2
Anut ege cahahagen, eu ceteh ben bahic
1 Eunu ege mele je dah mom eu hewi cuhadoqale. Qeefi, ege mele je toodoc eu culuqaunnu. 2 Me je jaqec Anutna ensel jajanigeil adein eu mele bahic.* But i loo je Anut uqa Moses uten eunu maden. Age Kisim Bek dac 19-20 eu feiga. Je Kisim Bekna nijia eu enselnu je oso qee nijel. Euqa Juda age Anut uqa ensel ebenegana Moses loo je uten eunu wawaga meleen. Age Aposel 7.38ca, 7.53ca, Galesia 3.19ca euha feiga. Odocob oso uqa qee toodol, tefacdon uqa ameg wadacdoc me qee on. 3 Anut ege cahahagecnu waug nijia eu ceteh me bahic. Eunu ege cahahagec eu qee hehewi cisdufeb ameg wadacdoc me qee adi wooldocnu?
Tibud uqadodoc casac cahahagec eunu maden. Odocob dana leih dah mudein eu age mele bahic ec magein. 4 Saen euna Anut uqaha cahahagec je eu mele bahic ihacgen. Uqa uqana gagadic odoc eu ageca suldocob nen. Odocob kobolkobol odoc filfil calen. Odocob Kis Gun uqana bagol igec eu Anutna gale doc odinana siwiaden. Euna uqa cahahagec je eu mele bahic ihacgen.
Jisas himec ege cahahagena
5 Anut uqa maha haun hibna caligian eunu madoqona eu uqana ensel king biluqagannu qee mudadel. 6 Eu odi jaqec je oso madena:
“O Anut, dana ege adec hina egenu cisdogona?
Ege dana melemigeil eetanu hina ege cofgagana?
7 Hina ege saen nag odi himec ensel bisalu migem.
Hina ege binanigeca king bilecca migem.
8 Odimeg ceteh cunug uqa jaih bisalu mecem agena ilo bilen,” ena.† Je i Buk Songna nijia eu dana caja cunugnu maden. Euqa dana uqa Hibru jaqec je jaqen eu Jisas uqa dana calimei uqa dana caja cunugna cudun on ec cisdon. Eunu je i Buk Songna nijia eu ceteh Jisasca calen eunu tutuc madena. (Buk Song 8.4-6)
Anut dana muden eu ceteh cunug agena ilo ec odi maden, eu ceteh cunug bahic ec maden. Euqa qila ege ceteh cunug eu dana uqa agena ilo qee bilina eu foqona. 9 Euqa ege Jisas foqona! Anutna eelgec uum igecna uqa dana cajaca mahanadec cunugnu cal migiannu Anut odudeceb saen nag odi himec uqa ensel bisalu bilen. Eunu Jisas uqa cal mec waug sogoecca egenu gahidonnu Anut king bilecca binanca muden. Eunu ege qila uqa king bilecca binanca ohis bilina eu foqona.
10 Anut uqa ceteh cunug ifanena, uqa ceteh cunug hehdona. Uqa uqana dana cajaca cunug ehadi ehi leceb uqana fulacdoc ben bilec eu oqagannu waug ben tawen. Eunu uqa Jisas odudeceb cal mec waug sogoen gahidon euna dana cajaca age cahahaadecnu cali hedon. Odocob uqa dana cajaca cunug iwalaadi ehadi ehi li cahahaadena. Anut kobol odon eu tutuc bahic. 11 Jisas uqa dana cajaca agena silailnu qagu gun madena. Odocob uqaca dana cajaca qagu gun madena eu ageca Memega osol himec. Eunu uqa cotiel ec madena uqa eu odi maadecnu majag qee dona. 12 Odimei uqa Anut madona:
“Hina eeta odom eunu ija cotiel qasali maadigen.
Ija hina binain sulec due tamanec gemona siligen,” dona. (Buk Song 22.22)
13 Odimei uqa haun madena:
“Ija Anutnu wawi mele bahic igian,” ena. (Aisaia 8.17)
Odimei haun ha madimei madena:
“Ija ene biligina.
Ija mel sim Anut iten eu ageha ijaca biluquna,” ena.‡ Jisasnu je i Aisaia 8.17-18na nijia. Dana uqa Hibru jaqec je jaqen eu dana caja cunug bileginawe Jisas uqaha odi bilen eunu ihacadecnu gale don. Dana caja age Jisasnu wawaga meleen eu age Jisas waliagul. Dana cajaca age Anutnu wawaga meleena, odocob Jisas uqaha Anutnu waug meleen. (Aisaia 8.18)
Jisas egena Cahahagec calen
14 Mel sim eu age dana dewenega golanagaca coboginawe Jisas uqaha dana deweg golacca odi bahic umei coboloi. Uqa cal migiannu eu odi odon. Odocob uqa cal mec euna uqa dana cal mecnu gagadic odoc ebenna hewena eu fadaldocnu odi odon. Dana eu uqa Seten. 15 Dana cajaca age mahana coboc saenna cal mecnu cucuii coboloig. Odocob saen cunug maha ina biloloig cucuiec eu gihacadoloi. Eunu Jisas uqa gihacadec eunadec besiadigiannu cal men.
16 Ge, eu mele bahic. Uqa ensel cesuladecnu cabi oso qee ol. Qee bahic! Uqa Ebrahamna sihul cesuladecnu cabi on. 17 Eunu uqa cotugulnu Anutna nawel tawec ihanec dana ilo eu waug qocna Anutna je toodudu Anut cewel utocnu cabi ugiannu ceteh cunug uqa cotugul cinigwe bahic calen eu nijen. Uqa Anutna gemag bec gondon. Eunu Anut uqa dana cajaca cunug agena silail cagasiadecnu ihoc. 18 Seten uqa Jisas temdocob uqa waug sogoen. Eunu uqa qila dana cajaca cunug Seten temadena eu cesuladecnu ihoc.
*2:2: But i loo je Anut uqa Moses uten eunu maden. Age Kisim Bek dac 19-20 eu feiga. Je Kisim Bekna nijia eu enselnu je oso qee nijel. Euqa Juda age Anut uqa ensel ebenegana Moses loo je uten eunu wawaga meleen. Age Aposel 7.38ca, 7.53ca, Galesia 3.19ca euha feiga.
†2:8: Je i Buk Songna nijia eu dana caja cunugnu maden. Euqa dana uqa Hibru jaqec je jaqen eu Jisas uqa dana calimei uqa dana caja cunugna cudun on ec cisdon. Eunu je i Buk Songna nijia eu ceteh Jisasca calen eunu tutuc madena.
‡2:13: Jisasnu je i Aisaia 8.17-18na nijia. Dana uqa Hibru jaqec je jaqen eu dana caja cunug bileginawe Jisas uqaha odi bilen eunu ihacadecnu gale don. Dana caja age Jisasnu wawaga meleen eu age Jisas waliagul. Dana cajaca age Anutnu wawaga meleena, odocob Jisas uqaha Anutnu waug meleen.