Pol Uqa Jaqec Je Oso
Galesia Tamanec Jaqiaden
Aqunec Je
Casac Jisasna malogom eu Juda himec. Euqa hibna Jisas uqana aposel Pol suldocob uqa Juda dana qee eundec me je qasali maaden. Odocob dana cajaca i age Jisasnu wawaga meleen. Euqa saen euna culumen oso calen. Wele dana cajaca i age Juda qee, eunu age Mosesna loo je qee toodoloig. Eu Juda himec Mosesna loo je toodoloig. Euqa Juda dana caja qee eundec age Kristen calein saenna Kristen Juda leih age dana caja eu Mosesna loo je toodoqagan eunu cisdoin.
Eunu Kristen Juda leih age Kristen Juda dana qee eundec dewenega cagu qocnu madein. Odimeig Kristen Juda dana qee eundec age Mosesna loo je cunug toodocnu madein. Euqa Pol uqa qee ec madena. Uqa madena, “Ege doqona, Anut uqa dana oso uqa Mosesna loo je toodu odonanu uqa dana ititom ec qee madena qa uqa dana oso uqa Jisas Kraisnu waug meleenanu eu himec uqa dana ititom ec madena,” ena. (Age 2.16 feiga.) Eunu Kristen egena odoc eunu ege Anut amegna ititom qee tawoqona, egena wawige meleec eunu himec ege Anut amegna ititom tawoqona. Ege Jisasnu wawige meleeceb cebac bilec haun oqona. (Age 2.20 feiga.) Pol uqa odi madena.
Aria, Kristen Juda leih age Galesia hatu ono belimeig Kristen cunug age Mosesna loo je cunug toodocnu odadoqaga odoin eu odi fena. Odocobil Pol uqa ceteh i calennu je dumei uqa Galesia agena wawaga meleecca, agena Kristen kobolca tutuc mudecnu jaqec je i jaqiadi sulduaden.
Pol uqa casac Anut uqadodoc odudeceb uqa aposel calen ec madena. (Eu 1.11-24 feiga.) Euqa uqa aposel Jerusalem bilegina agena gale adec qee toodol. (Eu dac 2 feiga.) Anut uqa Pol utadumei uqana aposel cabi uteceb uqa Juda dana qee eundec Kraisnu me je qasali maaden. Odimei dana caja cunug age Jisas Kraisnu wawaga meleeceb euna himec age Anut amegna dana caja ititom tawegina ec madena. Cit qoc jena (eu dac 4-6) Pol uqa odi madena. Krais uqa ege Kristen dana odigeceb ege qila besigec biluquna. Odimei Kis Gun uqa egena coboc dado migeceb ege kobol me bahic dana cunug odadoqona ec madena.
Je Dunuhnu Dado Mec
1. Aqunec je (1.1-9)
A. Feele adec je (1.1-5)
B. Me je osol dih bilia (1.6-9)
2. Pol uqa aposel bahic, odimei uqana me je madec eu Anutna bahic (1.10-2.21)
A. Jisas Krais uqa Pol gulucdocob aposel calen (1.10-12)
B. Pol uqana me je Jerusalem aposelca Kristen dana osoca eunadec qee ol (1.12-2.21)
1. Uqa Kristen casac calen euna uqa aposel aquni calein eu age sisiladecnu Jerusalem ono qee tel eunu (1.13-17)
2. Cabi gel cijed hedocob uqa Pita Jemsca gauc fecialecnu Jerusalem ono ten eunu (1.18-24)
3. Cabi gel 14 hedocob uqa haun Jerusalem timei aposel leih ono bilegina uqana me je jahuni sildiaden eunu (2.1-10)
4. Pol uqa Antiokna Pitana cahuldoc eunu ulauldon eunu (2.11-21)
3. Wawige meleecca besigec bilecca eu mele (dac 3-4)
A. Galesia age adi me je oin (3.1-5)
B. Ebrahamna coboc (3.6-9)
C. Dana cajaca age ititom coboc ocnu loo je toodu odogina eu age Anutna geladec bisalu bilegina (3.10-14)
D. Anutna loo je eu Anutna muguh mecnu je hahun ititacdocwe qee (3.15-18)
E. Eetanu loo je calen (3.19-25)
F. Ege begabeg meh qee, ege Anut melahul (3.26-4.11)
G. Pol uqa Galesia age loo je toodocnu kobol culimeig Kraisna besiadec bilec loqagannu niniadena (4.12-20)
H. Hega Seraca alena dodo eu galolo je cinigwe (4.21-31)
4. Wawige meleecca besigec bilecca adi odeqan (5.1-6.10)
A. Ege gaid besigec biluqale (5.1-12)
B. Ege dewenige gale doc toodu cain odoqaun, ege Kisna dado migecna jic coboqale (5.13-26)
C. Kristen ege cesuldocobdocoboqale (6.1-10)
5. Cit qoc je (6.11-18)
1
1 Ija Pol, ija aposel. Dana age ija qee sultelein, odocob dana oso ija utatimei aposel qee mitel. Euqa Jisas Kraisca Memige Anut uqa Jisas Krais cal mecnadec tulidocob cajen uqaca utatimesi aposel mitesin. 2 Ijaca wawige meleec cotiel age cunug ijaca gabangi biluqunaca ege tamanec age Galesia hatuna bilegina ageca feele ec sulduadoqona.
3 Memige Anutca Jisas Krais Tibudca alena uum igecca malol bilecca adesiale. 4 Jisas Krais uqa Memige Anutna cisdoc toodon. Odimei uqa qisol mec saen i qila bilina ege saen ina uqana gagadic odocnadec besigecnu egena silailnu uqadodoc deweg ihandumei cal men. 5 Eunu ege Memige Anut binan gaid sulocomun cataneiale! Mele.
Me je osol dih bilia
6 Ija age kobol i odogina eunu filicitigina! Krais uqa eeladec uum aden. Odimei Anut uqa Kraisna eeladec uum adecna age uqana dana cajaca biluqagannu utaaden. Euqa age mahucwe utaadec eu culdimeig me je fil oso toodogina. 7 Ija me je fil oso ec madigina qa me je fil oso qee bilel. Euqa dana leih age Galesia agena wawaga ihulahaldumeig Kraisna me je ilag falicdogina eunu ija odi madigina. 8 Euqa egefo, saonadec ensel osofo age me je fil oso maadoqagan eu me je ege wele maadom cinigwe qeefi dana eu odi madena eu uqa ja benna fadaligian. 9 Ege i wele maadom odi qila ija haun maadigina, dana oso uqa me je fil oso maadena eu me je ege wele maadocomun oin cinigwe qeefi dana eu odi madena eu uqa ja benna fadaligian.
10 Age adi cisdogina? Je i qila ija madigina eu dana age ijanu wawaga me nijigiannu odi odigina ec cisdoginafo? Qee bahic! Ija Anut uqa ijanu waug me nijigiannu gale tena. Ija dana age ijanu wawaga me nijigiannu ija qila odi odiginafi ija Kraisna cewel utoc dana qee biloum.
Pol adina isec aposel calen
11 O wawige meleec cotiel, ija je oso maadecemin doqagan. Me je ija qasali maadigina eu dana oso odocob qee calel. 12 Ija dana osonadec qee olom, dana oso eu ija qee iwaltel. Euqa Jisas Krais uqa ija ihacteceb camasac fogo ten.
13 Ge, age ija wele cobolig ec maadecebil doin. Saen euna ija Juda agena kobol toodolig. Ija Anutna tamanec qagaadecnu jabadi tootooadolig, ija fadaladecnu cabi olig. 14 Ija Juda agena kobol bahic toodu odom. Odocob ija Juda cotiel dana haunhaun mati ijaca cabi gel am osol ija age gemona cabi om eu cunug ija wooladem. Ija Juda jajaniel agena kobol cunug toodocnu gagadic bahic megameg mem eunu.
15 Euqa Anut uqa au ija qee basitec saen euna uqa eeltec uum itimei nesili ehiten, odocob uqa cewel utocnu utaten. Odocob ija calecemin Anut uqa uqana cisdocna 16 uqa Melah ihacteceb fogo ten, ija Juda dana qee eundec Anut Melahnu me je qasali maadecnu. Saen euna ija eeta odigennu dana leih qee sisiladelem. 17 Odocob ija Jerusalem ono timig dana age aposel aquni calein eu age sisiladecnu qee nuelem. Euqa ija Arebia hatuna nuem. Odocob hibna ija ceseli Damaskas taunna nuem. 18 Odocob hibna cabi gel cijed hedocob ija Pitaca je madewan bili Jerusalem ono tem. Odocob ija uqaca deel 15 biloh. 19 Saen euna ija aposel dana leih qee feciadelem. Ija Jems uqa Tibud waliag eu dih fem. 20 Ija je i qila jaqiadigina ija Anut amegna je mele maadigina, ija qee uhuladigina.
21 Eu hedocob ija Siriaca Silisiaca hatunana nuem. 22 Saen euna Kraisna tamanec age Judia hatuna bilein eu age ija olani qee fec bilein. 23 Age je i edi dih maadecebil dah mein, “Dana i uqa wele ege wawige meleec dana cajaca jabigi tootoogoloi, wawaga meleec uqa fadalecnu cabi oloi eu qila uqa wawaga meleec eunu me je qasali mamadiena,” ein. 24 Odocob age Anut uqa ija odi oditennu dah mimeig Anut binan sulein.