8
Yesu In Tool Kuto Mai Ke Paroranga So Pang Maro
1 Ngan betanga mai yo am nga amwetewete ye in nen: Idi nga, tool kuto mai kiidi ke paroranga so yo dook mata nen i, in inepe. Inbe ye in ilo ye malala ke Maro le lo iwur ye Maro, yo ene mai san i, in bene oonoo. Le dookoot nga, ye in inepe potai ye kakawa ke burungu yo Maro iwur ye a matan kala so nga le imot ye i, 2 inbe ye in iyei urata nango ye ni mison ke Maro ngo. Ngan ni mison tani, in badabada ke sungunu pang Maro yo moolmool i. Inbe badabada tani, in di tooltool la tipatokode ye bedi, ngan tiap, bong Tool Mai ye taunu la ipatokode i.
3 Ngan di tooltool kuto maimai le imot ke paroranga so nga, ngan tipootoo di bet tikap so yo di tooltool tikap ye lo ponana kidi nga, ngan pang Maro. Inbe tiyei paroranga ye so yo di tooltool tikap bet tiparoro pang Maro ye sennene kidi nga. Ngan nen le Kirisi, yo tool kuto mai kiidi ke paroranga so i, in iyeie paroranga pang Maro ye so lapau. 4 Ngan kumata le bet inepe ye tana i nga, ngan ke bet iyei urata yo ben tool ke paroranga so, in tiap. Yesoo, di tooltool ke paroranga so la tinepe ni nga, inbe di ngan tiyei urata ke paroranga so pang Maro ben wer ki yo ikap pang Mose a iwodo nga. 5 Di ngan tiyei urata pang Maro ye badabada ke sungunu yo iken tana i leu. Ngan badabada tani in dawa ben badabada moolmool yo iken ye malala ke Maro, in kannungana. Ngan nen le ye kene yo Mose bet ipatokodo badabada ke sungunu pang Maro ye in nga, ngan Maro ikap noonoongoo panga inbe iwete nen, “Ken kure ngan kuyei so nga le imot le lo itarye momo ki ben yo apitnai pong kawal Sinai in nga.”✡ Pamulenge (Kisim Bek) 25:40 6 Bong urata maiyoko yo Maro itaru la Yesu bene a iyeii i, in dook mata san le illoso urata kidi tooltool ke paroranga so yo tiyei tana i nga. Le moolmool, Yesu tani in inepe kataunu ke di tooltool inbe Maro, a ikarata dada paunu yo bet idi nga ke bet tala potai ye Maro inbe taye tagaua le atu mulu ye i. Inbe dada paunu tani yo bet tala taye Maro tagaua mulu ye i, in illoso dada yo gurunu i, yesoo betanga medana yo paunu i, in dook mata san le illoso betanga medana yo gurunu i.
7 Kumata yo bet betanga medana yo gurunu i, in taukan busunu nga, ngan matin nga le Maro ipamede betanga medana yo paunu in tiap. 8 Bong Maro ipusye busunu kidi tooltool, le iwete nen,
“Au Tool Mai awete nen, au i atara lal a iken oo. Ngan kene yo bet pombe ye in nga,
ngan la bet au i ole apamede betanga medana paunu pang di tooltool ke Isrel,
inbe pang di tooltool ke Yuda.
9 Ngan betanga medana paunu yo bet apamede pang di i,
in o gaongo ben yo mugu ngan apamede pang di sasa kidi, in tiap.
Ngan ye kene yo apamede betanga medana gurunu pang di ye in nga,
ngan au i akap di ke Isip,
inbe atoko bedi dawa ben kase maitiap tamana itoko bene nga,
inbe arara di a timan.
Bong lodi bet titoo betanga tani yo apamede pang di, in le iken so, ngan tiap,
ngan la le awala murik pang di nga.
10 Le au Tool Mai awete nen, ye kene yo bet lal ki tani in iman le pombe koot nga,
ngan la bet apamede betanga medana paunu pang di tooltool ke Isrel nga.
Ngan i betanga medana paunu tani, in naii:
Au i ole atar wer yo kiau nga lo iken kutodi lono, inbe ole awodo lo iken lodi.
Inbe au i ole ayei ben Maro kidi,
inbe di ngan ole tiyei ben di tooltool kiau.
11 Ngan nen le ye kene tani,
in tool sa o ikaua urata ke bet ipatomonai di diene yo tinepe potai ye, ngan ye Tool Mai tiap.
Inbe tool sa o ke bet iwete pang di rara ki nen,
‘Alei, kumata bet ang nga lomu galanga ye Tool Mai, ngan la bet dook mata nga,’ ngan tiap.
Yesoo, di tooltool le imot ngan lodi galanga yau oo.
Moolmool, di tooltool yo edi maimai tiap le ilo ye di tooltool yo edi maimai nga,
ngan di le imot ole lodi galanga yau.
12 Yesoo, au i ole agiri dada dook tiap kidi yo tiyei nga,
inbe o ke bet lok tut sennene yo kidi ngan mulu tiap.”✡ Yedimia (Jeremaia) 31:31-34
13 Ngan tina Maro iwete nen, “I betanga medana paunu tani, in naii”, ngan nen le iyeie betanga medana yo gurunu i le taukan urata. Inbe so yo taukan urata a iken sorok i, in ole pattu leu be ilene.