12
Jisas uqa Juda agena cuha deelna cabi ocnu gun mudec kobol eunu maden
(Mak 2.23-28; Luk 6.1-5)
1 Juda agena cuha deel osona Jisas uqana malogom gami cobimeig wit cabi osoosona gemogemo li beli coboin. Malogom age wen adeceb wit aig wal mec tawen qu u ehi li aig jein. 2 Oodogin Farisi leih age eu fimeig Jisas madoin, “Faga, hinana malogom age ceteh oso egena cuha deelna egena loo je cahacgena eu odogina,” doin.* Juda agena loo je eu agena cuha deelna cain cabi owain ec maden. Cabi ocnu loo je osoha nijen eu odi maden, “Ageha sab wal meceb cuha deelna cain cabi owain,” en (Kisim Bek 34.21. Eunu Farisi age malogom age loo je tefacdogina ec madein. 3 Odocobil Jisas jejenega hewi maaden, “Age Dewid odonnu je oso qee sanijeleinfo? Saen uqaca uqana eundec age gami coboinca age wen ben adeceb 4 uqa Anutna jo dunuh limei Anutnu ihanec bred oso u jimei uqana dana adeceb jein. Eu odonqa uqaca age uqaca coboin age ihanec bred jecnu Mosesna loo je eu cahacaden. Mosesna loo je madi, bred eu nawel tawec ihanec dana himec eu jecnu cois, ena. 5 Qeefi, age je osoha Mosesna loo jena nijia eu qee sanijeleinfo? Nawel tawec ihanec dana age tempelna cabi ogina eu age cuha deelna cabi oqagan ec je nijia. Age cuha deelnu loo je tefacdogina qa age Anut amegna qee cahuldogina. 6 Ija maadigina, ceteh eu tempel wooldona eu ene bilia. 7 Euqa age je i Anutna jaqec jena nijia:
‘Ija age gauc ihantecnu qee gale tena.
Ija age dananu wawaga qocca biluqagannu gale tena,’ ec je nijia (Hosea 6.6)
eu uqana gug du cuhadoubmi age dana qee cahuldogina eu age silail dana ec qee madoub. 8 Ge, Dana Melah uqa Tibud, uqa cuha deel uqana ilo bilina,” aden.
Juda agena cuha deel osona Jisas dana eben laleg mec me muden
(Mak 3.1-6; Luk 6.6-11)
9 Jisas uqa cudun eu culimei jobon osona nuimei Juda agena cuha jona len. 10 Odocob dana oso uqa eben gatoc men eu ono bilen. Dana leih age Jisas dewegna je um qudecnu gale aden eunu age sisildoin, “Egena cuha deelna dana hagca me madecnu loo je eu cois ec madenafo?” doin. 11 Odocob uqa jejenega hewi maaden, “Age dana oso uqana sipsip maha qahec helona dunuh toneceb cuha deel i edina sipsip eu helonadec didocobil qee cali beiaunfo? 12 Euqa dana uqana fajec eu sipsip uqana fajec wooldoc bilia. Eunu ege cuha deelna me mudecnu eu cois,” aden. 13 Odimei uqa dana eben gatoc men eu madon, “Hina eben heli huleldoga,” don. Odocob dana eben heli huleldocob me men. Eu uqa eben oso cinigwe calen. 14 Euqa Farisi age cuculdi nuimeig Jisas qoqagannu jic wawali je togodoin.† Farisi age hag meadecnu kobol euha cabi oc ec cisdoin. Odocob agena loo je eu agena cuha deelna cain cabi owain ec maden. Euqa Jisas uqa cuha deelna dana hagca medon. Eunu Farisi age Jisasnu gemanaga beceb uqa qoqagannu jic walein. Age Luk 13.14ca, Jon 5.16-18ca euha feiga.
Jisas uqa Anutna cabi dana bahic
15 Jisas uqa Farisi eeta odudecnu gale aden ec dumei cudun eu cuculi nuen. Dana cajaca mati toodocobil uqa cunug me maden. 16 Odimei uqa dana cajaca age uqana gug camas mowainnu cahacaden. 17 Uqa je hahun madec dana, Aisaia, uqana je ihoc ligiannu odi odon. Uqana je wele odi maden:
18 “Dana i ijana cabi dana.
Ija uqa nesili ehudem.
Ija nalug migina.
Ija wawi uqanu gale ben dona.
Ija ijana Kis uqa mitugen.
Uqa Juda dana caja qee eundec ititom kobolnu je qasali maadigian.
19 Fee dadanec je qee madeiaun,
utai biah anag qee meiaun.
Uqa jic cunugna co suli u mamadeb dana cajaca age dah qee mowain.
20 Dana cajaca age balac gagadicca qee uqa qahigiannu cinigwe eu uqa cunug qee qaheiaun.
Dana cajaca age gowoc qee ileti cuhadona cinigwe uqa qee cafuladeceb qee meiaun.
Uqa odocob ititom kobol mele bahic wooladi biligiannu uqa cabi u biligian.
21 Juda dana caja qee eundec age uqa ijannu wawaga meleeceb uqa cahahaadigiannu sumudi biluqagan,” en. (Aisaia 42.1-4)
Age Jisas Bielsebulca cabi osina ein
(Mak 3.20-30; Luk 11.14-23; 12.10)
22 Age dana oso buga me qee hewen eu Jisasca ehudi ahoin. Dana eu ameg galuc men, co ha cufa qon. Jisas uqa dana eu me mudeceb je madecnuca ceteteh fecnuca ihoc len. 23 Odocob dana cajaca cunug filiciti madein, “Dana i Dewid Melah qeefo?” ein.‡ Age je Matju 9.27na nijia eu feiga. 24 Euqa Farisi age dana odi mamadegin dumeig age Jisasnu madein, “Dana eu uqa Bielsebul, buga me qee agena ben, uqana gagadic odocna dih buga me qee dana deweneganadec ititacadena,” ein.§ Bielsebul eu Seten ijan oso.
25 Jisas uqa age wawagana mamadegina dumei maaden, “Hatu osolna mam cadecebil qatanec bilecebfi age gaus danoqagan. Jobon oso mam cadecebilfi bilecwe qee. Sihul oso mam cadecebilfi euha age bilecwe qee. 26 Odocob Seten uqana eundec ititacadoubmi uqana am qatanec biloub, eunu uqana cul adi biloub? 27 Age ijanu madi, uqa buga me qee Bielsebulna gagadic odocna dana deweneganadec ititacadena, egina, eu melefi agena malogom euha inna gagadic odocna buga me qee dana deweneganadec ititacadegina? Eunu agena malogom agena odoc eu Farisi agena je cahuldoc eunu ihacadigian. 28 Ijaqa Anutna Kis cesulteceb ija Anutna gagadic odocna buga me qee dana deweneganadec ititacadiginafi Anutna cul ageca wele hoia,” aden.
29 “Qeefi, in oso dana gagadicca uqana jona li uqana ud cawaldecnu donafo? Oso uqa casac li dana eu eben jaihca libimei uqana ud cawaldecnu dona,” aden.** Dana gagadicca eu Seten. Dana uqa Setenna ceteteh cawaldena eu Jisas.
30 “Oso ijana danah qee eu ija cad mitina. Oso ija cesultimei dana cajaca Tibud cemenug qee hauadena eu dana cajaca bilisaadena,” aden.
31 “Eunu ija maadigina, silail oso cunug Anut lelandoc oso cunugca Anut uqa dana eu agena silail cagasiadigian. Euqa Kis Gun lelandoc eu dana uqana silail cagasitocnu qee nijel. 32 Odocob dana oso Dana Melahnu je me qee oso madecebfi Anut uqa dana eu uqana silail cagasitugian. Euqa oso Kis Gunnu je me qee madenafi Anut uqa silail eu saen qilaca saen bilec catanecca qee cagasitoiaun,” aden.†† Jisas uqa Kis Gunna gagadic odocna dana me muden. Euqa Farisi age uqa Setenna gagadic odocna dana me muden ec cisdoin. Eunu age cahulec bahic bilein. Age Kis Gun eu Seten ec cisdoin. Eunu Anut uqa agena silail cagasiadecnu ihoc qee nijel. Age Mak 3.28-29 feiga.
Ege je madoqona eu cel ceteh ege wawigena bilina eu camas mena
(Luk 6.43-45)
33 Jisas je haun maaden, “Na eu gug mefi eu aig me qona. Euqa na eu gug me qeefi eu aig me qee qona. Dana age casac aig fimeig na gug eu mefo, me qeefo ec doqagan. 34 Age man sononec uqana nag! Age me qee sihuldec! Age adi je me madoqagan? Ceteh waugna am bec nijia eu cona cali hu camas mena. 35 Dana me uqa waug dunuh cisdoc me am bec nijinanu eunadec cisdoc me camas mena. Dana me qee uqa waug dunuh cisdoc me qee am bec nijinanu eunadec cisdoc me qee camas mena,” aden.
36-37 “Ijaqa odi maadigina, hinana je madec mefi Anut uqa hinana je menu hina ititom dana ec madigian. Euqa hinana je madec me qeefi hinana je me qeenu Anut uqa hina dana me qee ec madigian. Eunu Anut uqa Gesiladec Deel Benna dana cajaca age je me qee madegina eundec age eetanu je ilag madein? ec sisiladigian. Odocob age je me qeenu ameg me qee oqagan,” aden.
Dana leih age Jisas kobolkobol oso odoga foqa doin
(Mak 8.11-12; Luk 11.29-32)
38 Saen euna loo je iwaladecca Farisica leih age Jisas madoin, “Iwalgec, ege hina Anutna cabi ogonana gaga eunu kobolkobol oso oodom faga gena,” doin.
39-40 Odocobil Jisas jejenega hewi maaden, “Anut hibemdoc sihul i qisol megina age gaga oso fecnu walegina. Je hahun madec dana, Jona, uqa cahineg cijedca witic cijedca dool ben macasnadec waugna nijenwe Dana Melah cahineg cijedca witic cijedca maha dunuh noc biligian.‡‡ Age Jona 1.17 feiga. Je hahun madec dana Jona uqana buk euha Jona uqa dana cajaca age Niniwa ono bilein eu Anutna je qasali maadennu je saen. Odocob age je eu dumeig agena silailnu tului falicdoin. Age Jona 3.5 feiga. Eunu age gaga abes oso qee fowain. Age Jona uqana gaga eu himec foqagan 41 Weleca Niniwa dana age Jona me je qasali maadeceb agena silailnu tului falicdoin. Ijaqa maadigina, oso eu Jona wooldoc ene bilia! Eunu Niniwa dana age isi Gesiladec Benna dana sihul qila i ene bilegina eundec gami cajimeig age dana i bilegina deweneganu geladec je madoqagan. 42 Weleca Kwin sautdec uqa Solomonna cisdoc silecca je dugen imei hatu onoca bahic cocobi niniji hu je dah men. Ijaqa maadigina, oso eu Solomon wooldoc ene bilia! Eunu Kwin sautdec uqa Gesiladec Benna dana qila i ene bilegina eundec gami cajimeig uqa dana i bilegina deweneganu geladec je madigian,” aden.
Buga me qee haun ceseli hon
(Luk 11.24-26)
43 Jisas je haun maaden, “Saen buga me qee dana dewegnadec cali hona uqa jaen mudec cudun wawali hatu galalecna cobona. Euqa uqa cudun oso qee gulucdol. 44 Uqa madena, ‘Ijana jo cuculi hom euna ceseli nuigen,’ ena. Uqa ceseli humei jo eu oso qee bilec, gegehinca qee, cunug eeldoc ninijen fena. 45 Odimei uqa haun ceseli nuimei buga me qee 7-pela cedi ahocob uqa gami bilegina. Buga me qee 7-pela eu agena odoc me qee uqana odoc me qee eu wooldoc. Eunu dana eu uqana bilec qila euna me qee bahic mena. Uqana bilec weledec wooldona. Dana cajaca me qee qila bilegina eu ageha odi caloqagan,” aden.
Jisas anag waliagulca eu in?
(Mak 3.31-35; Luk 8.19-21)
46-47 Jisas uqa dana cajaca je maadi bibilen uqa anag waliagulca maha gumu tatawi ege Jisas je madoqan ein. [Odocobil dana oso Jisas madon, “Hina anin walinelca ono taweiga age ege Jisas je madoqan egina,” don.]§§ Grik jaqec je hilah leihna age but i [ ] gemo nijia eu qee nijel. Grik je doc dana age Matju je i qee jaqel, euqa dana fil oso uqa hibna Matjuna je eu Mak 3.2ca, Luk 8.20ca eu caca calecnu je i tubdu jaqen ec cisdogina. 48 Odocob Jisas dana eu jejeg hewi madon, “Ija au in? Ija waliel an?” don. 49-50 Uqa odi madumei ebenna uqa malogom ihohadimei maaden, “Feiga, oso uqa Mei sao jobon bilia, uqa co toodu odona eu uqa ija walica, ija cebinamica, ija auca. Eunu ija au walielca ihen!” aden.
*12:2: Juda agena loo je eu agena cuha deelna cain cabi owain ec maden. Cabi ocnu loo je osoha nijen eu odi maden, “Ageha sab wal meceb cuha deelna cain cabi owain,” en (Kisim Bek 34.21. Eunu Farisi age malogom age loo je tefacdogina ec madein.
†12:14: Farisi age hag meadecnu kobol euha cabi oc ec cisdoin. Odocob agena loo je eu agena cuha deelna cain cabi owain ec maden. Euqa Jisas uqa cuha deelna dana hagca medon. Eunu Farisi age Jisasnu gemanaga beceb uqa qoqagannu jic walein. Age Luk 13.14ca, Jon 5.16-18ca euha feiga.
‡12:23: Age je Matju 9.27na nijia eu feiga.
§12:24: Bielsebul eu Seten ijan oso.
**12:29: Dana gagadicca eu Seten. Dana uqa Setenna ceteteh cawaldena eu Jisas.
††12:32: Jisas uqa Kis Gunna gagadic odocna dana me muden. Euqa Farisi age uqa Setenna gagadic odocna dana me muden ec cisdoin. Eunu age cahulec bahic bilein. Age Kis Gun eu Seten ec cisdoin. Eunu Anut uqa agena silail cagasiadecnu ihoc qee nijel. Age Mak 3.28-29 feiga.
‡‡12:39-40: Age Jona 1.17 feiga. Je hahun madec dana Jona uqana buk euha Jona uqa dana cajaca age Niniwa ono bilein eu Anutna je qasali maadennu je saen. Odocob age je eu dumeig agena silailnu tului falicdoin. Age Jona 3.5 feiga.
§§12:46-47: Grik jaqec je hilah leihna age but i [ ] gemo nijia eu qee nijel. Grik je doc dana age Matju je i qee jaqel, euqa dana fil oso uqa hibna Matjuna je eu Mak 3.2ca, Luk 8.20ca eu caca calecnu je i tubdu jaqen ec cisdogina.