Pol Uqa Jaqec Je Oso
Rom Tamanec Jaqiaden
Aqunec Je
Pol uqa Kristen tamanec Rom bilegina eu nui feciadecnu gale don. Eunu uqa jaqec je i jaqiaden. Uqa nui feciadimei saen nag ageca bilimei Spen hatuna nui me je ono qasali madigiannu gale don. Pol uqa jaqec je ina Kraisnu me jeca wawaga meleec cobocca eunu uqana cisdoc eu camas sildi jaqen.
Casac Pol uqa feele adec je jaqimei uqa Rom tamanec eunu saen cunug Anut inondona ec jaqen. Odimei uqana je gug jaqen, eu odi, “Eu wawige meleen jic euna himec ege dana cajaca ititom Anut amegna tawoqona,” en. (Eu 1.17 feiga.) Odimei Juda danaca, Juda dana qee eundecca age cunug silail dana himec bilegina ec jaqen. Odimei Anutna kobol ititom eu dana Jisas Kraisnu waug meleena eu uqa Anut dana ititom ec maden. Odocob dana cunug Jisas Kraisnu wawaga meleena age ijanaga dana ititom adegina ec jaqen. (Eu 3.22 feiga.) Odimei dana Jisas Kraisnu waug meleecebfi uqa Kis Gun umei cebac bilec jic haun toodocnu Anut tulidocob cajena ec jaqen. (Eu 6.4 feiga.) Odimei Kis Gun dana eu cesuldocob silail kobolca, cal mecca ale dana eu cilehdu cofdocnu gagadicca qee nijina ec jaqen. (Eu 6.14 feiga.) Odimei dana eu uqa Anut melah osoca, Krais waliag osoca calena ec jaqen. (Age dac 8 feiga.) Dac 5-8na Pol uqa Anutna loo jena gugca, Kis Gun uqa dana cajaca Jisas Kraisnu wawaga meleena eu agena cebac bilec dunuh bilinaca eunu jaqen.
Dac 9-11na Pol uqana culumen osonu jaqen. Pol uqa Juda dana oso. Wele Anut uqa Juda dana cajaca age uqana ec maden. Euqa Juda mati bahic age Jisas hibemdoin. Odocobil Juda dana caja qee eundec mati bahic age Jisasnu wawaga meleeceb uqana calein. Pol uqa Juda age cahuldoin ec jaqen. Jisas uqa agena Krais, uqa agena Cahahaadec, euqa Juda age ceteh eu Anut uqa agenu muden eu qee felein. Euqa Pol uqa Juda dana cajaca ageha hibna Jisasnu wawaga meleeceb age uqana caloqagan eu cisdon.
Jaqec je i uqana cit qocna Pol uqa Kristen age adi coboqagannu jaqen. Kristen age wawaga meleecna cotogail nalunuga megina eu age mele bahic wawaga meleecna cotogail nalunuga meigale ec jaqen. (Eu 12.9 feiga.) Odimei uqa Anut cewel utocca, gabman ilo bisalu bilecca, wawaga meleec age cesuldocobdocobeigale euca eunu jaqen.
Je Dunuhnu Dado Mec
1. Aqunec je (1.1-15)
2. Gug je: Ititom kobol eu Anutnadec (1.16-17)
3. Dana caja cunug age ititom qee (1.18-3.20)
A. Juda dana qeenu je (1.18-32)
B. Juda dananu je (2.1-3.8)
C. Libec je: Dana caja cunug (3.9-20)
4. Anut uqa dana cajaca age ititom ec maden (3.21-5.21)
A. Dana age ititom kobol eu Kraisna himec ogina (3.21-26)
B. Dana oso uqa Kraisnu waug meleen uqa dana ititom (3.27-4.25)
1. Dana age loo je toodu odocna ijanaga ititom qee ogina, age wawaga meleecna himec ijanaga ititom eu ogina (3.27-31)
2. Anut uqa Ebraham dana ititom ec maden (dac 4)
C. Dana ititom adi bilina (5.1-11)
D. Libec je: Dana age ititom qee, euqa Anut uqa dana cajaca ititom bagol adena (5.12-21)
5. Anut uqa dana cajaca ititom adeceb age Kraisca cebac bilegina (dac 6-8)
A. Silail kobol eu dana cajaca ititom bilec qee cilehadena (dac 6)
B. Anutna loo je eu dana oso uqa dana silail ec madena, euqa uqa Kraisca bilinafi uqa Anut amegna dana ititom bilina (dac 7)
C. Dana cajaca ititom age Kis Gunna gagadic euna cebac bilegina (dac 8)
6. Anutna kobol eu ititom: Uqa Juda dana cajaca hibemaden (dac 9-11)
A. Anut uqa Juda dana cajaca hibemaden eu ceteh tutuc (9.1-29)
B. Anut uqa Juda dana cajaca hibemaden eu uqana gug (9.30-10.21)
C. Anutna hibemadec eu culumen ben bahic qee (dac 11)
1. Anut uqa Juda dana cunug qee hibemadel (11.1-10)
2. Anut uqa saen cunugna Juda dana qee hibemadeiaun (11.11-24)
3. Anut uqa dana cajaca cunugnu waug qugian (11.25-36)
7. Dana cajaca ititom agena coboc (12.1-15.13)
A. Wawaga meleec age cotogail nalunuga meigale (dac 12)
B. Wawaga meleec age dana cunug nalunuga meigale (dac 13)
C. Wawaga meleec gagadicca age wawaga meleec gagadicca qee eu nalunuga meigale (14.1-15.13)
8. Cit qoc je (15.14-33)
9. Feele adec je (dac 16)
1
Pol uqa uqana aposel uqa cabinu gug maaden
1 Ija Pol, ija Krais Jisasna cabi dana. Anut uqa ija aposel cabi ocnu utati maten. Uqa Anutna me je maadec cabi ocnu abes miten.
2 Wele bahic Anut uqana je hahun madec dana maadeceb age me je i jaqein. Me je i Anutna jaqec je gunna bilen. 3 Eu Anut Melahnu me je. Melah uqa Dewidna sihulnadec eu dana calen. 4 Odocob Anut uqa cal mecnadec tulidocob cajeceb Kis Gun uqa euna Anut Melah gagadic odocca eu ihacgen. Eu uqa Jisas Krais egena Tibud. 5 Ege Jisas Krais umna ege ijannu wawige meleeceb dana cajaca age mahana cunug bilegina eu me je maadocomun uqanu wawaga meleeceb uqa jejeg toodoqagannu eelgec uum igecca aposel cabi occa om. 6 Ageha am eu dunuh bilegina. Age Jisas Kraisna utaec dah mimeig age jejeg toodoin.
7 Romdec dana age Anut agenu nalunuga mena eu age utaadeceb uqanu dana cajaca qagoc bilegina, eu age ija je i jaqiadigina. Anut ege Memigeca Jisas Krais Tibudca alena eelgec uum igecca malol bilecca adesiale.
Pol uqa Rom tamanec meciadecnu waug nijen
8 Ija je i casac maadigen. Dana cajaca age maha cunugna bilegina, age cunug wawaga meleecca bilegina eunu dogina. Eunu ija agenu Jisas Krais umna ijana Anut hetaga dugina. 9 Ija Anutna cabi gagadic ugina, eu Melahnu me je maadec cabi. Eu Anut uqa dona, saen cunug ijana inondocna age ijanaga ugina. 10-11 Ija dolonoga eeldocnu ceteh oso age wawaga gagadic mudigiannu ageca ehi ligennu gale tena. Eunu ija age meciadecnu wawi ben bahic nijia. Eunu Anut uqa cois ifei uqa ihoc jic ihacteceb ageca qila li caligen eunu ija gaid inondugina. 12 Ijana cisdoc eu odi. Agena wawaga meleec eu ija wawi gagadic mudigian. Odocob ija wawi meleec eu age wawaga gagadic mudigian.
13 O wawaga meleec cotiel, age du cuhadoqagannu wawi nijia, saen geh bahic ija ageca ono lecnu madem. Euqa saen cunugna ceteh ijana jic aqatitoloi. Ijana cabi oc ija Juda dana cajaca qee eundec cesuladecemin age wawaga meleen, ija cabi eu age gemona odocnu age am leihha odi caloqagannu wawi nijia. 14 Anut uqa cabi iten, eu ija Grik danaca Grik dana qee eundecca, dana doc silecca ageca dana doc silecca qee ageca eu cunug cesuladoum. 15 Eunu ija Rom dana cajaca ageha me je qasali maadecnu wawi nijia.
Me je eu Anutna gagadic odoc
16 Ge, me je eu Anutna gagadic odoc dana cunug age wawaga meleec eundec cahahaadigiannu. Eu Juda dananu casac ihoc leceb Juda dana qee eundecnuha ihoc ligian. Eunu ija me jenu qee majani tena. 17 Ge, Jisasnu me jena Anut uqa ege dana cajacanu ititom ena eu adi odona eu ihacgena. Eu wawige meleen jic euna himec ege dana cajaca ititom Anut amegna tawoqona. Eunu ege wawaga meleen eunu Anut uqa ege dana cajaca ititom ecnu ihoc. Eu odi Anutna jaqec je madena:
“Dana cajaca age Anutnu wawaga meleeceb
Anut uqa dana cajaca eu ititom ec madeceb age cebac biluqagan,” ena. (Habakuk 2.4)
Dana cajaca cunug age Anut hibemdumeig silail mein
18 Ege doqona, Anut gemag bec eu sao jobondec nimei camasac mena. Uqa dana cunug age silail mimi kobol me qee odogina eundec wadacdoc ameg me qee adenanu. Dana eu age silail megina euna mele je cilehdogina. 19 Anut uqa uqana kobol dana cunug wele ihacaden. Eu ageca camasac men. Eunu dana eundec cunug age Anutna kobol mati wele doin. Anut uqadodoc wele ihacaden. Euqa age uqa hibemdoin. Eunu uqa wadacdoc ameg me qee adena. 20 Wele bahic Anut uqa ceteteh cunug ifanen saen eunadec hocob qila dana age uqa ceteteh ifanen eu fegina. Ifan euna age Anutna jahunec kobol leih dana age docwe qee ec docnu ihoc. Eu Anutna ifan gug bahic odi fegina. Uqa uqana gagadic odoc odi bileceb catanena, uqa Anut bilia eu age docnu ihoc. Odinu dana eundec age agena cahuldoc jajahuni madi ija Anut qee hibemdolom, ija Anutnu qee dugina ecebilfi agena je eu cesuladecnu ihoc qee.
21 Ge, age Anutnu dogina qa age uqa Anut bahic ec qee cisdoloin. Odimeig binan qee sululein. Odimeig age hegaga qee doloin. Age dalawan aqen. Odocob age agena cisdoc eu silecca qee mimi lecebil tu kauaden. 22 Age deboii madein, “Ege cisdocca,” ein qa eu age wele dalawan aqec jicna lein. 23 Odimeig age Anut bileceb catanenana binan sulegina eu hibemdoin. Odimeig age wadacdumeig dana cal menana kadan tibud hahunuga oin, odocob man fululec hahunuga oin, odocob dool hahunuga oin, odocob man sononec hahunuga oin, ceteteh eu binanaga sulein.
Dana cajaca cunug age kobol me qee mati bahic odoin
24-25 Eunu dana cunug age Anutnu mele je culimeig uhulec je oin. Odocob eu age Anut hibemdumeig ceteh Anut ifanen eu binan sulegina, odimeig ceteh eu cewel utogina. Euqa Anut ceteteh cunug ifanen eunu dana ege Anut binan sulocomun cataneiale! Mele. Eunu Anut uqa felacadeceb agena gale adec me qee wawagana nijia eu diadeceb age silail mimi coboin, odocob agedodoc dewenegana kobol gegehinca mudein.
26 Dana age Anut hibemdoin eunu Anut uqa felacadeceb age agena gale adec me qee toodudu kobol gegehinca odogina. Agena caja age danaca nijec kobol me eu culimeig age wadacwuducdumeig cajaca nijec kobol me qee eu oin. 27 Odocob danaha age cajaca nijec kobol me eu culimeig age danaca nijec kobol me qee eu wawaga dunuh ja cinigwe cajeceb odi odoin. Dana age kobol majanagaca dana gami odogina. Odimeig agedodoc ameg me qee agena kobol me qeenu wadacdoc ihoc ogina.
28 Agena cisdocna Anut hewecnu culadein, odocobnu Anut felacadeceb agedodoc agena cisdoc me qee toodogina. Age kobol filfil dana odocwe qee eu odogina. 29 Age kobol cunug odogina eu me qee himec. Kobol me qee eu cunug dana wawagana am ben. Odocob age kobol qisol mec bahicha odogina, dana osona ceteteh ocnu amaga qona, cad kobolha sulegina. Odocob age dana ceteteh gehca eundec waug me qee migianna isec odogina, age dana qagadogina, gaucgauc gemanaga bena. Odocob age uhulecna dana osona ceteh ogina, age dana me qee mudecnu cabi ogina. Odocob age dananu je me qee hibilemega madegina. 30 Odocob oso ijan me qee mudecnu je amemeg qasali madegina. Age Anut sagagdogina, odimeig lelandudu cobogina, deboeeig agedodoc binanaga sulegina. Age kobol me qee ifanegina. Age memegail anagailca agena je qee toodogina. 31 Age cisdocca qee. Age madegina qa agedodoc agena je qee toodogina. Agena sihul eundecnu wawaga lal qocca qee. Age dana osonu qee waloc adena. 32 Age Anutna loo je dana eundecnu maden eu dogina, “Dana kobol eu odi odogina age cal moqagan,” en. Dana eu age loo je eu odi maden ec du cuhadogina qa age kobol me qee eu odi oodi nijegina. Age eu odi himec qee odogina qa age leih odogina ha binanaga sulegina.