3
Pita Jonca dana jaih laleg mec me mudesin
1 Deel osona Pita Jonca wesu 3 kilok odi inondoc saenna ale tempelna tesin. 2 Tetesin ono Jic Cebec Nege Bahic odi madoloig euna dana oso uqa simnadec jaih laleg mec bilen. Deel cunugna uqa dana age tempel dunuh lelebil meen qaignu niniadigiannu gahidu ehi li tempel jic cebecna mudoloig. 3 Saen uqa Pita Jonca dunuh lelesin mecialimei uqa ceteh oso utuwasannu ninialen. 4 Ale gugca mecidosin. Odimesi Pita madon, “Hina ele mecilaga!” don. 5 Odocob uqa ceteh oso utuwasan ec cisdumei uqa mecialen. 6 Euqa Pita madon, “Ija meen qaigca qee qa ija ceteh osoca eu hina ihigen. Jisas Krais Nasaretdec ijanna mahigina cajimeg coboga!” don. 7 Odimei uqa eben meulana hewi suldocob cajen. Mahuc bahic dana eu jaih cabal jaih katca gagadic men. 8 Uqa bitacimei caji tawen. Odimei cobocnu temdon. Uqa tooalimei cocobi bitacii Anut binan susulien tempel hamol lein. 9 Oodon dana ono bilein eu uqa cocobi Anut binan susulen fein. 10 Odimeig uqa dana jaih laleg mec tempel Jic Cebec Nege Bahic eginanu meen qaignu ninii bilina eu wele fein. Age cunug dana jaih laleg mec cocobon fimeig filicitimeig dadanein.
Pita tempelna me je qasali maaden
11 Saen dana eu Pita Jonca hewalen tatawen Solomonna hamol eu odi madoloig euna dana dadanimeig guguli fecnu ageca lein. 12 Saen Pita meciadimei maaden, “Isrel dana, age eetanu ceteh i edinu filiciteiga? Eetanu gugca mecigegina? Age elena gagadic odocnafo, elena ititom cobocnafo odi odudocohul coboia ec cisdoginafo? Eu odi qee. 13 Ebraham Aisak Jekobca agena Anut, ege jajanigeil agena Anut, uqa uqana cabi dana, Jisas, ijan meca gagadic odocca uten. Jisas i age Pailat ebenna mudimeig, uqa Pailat culdeceb nuigiannu wele cisdon, age Pailat amegna uqanu je me qee madein. 14 Euqa age Dana Gun Bahic, Dana Ititom Bahic uqanu je me qee madein. Odimeig Pailat agena gale adec toodugiannu sisildocobil uqa han dana qagaadec eu gihacdoc jonadec besiton. 15 Age madecebil age Dana Cebac Bilecna nuecnu jic dado migec eu qoin. Euqa Anut cal mecnadec tulidocob cajen. Ele eu fimeu qasali maadowona. 16 Jisas ijanna gagadic odoc dana i amagana fegina age dana i uqa Jisas ijannu waug meleec euna gagadic meia ec dogina. Uqana Jisasnu waug meleec age amagana me mudia,” aden.
17 “O cotiel, ija age agena iwaladecca age Jisasnu qee doloin, eunu age odi odoin ec mele dugina. 18 Euqa Anut wele bahic ceteh i cali hugiannu maaden. Uqana je hahun madec dana conogana maden, ‘Age Anutna Krais eu dain ben umei gahidugian,’ en eu odi mele bahic ihoc len. 19-21 Tibud uqa agena silail cagasiadigiannu gale dona. Odocob Tibud uqa age dolonoga gagadic odoc ocnu saen dodoldodob uqa cemenugnadec ageca suldocob nigiannu gale dona. Uqa uqana Krais uqana dana caja cahahaadecnu wele nesili ehuden, eu Jisas, eu suldocob nigiannu gale dona. Jisas uqa sao jobon bibileb saen maha ina ceteh haun cali hugiannu eu odi Anut uqana je hahun madec dana gun welewele bilein eu conogana maden. Eunu Anut uqa odi odigiannu silailnu tului falicdoiga. 22 Weleca Moses maden:
‘Anut Tibud ija ageca sulteceb homwe eu odi uqa je hahun madec dana oso hibna age gemonadec ageca suldocob hugian.
Uqa je maadeceb age jejeg toodu odoigale.
23 Odocob oso uqa jejeg qee toodu odigiaqa uqa geldocob fadaligian.
Odocob uqa Isrel agena sihul qee biliaun,’ en.* Hahun je madec dana i Anut suldocob hugian eunu Pita maden, eu Jisas. (Loo 18.15, 18-19)
24 Anutna je hahun madec dana cunug Samjuelnadec leceb uqa toodoin eundec ageha qila deel ina ceteh adi cali hugian euha madein. 25 Age je hahun madec dana talaculunugail. Agenu je hahun eu madein. Anut uqa bal cehec je age jajanagail weledec maaden eu age mugumuga nijia. Uqa Ebraham madon:
‘Hibna hinana sihulna dana cajaca cunug maha ina biluqagan age eeladec oqagan,’ don. (Jenesis 22.18; 26.4)
26 Eunu Anut uqana cabi dana ehudimei uqa age eeladeceb age abesabes agena qisol mec kobolnu tului falicdoqagannu uqa casac ageca suldocob nen,” aden.