian.
*4:2: Jon uqa jaqec je i jaqen saenna uhulec je hahun madec dana leih age Jisas Kraisnu je leih madein. Je eu tutuc qee. Ege je eunu qee du cuhadoqona, euqa doc dana leih age dana eundec dana cajaca odi iwaladein. Jisasca, Kraisca ale caca qee. Krais eu Je i wele gug qocna sao mahaca qee ifanecna Anutca bilen. (Age Jon 1.1 feiga. Odocob eu Anut Melah. Krais uqa dana calen, eu mele, qa Anut uqa dana cajaca cahahaadecnu cabi on eu uqa Krais ebenna himec odon. Ceteteh cunug Jisas dana uqa mahana bibili li cal memei odon eu Kraisna cabi qee. Odimei eu dana cajaca cahahaadecnu cabi qee cesuldol. Euqa Jon uqa uhulec je hahun madec dana agena je eu mele qee ec maden. Jisas Krais uqa Anut Melah, odimei uqa dana bahic calen. Odimei uqana cabi oc odon eu cabi oc osol himec.
†4:15: Age je 1 Jon 4.2na nijia eu feiga.