1 Ege je i madoqona euna ege qila egedodoc binanige sulecnu haun sanan moqonafo? Qeefi, dana leih age ege dana me bahic tutucca ec jaqec je oso jaqimeig Korin tamanec sulduadecnu gale adena. Odocob egeha qila dana i age cinigwe odi jaqec je oso sulduadoqonafo? Qeefi, ege age Korin jaqec je i edi oso cesulgecnu jaqeiga ec maadeqanfo? Eu odi qee nijel! 2 Age dih jaqec je cinigwe bilegina age ege dumanigenu dana cajaca maadecebil dogina. Jaqec je eu ege wawigena nijia eunu dana cajaca cunug age sanijimeig dogina. 3 Krais jaqec je oso jaqenwe odi age camasac bilegina. Ege jaqec je i Kraisnadec umeb suldocomun ageca len. Krais uqa jaqec je i inkca qee jaqel qa uqa Anut Cebac Bilec uqana Kis euna jaqen. Odocob uqa jaqec je i meen fanna qee jaqel qa uqa dana wawagana jaqen.

4 Ege je i eetanu madoqona? Eu age jaqec je oso Krais jaqen eunu ege wawige meleena. Eunu age ege aposel cabi i Anutnadec umeb tutuc odom eunu camasac ihacegina. Odocob Anut uqa cabi i Krais umna igen eu mele bahic. 5 Eu mele, ege egedodoc cabi i ocnu ihoc qee. Eunu ege egedodoc ceteh oso odom ec qee madoqaun. Anut uqa dih odigeceb ege cabi ocnu ihoc. 6 Anut uqa odigeceb ege bal cehec je haunna cabi dana biluquna. Loo je jaqec eu dana aqeceb cal megina qa Kis eu cebac bilec dana adena. Eunu Anut uqa bal cehec je haun i loo jena qee jaqel qa uqa Kisna jaqen.

7 Cisdoiga. Loo je dana adecnu cabi Anut on eu odocob dana cajaca cunug age cal mec calen. Euqa Anut uqa loo je meen fanna jaqimei dana aden saen euna loo je eu fulacdoc benca hon. Eunu Moses ola eu ileten. Odocob Isrel dana cajaca age Moses ola fecwe qee. Odocob hibna fulacdoc eu qee men. 8 Eunu Anut uqa Kis dana adecnu cabi oc eu uqa loo je dana adecnu cabi oc eu wooldumei fulacdoc ben bahicca hugian. 9 Ge, loo je Anut dana aden eu dana age silailca fadaloqagan ec ihacaden eunu cabi eu fulacdocca. Eunu Anut uqa dana cajaca eu age ititomca ec maden eunu cabi eu fulacdoc ben bahic. 10 Eu mele bahic, cabi haun i uqana fulacdoc eu cabi weledec uqana fulacdoc geh bahic wooldon. Eunu cabi i wele fulacdocca bilen eu qila fulacdocca qeewe bilia. 11 Cabi weledec i gaid bilecnu ihoc qee, eu odocob qee men. Euqa cabi weledec eu fulacdocca hon. Eunu cabi haun eu fulacdoc ben bahicca hu bileceb catanigian.

12 Ege cabi haun i fulacdoc ben bahicca hugiannu wawige meleeceb sumudi biluquna eunu ege qee cucuiolom. Ege eunu camasac qasali madoqona. 13 Ege Moses cinigwe qee odoqona. Uqa Isrel dana cajaca age ola iletec qee mena eu fowainnu uqa lotoc nahana ola jahuldon. 14 Euqa age wawagana tool men. Odocob huhu qila deel ina age bal cehec je jaqec weledec sasaniji bibileig lotoc naha eu dih gaid agena cisdoc jahuldona. Krais uqa himec lotoc naha eu cagasena eunu age bal cehec je eu qee fogo adena. 15 Eu mele, qila deel ina cel saen age Mosesna loo je mele sanijegina qa euna lotoc naha eu gaid agena cisdoc jahuldona. 16 Euqa dana oso uqa waug tului Tibudnu falicdocobfi Anut uqa lotoc naha uqana cisdoc jahuldon eu cagasena. 17 Aria, ija Tibud ec madigina eu Kis. Odocob Tibudna Kis eu dana osoca bilecebfi dana eu uqa besitoc bilina. 18 Odocob ege cunug, ege olanige jahuldocca qee biluquna, ege Tibud fulacdoc gagadic odocca foqona. Odocob Tibudna fulacdoc eu ege too qigimei fulacdocca ibulgena. Odocob ege fulacdoc eu haunhaun umeb ege Tibudwe caloqona. Ge, fulacdoc gagadic odocca eu Tibudnadec hona, odocob Tibud uqa Kis.