1 Egena wawige meleecna Anut ege dana cajaca ititom ec madena. Eunu Jisas Krais Tibud odigeceb ege Anutca malol biluquna. 2 Ege Jisas Kraisnu wawige meleennu uqa Anutna eelgec uum igecna ehigi ahon. Odocob ege Anutna eelgec uum igec euna qila biluquna. Odocob ege Anutna kobolkobol oqannu wawige meleeceb susumudi biluquna eunu ege culaoqona. 3-5 Odocob ege eunu himec ceelecnu qee nijel. Odocob Anut uqana Kis Gun ege igina eu odigeceb Anut nalunige mec ege wawigena basecdona. Eunu ege culumen egeca caleginanu ha culaoqona. Ege culumen eu ege wawige gagadic mudina eu doqona. Odocob ege wawige eu gagadic tawecebfi ege dana temdocna gagadic tatawi culumen gahidoc kobol camasac mudina eu doqona. Odocob ege culumen gahidu wooldufob ege wawige meleeceb Anut ceteh cunug igigiannu saciadon eu susumudi biluquna. Eunu ege ceteh saciadon eunu wawige meleeceb ceteh eu susumudi bilifob ege eunu gauc qee susumudi biluquna.

6 Wele ege egedodoc cesulgecnu gagadic odocca qee bibiluqun saen Anut maden euna himec Krais uqa ege dana Anut hibemdom eundec ceseli cedgigiannu cal men. 7 Dana oso uqa dana ititom coboc cesuldugiannu cal mecnu qee nijel. Mele, ege oso acahna ihoc waug gagadic mudimei dana me oso cesuldocnu cal migianfa. 8 Euqa ege silail dana bibiluqun Krais cesulgigiannu cal men. Odoc euna Anut ege nalunige mena eu ihacgena. 9 Krais uqa cal meceb uqa golacna Anut ege dana cajaca ititom ec ijanige wele qon. Eunu ege qila tutuc bahic doqona, eu ege gehgeh cesulgigian, odocob ege Anutna gemag bec qee gulucdoqaun. 10 Ge, wele ege Anutca cad bibiluqun saen euna Anut Melah cal men euna uqa cad kobol eu qee mudimei Anut egeca tanawigen. Eunu qila ege Anutca tanawigec biluqa euna Anut uqa Melah cebac bilecna ege cahahagigian eu tutuc bahic doqona! 11 Eu odi himec qee. Egena Tibud Jisas Krais uqa odigeceb ege Anutca tanawigen eunu qila ege Anutnu ceeloqona.

12 Ege doqona, dana osol uqa silail men, odocob kobol euna silail maha ina calen. Odimei cal mec u ahon. Eunu dana cunug age silail meinnu cal mec dana cunug cedena. 13 Mele, loo je qee calec saen euna silail maha ina nijen. Euqa loo je euca qeefi Anut uqa silail osolosol qee sanijina. 14 Euqa Adamna saennadec ninijen hu Mosesna saenna cal mec eu dana cajaca cunug agena cilehadec bilen. Mele, dana cajaca leih age Adam loo je tefacdon odi qee tefacdoloin qa cal mec eu ageha agena cilehadec bilen.

Adam uqa eu dana hib caligian uqanu hahun ihoc men. 15 Euqa Anutna eelgec uum igecca Adamna silail mecca ceteh lecis eu ale eu caca qee. Eu mele, dana eu uqana silail mennu dana cajaca mati bahic age cal mein. Euqa Anut uqana eelgec uum igec eu wooldona. Odocob dana osol, Jisas Krais, uqana eelgec uum igecna Anut uqa dana cajaca mati bahic uqana bagol adena. 16 Odocob Anutna eelgec uum igec eu dana osol eu uqana silail mec cinigwe qee. Dana eu uqa silail osol meceb Anut uqa dana cajaca cunug gesiladi maaden, “Age cunug silailca,” aden. Euqa Anutna eelgec uum igec eu odi. Dana cajaca age silail mati mecebil Anut agenu maden, “Age dana cajaca ititom,” en. 17 Eu mele, dana osol uqa silail men. Odocob dana osol eu uqana silailnu cal mec dana cajaca cunug cilehadena. Euqa dana osol, Jisas Krais, uqana odoc eu wooldon! Dana cajaca age Anutna eelgec uum igecca Anutna ititom eu bagolweca ogina eu cunug age Krais odonna cebac bilec umeig kingwe biluqagan.

18 Eunu dana osol uqana silail mec eunu Anut uqa dana cajaca cunug gesiladi maaden, “Age cunug silailca,” aden. Eu odiwe dana osol uqana ititom odoc eunu Anut uqa dana cajaca cunug maaden, “Age dana cajaca ititom,” adeceb age cebac bilegina. 19 Odocob dana osol uqa Anutna je tefacdon, odocob euna dana cajaca mati bahic age silailca calein. Eu odiwe dana osol uqa Anutna je toodon, odocob euna dana cajaca mati bahic age ititom caloqagan.

20 Odocob je tefacdoc ben bahic calecnu Anut uqa dana cajaca loo je aden. Odocob silail kobol eu ben bahic calena qa Anutna eelgec uum igec eu silail kobol wooldon, odimei ihoc len. 21 Eunu cal mec eu silail kobol cesuldocob ohis bahic calen, eu kingwe bilen. Eu odiwe ititom kobol eu Anutna eelgec uum igec cesuldocob ohis bahic calena, eu kingwe bilina. Odocob Jisas Krais, egena Tibud, uqana cabi ocna ege cebac bilec catanec oqan.