12
Mẽ pahte Tĩrtũm mã amnhĩ nhõr ã mẽ pajarẽnh
Wam Korĩt 6.20; Epes 4.1; Piripos 4.8-9; Korosẽ 1.10; Wam Tesarõn 4.1-3; Wam Pêtre 2.11
1 Kwa Jejus kôt ixkwỳjaja. Tĩrtũm na hte mẽ pahto mex nẽ mẽ pakamã ukaprĩ rãhã jakamã na pa ã mẽ amã ixkapẽr anẽ. Kwa mẽ tokyx kãm amnhĩ jarẽ nẽ kãm amnhĩ gõ. Te mẽ ate kãm hkĩnh xà nhõr pyràk o amnhĩ nhĩpêx nẽ kãm amnhĩ gõ. Jao mẽ amã kapẽr kôt pix mã amnhĩ nhĩpêx o ri apa hprãm ã kãm amnhĩ jarẽ. Nẽ kãm hprãm xà hkôt pix mã tanhmã amã amnhĩ nhĩpêx to ho ri apa hprãm ã kãm amnhĩ jarẽ. Kot kaj mẽ ã kãm amnhĩ jarẽnh anẽ nhũm amnhĩ tã mẽ ama nẽ hkĩnh nẽ. Ã mẽ pahte kãm amnhĩ jarẽnh anhỹrja na kãm mar prãm.
2 Nẽ kêr ka mẽ kãm Tĩrtũm prãm kêt xwỳnhjaja kot amnhĩ nhĩpêx o ri amnhĩ nhĩpêx o ri apa hkêt nẽ. Nẽ mẽ amnhĩ to Tĩrtũm mãn wỳ kê mẽ amã mẽ ajamaxpẽr mex jagjê. Koja mẽ ama nẽ mẽ amã hagjê ka mẽ ra aprĩ hã hamaxpẽr xà hkôt mẽ pahte amnhĩ to mex xà pumunh mex nẽ. Na pu htem hkôt amnhĩ nhĩpêx o ri papa nhũm amnhĩ tã mẽ pahpumu nẽ hkĩnh nẽ. Pu mẽ pajaxwỳja ỹ hã pahkĩnh nẽ ri papa.
Kris kwỳjaja kot tanhmã axpẽn nhĩpêx to hã mẽ kãm karõ
Rõmãn 12.1-11; Epes 4.11-16; Wam Pêtre 4.10-11
3 Nẽ na pre Tĩrtũm ixto mex nẽ. Nẽ mẽ akaxyw ixãm. Ixte mẽ amã Kra Jejus kot tanhmã mẽ panê amnhĩ nhĩpêx to hã harẽnh o ri mẽ akôt ixpa kaxyw. Tã na pa ã kagàja kamã mẽ amã harẽnh anẽ.
Jakamã kwa kêr ka mẽ amnhĩ to jarkrar o ri mẽ kãm apa hkêt nẽ. Ãm kwarĩ ho kwarĩ. Rỳ atỳx ri ajamaxpẽr o:
—Nà pa na ixte amnhĩ to mex o ixte ixkwỳjê piitã mẽ hakrenh par.
Anhỹr ã amnhĩ to jarkrar o ri mẽ hkôt apa hkêt nẽ. Kêt mẽ ãm amnhĩ jarẽnh o:
—Na pa pre amnhĩ kaxyw Jejus kôt ijamaxpẽr nhũm Tĩrtũm ixpumu nẽ ixto hkra. Jakamã na pa hte Jejus Kris pix kukwak ri tãm amnhĩ nhĩpêx o ri ixpa. No amnhĩ krã hkôt ã amnhĩ nhĩpêx anhỹr kêt nẽ. Anẽ.
4 E pa mẽ amã mẽmoj jarẽ ka mẽ inhma. Nà mẽ panhĩja pyxi htã kamã mẽmoj xohtôô. Na kamã mẽ pano nẽ mẽ pajakwa. Nẽ kamã mẽ pajamak nẽ mẽ pahte. Na pu htem mẽ pano ho rĩt nẽ mẽ pajakwa ho pakapẽr. Nẽ mẽ pajamak o ri ama nẽ mẽ pahte ho ri mra. 5 Ja pyrà nẽ Kris kôt mẽ pahte amnhĩ xunhwỳr xwỳnhja ãm pyxi tã hkôt mẽ pahte amnhĩ xunhwỳr xwỳnhjaja mẽ paxohtôô. Jakamã na pu htem ahpỹnhã tanhmã axpẽn to mex to ho ri papa. Jao Kris kôt axpẽn to pahtõ nẽ pahtõx o papa.
6 Tĩrtũm na hte mẽ pahpê hkwỳ hã ahpỹnhã mẽ pamã tanhmã mẽmoj tã karõ to nẽ kaxyw mẽ pahto mẽ paxihtỳx. Tã kêr pu mẽ ra kot mẽ pamã mẽmoj tã karõ xà hkôt kãm amnhĩ nhĩpêx rãhã ho ri papa. Jakamã koja mẽhõ ate Tĩrtũm kapẽr jarẽnh o ri apa kaxyw axãm nẽ amã anẽ ka Tĩrtũm kamnàr rom mẽ kãm kapẽr jarẽnh mex o ri mẽ hkôt apa.
7 Rỳ ate akwỳjê mã tanhmã axàpênh to ho ri apa kaxyw axãm ka mẽ kãm axàpênh mex o ri mẽ hkôt apa.
Rỳ ate Tĩrtũm kapẽr ho mẽ ahkre ho ri apa kaxyw axãm ka ho mẽ ahkre mex o ri apa.
8 Rỳ ate Tĩrtũm kapẽr o ri Jejus kôt mẽ akwỳjê jamaxpẽr o hihtỳx o ri apa kaxyw axãm ka mẽ kãm kapẽr jarẽnh pê mẽ ho mẽ hihtỳx mex o ri mẽ hkôt apa.
Rỳ ka mẽ atõ akukrêx rax japêr nẽ ate mẽ kêp amrakati xwỳnhjê mã mẽmoj nhõr o ri apa kaxyw axãm ka axàmnhĩx ri mẽ kãm mẽmoj nhõr o ri mẽ hkôt apa.
Rỳ ate akwỳjê ho amnhĩptàr kaxyw axãm ka mẽ ho amnhĩptàr mex o ri apa.
Rỳ ate tanhmã mẽ akwỳjê ho mex to nẽ mẽmoj to mẽ kutã anojarêt o ri apa kaxyw axãm ka akĩnh kãm ã mẽ hipêx anhỹr rãhã ho ri apa nẽ tanhmã akapẽr punuj to hkukamã ri ajamaxpẽr o ri mẽ hkôt apa hkêt nẽ.
9 Nẽ kêr ka mẽ apiitã amã axpẽn kĩnh kãm axpẽn to mex rãhã ho ri apa nẽ ri axêx rom amã axpẽn kĩnh ã amnhĩ jarẽnh o ri apa hkêt nẽ. Nẽ mẽ kot amnhĩ tomnuj xà piitã hkaga hpa nẽ hpãnhã mẽ kot amnhĩ to mex xà pix pyr tỳx nẽ hkôt amnhĩ nhĩpêx rãhã ho ri apa. 10 Nẽ mẽ apê Kris kwỳ hã amã axpẽn kĩnh kãm tãm axpẽn nhĩpêx o ri apa. Nẽ mẽ akwỳjaja mẽ kot amnhĩ to mex xwỳnh ã mẽ harẽnh o ri mẽ hkôt apa. No mẽ ri atỳx ajamaxpẽr o:
—Nà koja mẽhõ ixkumrẽx ixte tãm amnhĩ nhĩpêx xwỳnh ã ijarẽ pa rĩ kormã amnhĩ xwar tãm kot amnhĩ nhĩpêx xwỳnh ã harẽ.
Anhỹr o ajamaxpẽr kêt nẽ. Kêr ka akumrẽx tãm kot amnhĩ nhĩpêx xwỳnh ã harẽ.
11 Nẽ kêr ka mẽ Tĩrtũm mã mẽmoj to anhỹr kaxyw nẽ kamã amã kaga hkêt kãm tanhmã kãm mẽmoj to ho ri apa. Jao akĩnh kamã kãm ho anhỹr mex nẽ. 12 Nẽ mẽ nhỹrmã Tĩrtũm kot kaxkwa kamã mẽ ato mex rax kukamã ajamaxpẽr nẽ akĩnh rãhã kãm mẽmoj to anhỹr o ri apa.
Nẽ kêr ka mẽ tanhmã amnhĩ to rỳ nhũm mẽhõ tanhmã mẽ ato ka mẽ akaprĩ nẽ ri apa htã no ãm tee ri amnhĩ kukamã ajamaxpẽr o Tĩrtũm kaga hkêt nẽ. Arĩ amnhĩ to hwỳr rãhã ho ri apa. 13 Nẽ koja Kris kôt atõjê hõ kêp amrakati ka mẽ ja hã omu nẽ anhõ mẽmoj japêr nẽ mãmrĩ kãm hkwỳ gõ. Nẽ amnhĩ wỳr awỳ nẽ tanhmã ho mex to.
14 Nẽ mẽ kot tanhmã mẽ atomnuj to xwỳnhjaja kêr ka mẽ amnhĩ tã mẽ omu nẽ agryk nẽ wajaga kot tanhmã amã ho kaxyw hwỳr atẽm nẽ kãm tanhmã hã axàmnênh to hkêt nẽ. Kêt ãm ho Tĩrtũm pix wỳ nẽ kãm:
—Pa mẽ ijamãr mex xwỳnh maati. Nà na ixkwỳjê hõja ã inhĩpêx anẽ. Tã nom kêr ka ixtã tanhmã homnuj to hkêt nẽ. Ãm tanhmã ho mex to.
Anhỹr o mãn mẽ ho awỳ.
15 Nẽ koja akwỳjê hõ mẽmoj tã hkĩnh nẽ. Ka omu nẽ uràk nẽ ỹ hã akĩnh nẽ. No koja mẽmoj tã hkaprĩ nẽ mỳr o nhỹ ka omu nẽ ra uràk nẽ ỹ hã akaprĩ nẽ.
16 Nẽ kêr ka mẽ piitã mẽ hipêx o axpẽn pyràk o ri apa. Te mẽ ate amnhĩ to rax o akwỳjê jakrenh o te mẽmoj kamã akahak o amnhĩ nhĩpêx pyràk kêt nẽ. Nẽ axàhpumunh tỳx o ate mẽ piitã mẽ hakrenh par pyràk o ri amnhĩ nhĩpêx o ri apa hkêt nẽ.
17 Nẽ koja mẽhõ tanhmã ato htã ka ãm amnhĩ tã omu nẽ tanhmã amnhĩ tã ho hkêt nẽ. Nẽ mẽ piitã mẽ noo mã tãm ri amnhĩ nhĩpêx o ri apa.
18-19 Nẽ kêr ka mẽ tãm ri axpẽn mã akapẽr rãhã ho ri apa.
Nẽ kot kaj akràmnhwỳ mẽ wa tanhmã axpẽn nhĩpêx to. Hãmri ka wa akupỹm tãm axpẽn xãm kaxyw kãm akapẽr tã nhũm ama nẽ ãm ama nẽ akaga. Ka ãm amnhĩ tã omu nẽ kamã agryk kêt nẽ. Koja Tĩrtũm tãm tanhmã atã ho. Kapẽr ã kagà htũm kot ja jarẽnh kot:
Kêr ka mẽ amnhĩ tã tanhmã kot ato xwỳnh to hkêt nẽ. Pa kot paj mẽ atã tanhmã ho. Anẽ.
Nẽ harẽnh kot:
20 Kêr ka mẽ amã mẽ kãm mẽ akurê xwỳnhjê o mex pix o ri apa.
Kê mẽ kãm prãm ka ja hã mẽ omu nẽ mẽ kamã axukaprĩ nẽ mẽ kãm mẽmoj kwỳ gõ kê mẽ kuku.
Rỳ nhũm mẽ kãm kôr ka mẽ kãm gô hkwỳ kê mẽ ho ixkõ.
Kot kaj mẽ ã amnhĩ tã mẽ hipêx mex anẽ nhũm mẽ tee ri amnhĩ tã mẽ apumu nẽ amnhĩ kamã hpijaàm jao mẽ atã amnhĩ kamã gryk nẽ. Anẽ.
21 Nom kot kaj mẽ amnhĩ tã tanhmã mẽ homnuj to hãmri nẽ ajaxwỳja uràk nẽ amnhĩ tomnuj nẽ. Ja pymaj kêr ka mẽ amnhĩ rom tãm mẽ hipêx. Hãmri nhũm mẽ amnhĩ tã mẽ apumu nẽ mẽ apyrà nẽ tãm mẽ anhĩpêx japêr.
E kêr ka mẽ ã axpẽn nhĩpêx o ri apa anẽ.