1 Odocob Agripa Pol madon, “Hina qila cois hinadodocnu hinanu je madaga,” don. Odocob Pol eben suli umei uqadodoc uqanu je odi maden, 2-3 “King Agripa! Hina Juda agena kobolnu sisilecnuca cunug du cuhadogona. Eunu ija ijadodoc ijanu mele je himec qila hina amenna Juda dana ceteteh cunugnu ija balijitein eunu ha madigen eu me bahic. Eunu ija hina cehna dah miti bibilem mahigen,” en.

4 “Juda dana cunug age ija wele mel haunna adi bilem eu dogina. Ija simnadec sanan mimig ijana hatuna bahicca Jerusalemca bibili cocobi hom adi bilem eu age dogina.* Pol uqa sim bilen saenna uqa Tasas taun ono Silisia hatu nagna bilen. Age Aposel 22.3 feiga. 5 Wele bahic age dudu hoin eu age ija deweninu je qasali madecnumi eu casac bahic ija egena am gun bahic euna bilem eu Farisi, agena jic coboc toodu cuhadom age gaid doloig. 6 Odocob Anut uqa je hahun ege jajanigeil maaden eunu wawi meleecna eunu qila ija ene temtecna tawiga. 7 Je hahun eu ege Juda dana agena sihul 12-pela cunug ocnu wawaga ben bahic ninijen age Anut witic cahinegca binan suloloig. O King, wawi meleec eunu Juda dana age balijitegina. 8 Eetanu Juda age madegina, ‘Anut uqa cal mecnadec tuliadeceb cajecnu wawige qee meleeiaun,’ egina?” en.

9 “Ija jic filfilna Jisas Nasaretdec ijan me qee mudigen ihoc ec cisdom. 10 Jerusalem ono eu odi odom. Ija je cois ec ihanec dana benben cabi itecebil Anutna qagu coboc dana cajaca mati bahic gihacdoc jona madem. Saen age euna aqecebil cal mecebil ija eunu cois olig. 11 Saen geh bahic Juda agena cuha cunug jonana culumen adolig. Agena wawaga meleec hibemdoqagannu odadolig. Ija eu agenu gemani gagadic beben taun ben hatu filfilna nijoloig han mige bili jabadi tooadolig,” en.

12 “Odocob ija eu odi odigennu ihanec dana benben agena je gatiti matiti cabi itecebil Damaskas nuem. 13 O King, nunuigin jicna cahineg cam gemo cehen tatawen saonadec fulacdoc camna iletec wooldoc ijaca dana osoben belom gami ileti talgen fem. 14 Odocomin ege cunug toni mahulom ninijuqun jejeg oso Hibru jena ija mateten dah mem. Uqa maten, ‘Sol, Sol! Hina eetanu jabiti tootootagana? Hinadodoc ceteh aigca tohol qocom jeihina eu bulmakau cinigwe culum hewec dana uqa kom aigca ihocdocob jaih toholeceb uqadodoc qonawe qihina,’ ten. 15 Odocob ija sisildom, ‘Tibud, hina in?’ dom. Odocob Tibud maten, ‘Ija Jisas, hina jabi tootoodogona eu. 16 Euqa caji tawaga. Hina ijana cabi dana ehihigennu hinaca camasac miga. Hina qila ijana odoc fimeg qasali maadegan. Odocob hibna ceteh ihachigen eunu ha qasali maadegan. 17 Ija Isrel danaca Juda dana qee eundecca age ebeneganadec cacawihi oihimig eu ageca sulhigen. 18 Hina eu age amaga hulelduadecem age tu hibemdumeig fulacdocna falicdoqagan. Odocob Setenna gagadic odoc culimeig Anutca hoqagan. Eunu ijanu wawaga meleeceb agena silail cagasiadecemin agena cudun Anut dana qagu maden ageca oqagan,’ ten,” en.

19 “Eunu, O King Agripa, ija saonadec majaudoc amina calen eu qee wooldolom. 20 Ija casac Damaskas me je maadimig hibna Jerusalemca Judia hatu cunugnaca Juda dana qee eundec ageha maadem. Agena silail hibemdumeig Anutca falicdoiga ec maadem. Odimeig age agena silailnu tului falicdoin uqana odoc eu ihacecnu ec maadem. 21 Eu odi odomnu Juda dana tempelna hewitimeig qagatoqaga odoin. 22 Weledec hocob deel ina bahic Anut ija cesulteten ija dana ijanagaca ijanagaca qeeca je qasali maaadi ene tawiga. Ija madigina je hahun madec dana ageca Mosesca odi cali hugian ein eunu himec maadigina. 23 Je eu odi Anutna Krais uqa dain ben dugian. Odocob uqa cal mecnadec aquniadi ceseli cajigian. Uqa Juda dana Juda dana qee eundecca fulacdocna je Anut age cahahaadecnu ihoc ec maadeceb doqagan,” en.

24 Odocob Pol eu odina uqadodoc uqanu je mamaden Festas gagaladon, “Pol, hina gad! Hinana doc ben bahic odiheceb hina gad magana!” don.

25 Odocob Pol jejeg hewi madon, “Festas meca! Ija gad qee. Ija je madigina eu mele bahic, docnu me bahic. 26 King Agripa uqa ceteteh i agenu dona. Eunu ija je cunug saluqi u madugina. Ceteteh i eu jahunec sucunna qee calel. Eunu ceteteh i cunug dona eu ija dugina,” don. 27 “O King Agripa, hina je hahun madec dana agena jenu wawin meleenafo? Hina wawin meleena eu ija dugina!” don.

28 Odocob Agripa Pol madon, “Saen gohic ina hina oditecem Kristen dana migen ec cisdogonafo?” don.

29 Odocob Pol jejeg hewi madon, “Saen gohicfo, saen cecelacfo ijana Anutnu inondoc eu hinaca dana qila ene ija dah miteginaca eu age ija cinigwe ibuldoqagan. Sen iqa agenu cain biliaun!” don.

30 Odocob kingca gabman iloca Benaisica cunug age gami bilein age caji tawein. 31 Odocob age hamol osona belimeig togodudu madein, “Dana i ameg oc cal mecnuca gihacdoc jona mudecnuca ceteh oso odocnu qee nijel,” ein. 32 Odocob Agripa uqa Festas madon, “Dana i uqa Sisa amegna je haun madecnu qee sisiloubmi ege gihacdoc jonadec besitoum,” don.