7
Ege qila wawige kobol haunna cabi oqona
1 O wawaga meleec cotiel, age loo je du cuhadogina. Eunu ija je maadecemin fogo adigian. Dana uqa cebac bilina saen euna himec eu uqa loo je bisalu bilina. 2 Ge, caja oso uqa dana ocob uqa gemug cebac bibileb saen euna himec loo je gadac ale gemo bilina. Euqa caja eu gemug uqa cal meceb loo je gadac ale gemo bilen eu qee mena. 3 Dana uqa cebac bibileb caja uqa dana oso ufei caja danaca bilec me qee mudec caja doqagan. Euqa dana cal mecebfi loo je gadac ale gemo bilina eu qee mena. Eunu uqa dana oso ocobfi eu uqa dana cajaca bilec qee me qee mudina.
4 Eu odiwe cotiel, age dana oso uqa cal mecnadec ceseli cajen eu ebenna lein, eu ege Anutna kobol me bahic toodu odoqannu age wele Krais deweg ganacca gabandocobil cal mein. Eundec age loo je bisalu qee bilegina. 5 Wele ege dewenige kobol hilahna himec bilom saen euna loo je odigeceb egena gale gec me qee silail mecnu sililoloi. Odocob cabi eu ege dewenigena cunug ihoc len. Odocob eu cal mec himec cabi euna caloloi. 6 Qilaqa ege wele cal mimeb ceteteh gagadic gihacgen eunadec ege besigec biluquna. Eunu ege loo je eu bisalu qee biluquna. Eunu ege loo je jaqecna kobol hilahna qee cabi oqona qa ege qila wawige Kis kobol haunna cabi oqona.
Silail kobol qigeceb cal mom
7 Eunu ege eeta ec madecnu? Loo je eu silail odi madecnufo? Qee bahic! Euqa loo je uqa ija silail mecnu qee ihactoubmi ija silailnu qee doum. Eu odi, loo je jaqec madena:
“Hina osona cetehnu cain amen qoiaun,” ena. (Kisim Bek 20.17; Loo 5.21)
Eu odi qee madoubmi ija ami qoc kobolnu qee doum. 8 Euqa silail mec kobol eu loo jena jic memegi oodi ami qoc kobol filfil wawina calena. Eu mele, loo jeca qee mi silail eu uqa cal mec dana cinigwe himec nijoub. 9 Wele ija loo jeca qee saen euna ija cebac bilem. Euqa hibna loo jena je ijaca hocob silail kobol cebac men. 10-11 Odocob silail kobol eu loo jena jic memegi oodi uhulten. Odimei loo je euna qiteceb cal mem. Eunu loo je eu ija cebac bilec ocnu nijen eu qiteceb cal mem eu fem.
12 Eunu ege doqona, loo je eu gun bahic. Je cunug eu loo je jaqecna bilina euha eu gun, eu tutuc, eu me bahic. 13 Eunu ceteh me eu qiteceb cal mem eu odifo? Qee bahic! Silail kobol eu ceteh me qee bahic eu camasac migiannu silail kobol eu ceteh me eu umei euna qiteceb cal mem. Odocobnu loo je jaqec eu age cain silail mowain ec madena eu silail kobolna gug bahic eu ceteh me qee bahic ihactena.
Dana eu waug lecisca
14 Loo je eu dolonigenu ceteh eu ege doqona. Euqa ija dana dewegca. Silail kobol eu ija u taciteceb ija uqana cabi ugina. 15 Ija kobol odigina eu uqana gug qee dugina. Ge, kobol odocnu ija gale bahic tena eu ija qee odigina. Euqa kobol ija sagagdugina eu ija gaidgaid odigina. 16 Odocob kobol ija gale qee tena eu ija odigina eunu ijana kobol euna ija odi madigina, “Loo je eu me,” igina. 17 Eunu qila ijadodoc qee odigina qa silail kobol eu ija wawina bilina eu odi odona. 18 Ija wawina ceteh me oso qee bilel eu ija dugina, eu ija dewenina madigina. Ija wawi hilahnu himec madigina. Ija kobol me odocnu ihoc gale tena qa ija kobol me eu odocnu ihoc qee odigina. 19 Kobol me eu odocnu gale tena eu qee odigina qa kobol me qee odocnu gale qee tena eu odigina. 20 Ija gale qee tena eu odiginafi eunu ijadodoc eu qee odigina qa silail kobol eu ija wawina bilina eu odona.
21 Eunu ija kobol odi gulucdudu biligina. Ija kobol me odocnu gale tena qa kobol me qee odocnu eu ija wawina bilina. 22 Mele, ijana cisdocna Anutna loo jenu gale bahic tena. 23 Euqa ija dewenina loo je fil bilina eu odi figina. Eu Anutna loo je ijana cisdocna bilina eu ija gale tena euca cadesina. Odocob eu uqa silail loo je ija dewenina bilina eu uqana gihactec mitina. 24 O waloc! Ija me qee mec dana bahic! In uqa ija cal mec deweni inadec besitigian? 25 Ija Anut uqa besitigiannu hetaga dugina! Jisas Krais egena Tibud uqa eu odigian! Eunu ijadodoc ijana cisdocna ija Anutna loo jena cabi ugina igina qa ija wawi hilahna silail uqana loo jena cabi ugina.