32
Atrivir aghuim kantrin ganam
1 Ia oragh! Atrivitam otivam!
Atrivir kam, arazir aghuimɨn gɨn mangɨ, kantrin kam gativagham.
Eghtɨ kantrin gumazir dapaniba, me guizɨn arazimɨn gɨn mangɨ,
gumazamizibagh ativagh men ganam.
2 Gumazamiziba akurvazim bagh izɨtɨ,
gumazir dapanir kaba deravɨra vaghvagh bar deravɨra men akurvagham.
Gumazir dapanir kaba, gumazamizibar danganir mogomemɨn mɨn ikiam,
eghtɨ dughiar amozir ekiaba ko amɨnir ekiaba izɨtɨ, me mangɨ men uari mongam.
Eghtɨ me mati dɨpaba puvatɨzir danganimɨn,
dɨpam ivemara an zui moghɨn ikɨ,
egh mati dagɨar ekiam aruem apazagha, danganir orangtɨzimɨn mɨn iti.
Aruem bar gavgavightɨ,
gumazamiziba mangɨ an apazangɨn dapiagh ikɨ avughsam.
3 Gumazamizir bizibar gariba,
men damaziba okavighan koghtɨ,
me deravɨra bizibar ganam.
Eghtɨ gumazamizir kuariba deraziba,
men kuariba deraghvɨra ikɨtɨ,
me deravɨra biziba baragham.* Nɨ Aisaia 6:9-10ɨn gan.
4 Eghtɨ gumazamizir faragha deragha nɨghnɨgha bizibagh amir puvatɨziba,
me datɨrɨghɨn biziba deragh dagh nɨghnigh dar amuam.
Eghtɨ gumazamizir mɨkɨmasa mɨzeba osemeziba,
me deravɨra bizibav kɨmam.
5 Eghtɨ arazir ziar ekiam isa gumazir arazir kurabagh amiba ko, gumazir onganibagh amibagh anɨdim,
a bar gɨvagham.
6 Guizbangɨra, gumazir arazir onganibagh amiba, me mɨgɨrɨgɨar onganibagh ami,
egha me zurara bizir kurabar amuasa nɨghnɨsi.
Me arazir Ikiavɨra Itir God aghuazibagh amuava,
egha akar ifavarir avɨriba Ikiavɨra Itir God gasi.
Egha me mɨtiriaba azir gumazamiziba, dagheba me ganɨdir puvatɨ.
Egha kuariba pɨrir gumazamiziba, dɨpaba me ganɨdir puvatɨ.
7 Ezɨ ifavarir gumazamiziba, nɨghnɨzir kurar bar avɨriba men dapanibagh izɨfa.
Me gumazamizir biziba puvatɨziba, dɨkabɨnasa men kotiaba adafi.
Me, onganarazibagh amir gumazir arazir kurabagh amir puvatɨziba,
me kotɨn aven ifavarir arazir igharazibar mɨgɨrɨgɨabar me gami.
8 Ezɨ gumazamizir aghuiba me ziar ekiaba iti, me zurara arazir zuezibagh ami.
Egha me arazir aghuibar amuasavɨra iti.
Amiziba azirakabar amu
9 Ia Jerusalemian amiziba, ian dabirabim derazɨ ia ghaze, ia deravɨra ikiam.
Egh ia deravɨra kuariba arigh nan akam baragh.
10 Ia datɨrɨghɨn navir amɨrizimɨn iti.
Egh ia oragh, azenir vamɨra gɨvaghtɨ, ia bar atiating nɨgham.
Ia gantɨ, ian wainɨn azeniba ko, dagher igharazibar azeniba,
da ua ban kogham.
11 Datɨrɨghɨn ian dabirabim derazɨ ia ghaze, ia deravɨra ikiam.
Egh ia atiating nɨghɨva akong uan korotiar aghuiba suva, azirakar korotiabar aghuam.
12 Ia uan azenir obarir aghuiba ko wainɨn azenir aghuiba bagh uan osɨmtɨziba akakaghsɨ,
ia uan evaribav mɨsogh azirakabar amu.
13 Benir ataghatariba ko oghevsevir kuraba nguazir kam avaragham,
kamaghɨn ia nan gumazamiziba nguazim bagh azirakabar amu.
Guizbangɨra, ia dɨpenir bar dirir ia bar ifongeziba, ia fomɨra dagh nɨghnɨgha da bagha bar akonge,
egh datɨrɨghɨn ia da bagh azirakabar amu.
Ia fomɨra uan nguibar ekiamɨn ikia bar akonge,
egh gɨn, ia a bagh osemegham.
14 Bar guizbangɨra, atrivim uan dɨpenim ategham.
Eghtɨ gumazamiziba bar moghɨra nguibar ekiar kam ateghtɨ
gumazamizibar nɨgɨnir me ingara mangɨn izegh gamir kam, ua ikian kogham.
Eghtɨ mɨdorozir gumazibar dɨvazir gavgavim ko, dɨpenir suer ruarir mɨdorozir gumaziba ikia apaniba bagha gariba,
da bar moghɨra pura ikɨ bar ikuvigham.
Eghtɨ afiar atiaba dughiar bar ruarimɨn danganir kamɨn ikiam.
Eghtɨ donkin atiaba an aven darusɨ bar akuegham,
eghtɨ sipsipba ko bulmakauba izɨ oghevsevibar amam.
Ikiavɨra Itir God dabirabir aghuim isɨ uan gumazamizibar anɨngam
15 Ikiavɨra Itir God uan Nguibamɨn ikia
uan Duam, uam e bagh anemangam.
Eghtɨ dughiar kamɨn, gumazamiziba puvatɨzir danganim,
azenir bar aghuim otogham,
eghtɨ bizir bar igharagha gariba a bativam.
Eghtɨ azeniba, dagher avɨribar amutɨ da otivam,
mati temeba pura ruarir pɨzimɨn aghui.
16 Dughiar kamɨn, gumazamiziba nguazir kamɨn ruaghateviba bar dar ikɨ,
arazir aghuiba ko guizɨn arazibara damuam.
17 Gumazamiziba arazir aghuim damutɨ,
tuavir kamɨn dabirabir aghuim otogham.
Eghtɨ gumazamiziba uam atiatingan kogh,
nɨmɨra ikɨ nɨghnɨzir gavgavimɨn aven tugh gavgavigh kamaghɨra ikiam.
18 Ezɨ Ikiavɨra Itir God ghaze,
Nan gumazamiziba, me dabirabir aghuim ikiam, egh me deravɨra ikɨ avughsɨ,
uan nguibabar aven navir amɨrizimɨn ikɨ, egh bizitamɨn atiatingan kogham.
19-20 Eghtɨ aisɨn amozim mar irɨ ruarir ekiamɨn itir temeba bar dagh asɨghasigh,
egh uaghan nguibar ekiamɨn dɨpenibagh irɨtɨ, da bar nguazim giregham,
eghtɨ ia Ekiamɨn gumazamiziba bar deravɨra ikiam.
Egh ia uan dagher ovɨziba nguazir dɨpam iti naghɨn da oparam,
egh ia uan bulmakauba ko donkiba ateghtɨ,
da uan ifongiabar daru oghevsevibar amɨ ikiam.