Nuwapoya Ayidi
(Lamentations)
Wonawiiakowa
Mmko bukana na Isrel damdi yadi wiinuwabero ghamana raghanine, kadi aviya bodu 586 BC kamone sipiika da Jerusalem siviberona, bi kate kana wawaya da kana sawara miimiisedi teya sikawara na yisisiyeni. Bi getayakovi da iiyabo mmko bukana igirumi, bi wawaya mududi sanoghonoghosi da augunai Jerimaiya igirumi.
1
Nuwavisi Jerusalem kamone
1 Naghove, na wawaya korotodi Jerusalem kamone,
bi katana noko kwanatuna ikwebu.
Roro kubura debane na kwanatu tupadi kamodiye,
na touna kwanatu maragasina tana,
bi katana tanaduma ware wasike kwabukwaburina naboni.
Roro na touna ware kiiwawo wasikena naboni,
bi katana touna wiibagubagurana.
2 Nubabasuve na yaduu raghani,
matadoga mayiyinagha sitototo sayowogha.
Kana tomotomogha tupadi subukwari kuyoveni,
gerubana siniororogha mayenina.
Turaturana sigiyaguveni bi nuwanuwadi sipughu touna biidi
da katana toudi na kana aviya.
3 Aviya sigeghomiiri da Jiuda damdi siburavidi bi sikabidi sinaghotaveyana,
bi situpedi da yadi bagubagurana bi nuwapoya ghamadi debadiye sitoura.
Katana toudi dam wiibata yadi kubure samakamake,
bi getana gawara meme siyabanani da siyiyawiitaveyanana.
Kadi aviya sigeghomiiri da sirukwavinidi bi sikabitawatawanidi,
toudi gerubana da kadi aviya gwabidima sinaverataveyanana.
4 Keda sanono Zaiyonma na sibubu,
kiiravine getana iiyabo gabudara kabikabikuwayidiye
namagha iyanono God kabepepina kiiravine.
Getana iiyabo kwanatu matamketadigha iyarughurughuna,
bi prist ere nuwaberodi sakabikabida.
Wasiwasike woudi saduudu,
bi kwanatu kana wawaya tupadi kabikwarakwara ghamaghamadi sabanabanana.
5 Katana kadi aviya sigeghomiiri da sibadedi,
bi sawara tupadi sakayokayovedina gwabidiye.
Yawe God igeghomiiri da Jerusalem
yana tamumu peyaridi kiiravidiye na aro ivereni.
Aviya sigeghomiiri da natunatudi siburavidi
bi sikabidi sinagho kubura rabarabae.
6 Naghove, Jerusalem na maragasina bi wiinuwakayowanina,
bi katana nokodi tupadi sikovi.
Kana babada na ware ribiribi kadi waghawagha diya* Diya na ribiribi tana bi touna rei yakamkam, bi wawaya touna ribiribina sayebayebayeni iyuwa kiiravine. vitonana sirabobo
na kam sininoghana naboni.
Toudi panapana irouvidi da sinoganoga,
gerubana kadi aviya gwabidima sinaverataveyanana.
7 Katana Jerusalem damdi kabikwarakwara sabanabanana,
da yadi wiikedakeda kubura mududiye,
na yadi noghota yaveramagha da naghove sawara miisedi tupadi rapediye na sanoghosidi.
Wasina bi aviya sipiika da siburavidi,
bi getana iiyabo da iyiwiitedi.
Nokodi aviya kwanatuna sikitani,
bi raghanina siyibero na simaniveni.
*1:6: Diya na ribiribi tana bi touna rei yakamkam, bi wawaya touna ribiribina sayebayebayeni iyuwa kiiravine.