1-2 Arlte Saturday aneke arlte apurrke Jew areye-kenhe-arle, itne urrkapetyakenhe aneke ingwele anteme-irreke urrkapetye-kwenye akwete. Itne ankwe inteke arlte arrpenhe anteme-irreke. Kele Mary Magdala-arenye, Salome, Mary, mikwe James-kenhe-arlke, uterne akertne-irretyakenhe-nge akwete alherlte-iweke, atyalangke Jesus-kenhe antere ntyentyele apernewarretyeke, inteye kwene-werne irrpenherlte-iweke. 3-4 Itne alherlte-iwemele angkeke, “Angwenhele-ame apwerte athirnte akngerre-apenhe renhe ankerte-iwetyenhe nhenge arriwele ilpeme inteye renhe anwerne-ketyenge?” Itne uyarne anthurre itirreke apwerte nhenge-arle akngerre anthurre anekenge. Ikwere-irretye-alhemele itne areke arrpenhele apwerte athirnte akngerre-apenhe renhe ankerte-iwekenge itere-werne, yanhe ikwerele tnetyame. 5 Inteye-werne irrpenheke-arle iperre, itne arerrirreke artwe mantere mperlkere-akerte akwe-arratyele anerle-anerlenge. Itne renhe areke-arle-iperre atere-irrerirremele.

6 Utnenge alkere-arenye anteme arelhe urrpetyeke angkeke, “Atere-irrerirretyalaye! The itelareme arrantherre-arle Jesus-eke apale untheme, nhenge itne renhe nail-ele arne arntarlkweke-arleke irlpare arrerneke. Ikwere nhenhe arrangkwe! Rarle itethe-irrirtneke akeme-irremele. Itelaraye, re arrekantherre arrekwele ileke, ilwekarle iperrele, rarle itethe-irremele akeme-irretyenhe. Aretyeke apetyewarraye nthenhele-arle re inteke.” Itne arratye irrpenhemele areke imerte angkemele, “Arratye! Nhenhe-arle arrangkwe-arle!” 7 Utnenge alkere-arenye re anteme itneke alakenhe angkeke, “Iparrpe alperlte-iwaye apententye akngerre ikwerenhe areyeke iletyeke alakenhe, ‘Rarle ilweke iperre itethe akeme-irreke. Re Galilee-werne alheme arrekantherrenge arrekwele, kele arrantherre renhe yanheke-arle aretye-alhetyenhe, rarle arrekantherre ileke-arteke.’ Alakenhe itneke iletyeke alherlte-iwaye!”

8 Itne arrewemele inteye-ngentyele arratintyeke, apatemele unterlte-iweke. Arrpenheke iletyakenhe aneke atere-arle itne awelhekenge.

9a Kenhe Jesus ilweke-arle iperre itethe akeme-irreke ingwele-athnele arlte Sunday-nge, re Mary Magdala-arenyeke-amparre arrateke. Nhenge arelhe yanhele akenhe atnyenetyarte arrentye seven-pele akurne. Kenhe Jesus-ele arrentye ikwerenge-ntyele aywepeke re mwerre-irreke. 10a Mary Magdala-arenyele aretye-alheke apententye akngerre Jesus-kenhe areye akayale artnerlenge, re itneke angkeke, 11 “The kwenhe artwe Jesus renhe arerne itethe-arle-irreke akeme-irrerlenge.” Kenhe itne ikwere akangkwe-irretyakenhe-arle rarle akwele urrtyirreke-arlenge.

12 Arlte arrpenhele, Jesus arrateke anteyeke apententye akngerre ikwerenhe atherreke ratherre-arle apmere arrpenhe-werne alherretyamenge. 13 Kenhe renhe arerle-anerreke-arle-iperre ratherre alperreke, iletye-alpeke arrpenhe areyeke rarle ikwere-atherre arrateke. Kenhe itne akenhe itirreke ratherre-arle urrtyirrekeke-athene.

14 Kenhe urreke Jesus arrateke apententye akngerre eleven-peleke, merne arlkwerlte-anerlenge. Re itneke ahele-irreke itne-arle itirretyakenhenge rarle itneke arratye ilekenge. Kenhe itne ipmentye awemele aneke nthakenhe-arle tyerrtye areye ikwere-akerte angkerlenge, nhenge tyerrtye areyele-arle renhe areke itethe-irrirtnerlenge. 15 Kenhe re apententye akngerre areyeke angkeke, “Kele alherlte-iwaye apmere arrpe-anenhe-werne, tyerrtye ingkirrekeke Ayeye Mwerre ilerlte-apemele. 16 Angwenhele apeke ayenge apentetyeke itirremele, renhe kwatyeke akwernaye baptise-eme-iletyeke. Kenhe Ngkartele renhe itetheke mpwaretyenhenge. Kenhe arrpenhele apeke ayenge ipmentyele-iwetyeke itirreme, Ngkartele renhe ilwetyeke mpwareme. 17 Tyerrtye nhenge areyele ayenge apentetyeke itirremele, itne arne mwerre areye ilyernpenye mpwaretyenhe. Itne arrentye areye aywepetyenhe arritnye atyinhe atniwemele. Itne angkentye arrpenhe areye angketyenhe-anteye. 18 Itne apeke ularele-kwenye apmwe arrengkwelthe-akerte kutyetyenhe, kwatye akurne apeke ularele-kwenye antywetyenhe arne arrengkwelthe-akerte, itne ilwetyakenhe anetyenhe. Itne rlkerte areye anpetyenhe, Ngkartele itnenhe angkwerre-iwetyenhenge.”

19 Kenhe Jesus Alartetye-arle itneke angkeke iperre, Ngkartele anteme renhe alkere akertne-werne akngirtneke. Re Ngkartenge akwe-arratyele arrernelheke.

20 Kenhe apententye akngerre ikwerenhe areye alhemele angkentye mwerre ilerlte-apeke. Itne arne mwerre atningke ilyernpenye mpwareke, Ngkarte-arle itnekenge alhekenge ulyeyele mpwaretyeke. Kenhe tyerrtye areyele aremele itne itelaremele angkeke, “Yewe, tyerrtye nhenhe areyele ayeye arratye anthurre ileme.”

9b Kenhe arelhe areye anteme alheke anyente-irretyeke Peter-kenhe areyenge. Itneke ileke Jesus-arle itethe-irrirtneke, re akenhe Galilee-werne-arle alheke. 10b Kenhe Jesus-ele yerneke apententye akngerre ikwerenhe areye angkentye mwerre iletyeke apmere arrpe-anenhele nhenge Ngkartele itnenhe itetheke mpwaretyenhenge ikwerenge akwete-ante anetyenhenge. Kele arratye itne alhemele ilerlte-apetyame.