5
Jaqec je col qoc oso libein eu Jon fen
1 King bilec cabalna bilen uqa eben meulana jaqec je col qoc oso bibilen fem. Jaqec je col qoc eu jaqec je dunuhna ganacnaca nijen. Eu sisi mec 7-pela libec ninijegin. 2 Odocob ija ensel gagadic odocca fem. Uqa co suli u maden, “In uqa sisi mec libec eu wagaladimei jaqec je col qoc eu huleldocnu ihoc?” en. 3 Euqa oso sao jobonnafo, mahanafo, maha bisalunafo uqa jaqec je col qoc eu huleldumei dunuh fecnu ihoc oso qee bilel. 4 Oso uqa jaqec je col qoc eu huleldumei dunuh fecnu ihoc oso qee bilel eunu ija geh qajem. 5 Odocob dana matu oso maten, “Hina cain qajagaun! Faga! Dana ben gagadic odocca eu laion uqa Juda sihulnadec, uqa King Dewid Melah, uqa sisi mec libec 7-pela eu wagaladimei jaqec je col qoc eu huleldugiannu han wooldon,” ten.
Jon uqa Sipsip Nag fen
6 Odocob ija Sipsip Nag oso qocobil cal mecwe uqa king bilec cabal gemona tatawen fem. Ceteh cebac 4-pela eu age talildoin. Dana matu eu age taliladein. Uqa kom 7-pela, uqa ameg 7-pela. Eu age Anutna kis 7-pela, Anut suladeceb mahamaha cunugna beladein. 7 Odocob Sipsip Nag eu limei king bilec cabalna bilina uqa eben meulanadec jaqec je col qoc on. 8 Uqa jaqec je col qoc u hedocob ceteh cebac 4-pelaca, dana matu 24ca age Sipsip Nag amegna toni mahuli cosolein. Age osolosol gita cinigwe hewein. Ageha osolosol boh goldna mudec hewein. Boh goldna mudec eu cunug ja casuc dedeman me bahic am bein. Ja casuc dedeman me bahic eu Anutna qagu coboc dana cajaca agena inondoc. 9-10 Odimeig age due haun oso odi silein:
“Age qihecebil cal mem.
Hina hinana ihanec cal mecna Anutnu dana caja sihul filfilnadecca, je madec filfilnadecca, dewenega filfilnadecca, hatu filfilnadecca fajadem.
Hina odadecem age nawel tawec ihanec dana ibuldoin, age cofaadi bibilebil egena Anut cewel utoin.
Age mahamaha cunug agena king biluqagan
Eunu hina jaqec je col qoc eu umeg uqana sisi mec libec wagaladecnu ihoc,” ein.
Age cunug Sipsip Nag binan sulein
11 Odocob ija haun feciimig ensel mati bahic, am geh bahic jejenega dah mem, eu sanijecnu ihoc qee. Age king bilec cabalca, ceteh cebac ageca, dana matu ageca taliladein. 12 Age conoga suli u due silein:
“Sipsip Nag qoin eu uqa gagadic odocca, cehewan gehca, doc silecca, hihibanca, binan sulecca, kobolkobolca, eeldocca ocnu ihoc,” ein.
13 Odocob ija ceteh filfil age sao jobonna bileginaca, age mahana bileginaca, age maha bisaluna bileginaca, age macasna bileginaca eu age cunugca due sisilegin dah mem:
“King bilec cabalna bilinaca Sipsip Nagca ale kobolkobolca, ale hihibanalaca eunu
ege gaid eelalecomun catanena,
ege gaid binanala sulalocomun catanena,” ein.
14 Odocob ceteh cebac 4-pela eu age madein, “Mele!” ein. Odocob dana matu age toni mahuli cosolimeig cuha fein.